მე არ მინდა თქვენი შეშინება, მაგრამ იმ პირობებში, როცა ამდენი ყაჩაღი ამდენი, ხულიგანი გამოდის გარეთ, ეს ნიშნავს იმას რომ ხვალ და ზეგ ხულიგნები, მძარცველები,ყაჩაღები, ჯიბის და ბინის ქურდები ბევრად უფრო თამამად დაესხმებიან ჩვენს შვილებს ქუჩებში, ბევრად მეტი იქნება წვრილმანი დანაშაული. ყველაფერი ის, რასაც მივაღწიეთ და რაც აღიარებული იყო მთელი საერთაშორისო თანამეგობრობის მიერ, საქართველო ითვლებოდა ევროპაში ყველაზე უსაფრთხო ქვეყანად, ეს ყველაფერი ამ და სხვა გადაწყვეტილებებით დიდი საფრთხის და დარტყმის ქვეშ დგება.
პარლამენტმა გაუშუა რუსეთის ყველა ჯაშუში გარეთ, რუსეთი არის ქვეყანა რომელიც სამკვდრო -სასიცოცხლო საფრთხეს უქმნის ჩვენს ეროვნულ უსაფრთხოებას. რა თქმა უნდა, ჩვენ ყველა ჯაშუში არ აღმოგვიჩენია, მაგრამ რუსეთის ჯაშუშური ქსელი იყო განეიტრალებული. რუსების ჯაშუშების, საქართვველოს ოკუპანტის ჯაშუშების გარეთ გაშვება არა მხოლოდ წარმოუდგენელი უკანონობაა და საფრთხეს უქმნის უსაფრთხოებას, არამედ წაახალისებს ნებისმიერ სხვას, ვინც მომავალში მზად არის ჩაიდინოს საკუთარი ქვეყნის ღალატი, არც ერთი თავის თავის პატივისმცემელი ქვეყანა, მით უმეტეს ნაწილობრივ ოკუპირებული, ასეთ ნაბიჯებს ასე ხელაღებით არასდროს არ დგამს.
მთელი ამ წლების განმავლობაში, არ შევიწყალე პრეზიდენტ შევარდნაძეზე თავდამსხმელები. რა მნიშვნელობა აქვს, რომელ პრეზიდენტს დაესხა თავს? ადამიანი, რომელიც დგება ტერორიზმის გზაზე, ჯაშუშობის გზაზე, სამხედრო ამბოხის გზაზე, ის არის არა რომელიმე მთავრობის, არამედ თავისი ქვეყნის უსაფრთხოების, ქვეყნის მომავლის, ჩვენი შვილების მტერი, დღეს საქართველოს პარლამენტმა შექმნა პრეცენდენტი, რომ შეგიძლია ღიად უღალატო შენს ქვეყანას, და შენ ეს ყველაფერი გეპატიება იმის გამო, რომ საქართველოში მთავრობა შეიცვალა. ეს არის ძალიან საშიში რამ, ჯერ-ჯერობით დიდი მწუხარებით მიხდება იმის კონსტანტირება რომ ამ პარლამენტმა ხალხს თავი დაამახსოვრა ორი რამით: პრეზერვატივებზე ბუსუსების აკრძალვით და პედოფილების და ჯაშუშების გარეთ გაშვებით . ეს არის სამარცხვინო და ვერ ვიხსენებ ასეთ პრეცენდენტს დამოუკიდებელობის შემდეგ ვერც ერთი პარლამენტის ისტორიაში.
ამას ვამბობ დიდი გულისტკივილით არა როგორც ქვეყნის პრეზიდენტი, არამედ როგორც ამ ქვეყნის მოქალაქე _ განაცხადა მიხეილ სააკაშვილმა საგანგებოდ გამართულ ბრიფინგზე, რომელიც პარლამენის მიერ ვეტოს დაძლევის საკითხს მიუძღვნა.
