კომპანია, რომლის 100% წილის მფლობელი სამხედრო სამეცნიერო-ტექნიკური ცენტრი “დელტაა”, წლების განმავლობაში საკვებით უზრუნველყოფდა ჯარსა და ციხეებს. დღეს ირკვევა, რომ ”მსოფლიოში საუკეთესოდ უზრუნველყოფილ” ჯარს დაბალი ხარისხის ხორცით კვებავდნენ. კიდევ უფრო მძიმე მდგომარეობა იყო ციხეებში, ამ დროს კი კომპანიას სახელმწიფო ბიუჯეტიდან სოლიდური თანხები ერიცხებოდა.
_ ”როდესაც მე დავსვი კითხვა ხორცის კატეგორიებთან დაკავშირებით, ეს იყო, ძირითადად, ფასის და მისი მოწოდების გარკვეულწილად შეზღუდვის თემა. მე არ ვარ ის ადამიანი, ვინც ამ კითხვაზე ამომწურავად უნდა გაგცეთ პასუხი, მაგრამ ფაქტია, რომ მეორე კატეგორიის ხორცით ჯარი არ უნდა იკვებებოდეს, ეს, ერთის მხრივ, არის ცუდი და მეორეს მხრივ, მისი გამოსავლიანობა არის მცირე, შესაბამისად ხარჯიც მეტია. ჩვენი კომპანია ხარჯავს სახელმწიფოს ფულს, შესაბამისად, თუ ხორცის კატეგორიას გავზრდი, ფასსაც შევამცირებ, იმიტომ, რომ პირველი კატეგორიის ხორცის გამოსავლიანობა 20-30% -ით მეტია, ვიდრე მეორე კატეგორიის ხორცის”, – პასუხობს კომპანიის ახლად დანიშნული დირექტორი, ნინო გორგაძე “გურია ნიუსის” მიერ დასმულ შეკითხვაზე.
5 დეკემბერს გამართულ პრესკონფერენციაზე სასჯელაღსრულების მინისტრმა, სოზარ სუბარმა განაცხადა, რომ შპს ”ქართული კვების კომპანიის” ერთბაშად ჩანაცვლება, ციხეებში კვების პრობლემას შექმნიდა. გარდა ამისა, ახალ მინისტრს კომპანიის ანგარიშზე თანხა წინასწარ ჩარიცხული დახვდა. შპს ”ქართული კვების კომპანიას” ხელშეკრულების ვადა იანვარში ეწურება, რის შემდეგაც, სოზარ სუბარის თქმით, სამინისტრო ტენდერის გამოცხადებას გეგმავდა.
კომპანიის დირექტორი, ნინო გორგაძე “გურია ნიუსთან” საუბარში ამბობს, რომ სასჯელაღსრულების სამინისტროსთან ხელშეკრულება კიდევ ორი თვით გაგრძელდა. კომპანიის დირექტორი ციხეებში კვების ხარისხის გაუმჯობესებაზეც საუბრობს: ”ციხეს აქვს თავისი, ცოტა განსხვავებული მენიუ, მაგრამ, როდესაც ჯარში ხორცის კატეგორიას ვცვლით, რაღა თქმა უნდა, ციხეშიც ანალოგიურად, შედარებით მაღალი ხარისხის პროდუქცია შევა. ეს ეხება არა მარტო მაღაზიებს, არამედ კვების ობიექტებსაც. სასჯელაღსრულებასთან, დაახლოებით, 2 თვით გაგვიგრძელდა ხელშეკრულება და შემდეგ გადაიხედება ჩვენი თანამშრომლობის საკითხი”, _ ამბობს კომპანიის დირექტორი “გურია ნიუსთან”.
სასჯელაღსრულების სამინისტრო პატიმრების კვებაზე დაწესებული 90 ლარის 110 ლარამდე გაზრდას გეგმავს. ამავე დროს, დღის წესრიგში დგას წინა ხელისუფლების მიერ კვებაზე გამოყოფილი ფულის ხარჯვის კანონიერების შესწავლა. დადგება თუ არა შპს ”ქართული კვების კომპანიის” ყოფილი ხელმძღვანელობის პასუხისმგებლობის საკითხი, ამას დრო გვიჩვენებს. დღეს კი კომპანია გადახალისებული მენეჯმენტით აგრძელებს მუშაობას და პირველი ტენდერის გამოცხადებასაც გეგმავს.
კვების სერვისის მიმწოდებელზე ტენდერის გამოცხადებას აპირებს სოზარ სუბარიც, ასე რომ, ტენდერში მონაწილეობას, სავარაუდოდ, ”ქართული კვების კომპანიაც” მიიღებს.
” ახალი ტენდერი, რომელსაც პრემიერის აპარატთან ერთად ჩავატარებთ, მალე გამოცხადდება. ეს იქნება სამ ლოტად გაყოფილი: დასავლეთ საქართველო და 2 ლოტი _ აღმოსავლეთ საქართველო. ასე რომ, კომპანიებს მოვუწოდებ, დაელოდონ ჩვენს ტენდერს და მონაწილეობა მიიღონ მასში, _ განაცხადა ერთ-ერთ პრესკონფერენციაზე სუბარმა.
არაოფიციალური ინფორმაციით, ციხეებისა და ჯარის საკვებით მომარაგება ბაჩო ახალაის და ”დელტას” ხელმძღვანელის, რევაზ ჭარბაძის ბიზნესი იყო. 2011 წლის 19 ივლისს პრემიერმა, ნიკა გილაურმა დადგენილებაც კი გამოსცა შპს “ქართული კვების კომპანიისათვის” საქონლისა და მომსახურების შესყიდვების სპეციალური წესის დამტკიცების შესახებ.
