“კრეატივ იმპრესსიონს კაუკასუსი”
“კრეატივ იმპრესსიონს კაუკასუსი” ბათუმის მერიის ტენდერებში გამარჯვებულთა შორის 2010 წელს ერთ-ერთი ლიდერი კომპანიაა. კომპანიამ ილია ჭავჭავაძის სახელობის დრამატული თეატრის ფასადის კაპიტალური შეკეთების სამუშაოები 951 671 ლარად განახორციელა. ცალკე ტენდერით შეიძინეს ოქროს ფურცლები, რომელიც ბათუმის ბიუჯეტს 129 ათასი ლარი დაუჯდა. თეატრის მოოქროვება კი 629 654 ლარი დაჯდა. იმავე კომპანიამ მოაპირკეთა თეატრის მიმდებარე სკვერის შადრევნიც, რისთვისაც მერიისაგან 35 ათას ლარამდე მიიღო.
“კრეატივ იმპრესსიონს კაუკასუსმა” შეიძინა ყვავილი “სურფინია”, რომლის შეძენაშიც მას 36 185 ლარი გადაუხადეს. ვერტიკალური გამწვანების კონტეინერებისა და ქოთნების შეძენისათვის კი ნახევარ მილიონამდე ლარი გადაერიცხა.
“კრეატივ იმპრესსიონს კაუკასუსი” მფლობელი სულხან გოგიბერიძეა. გოგიბერიძე პარალელურად ხელმძღვანელობს საფეხბურთო კლუბ “ბათუმის დინამოს”. “ბათუმის დინამო” მერიის მიერ დაარსებული კლუბია და მერიის მართვაშივე არის. გოგიბერიძეს ეკუთვნის ბათუმის ერთ-ერთი ყველაზე მსხვილი საკაბელო არხი “ერა”, რომელიც ბათუმის ცენტრალურ ნაწილში მცხოვრებ მოსახლეობას ემსახურება. საკაბელოს გოგიბერიძე პარტნიორ გია მეტრეველთან ერთად მართავს. მეტრეველი “კრეატივ იმპრესსიონს კაუკასუსის” ერთ-ერთი დამფუძნებელიცაა, თუმცა მოგვიანებით წილი გოგიბერიძის სასარგებლოდ დათმო.
სწორედ “კრეატივ იმპრესსიონს კაუკასუსმა” შეიძინა “ქალისა და მამაკაცის” ქანდაკება, რომელის მხოლოდ შეძენა 2 400 000 ლარი დაჯდა, ხოლო ქანდაკების სამონტაჟო სამუშაოები 269 929 ლარი.
კომპანიამ საკუთარ თავზე აიღო ფარნავაზ მეფის 25-ში მშენებარე კოშკზე შესრულებული სამუშაოები. 8 ტენდერში გაიმარჯვა და 3 549 ათასი ლარის სამუშაოები შეასრულა.
“აჭარგანათება”
2010 წელს შპს “აჭარგანათებას” ჯამში 10 მილიონ ლარამდე გადაურიცხეს. კომპანიის მიერ წადგენილი დოკუმენტებით თამარ მეფის დასახლებასა და ბარცხანის დასახლებას შორის სანაპირო ზოლის გარეგანათების სამუშაოების მილიონ 700 ათასი დაჯდა. 5 მარტს გაფორმებული ხელშეკრულებით 126 ცალი გარეგანათების ბოძი მილიონ ნახევარი ლარის ღირებულებისაა. ანუ თითოეული ბოძის ფასი დაახლოებით 12 ათას ლარამდე დაჯდა.
აპრილში კი დეკორატიული ბოძების სანათების შეძენა მერიას მილიონზე მეტი დაუჯდა. “აჭარგანათებამ” შეასრულა 77 ათას ლარად შუქნიშნების სამონტაჟო სამუშაოები.
“აჭარგანათების” დირექტორი ნიკოლოზ თიფურიძეა. თოფურიძის მამა თამაზ თოფურიძე ბათუმის საკრებულოს წევრი იყო. (თამაზ თოფურიძე 2012 წელს გარდაიცვალა). ნიკოლოზ თოფურიძე კი ქალაქის ყოფილი მერის რობერტ ჩხაიძის ნათლულია. ბათუმის მერიის ტენდერებში გარეგანათებების სამუშაოების შესრულებაში “აჭარგანათება” ერთადერთი კომპანიაა, რომელიც მსგავს ტენდერებში იმარჯვებს.
სამშენებლო კომპანიები
სამშენებლო კომპანია “ფიროსმანმა” 2010 წელს 5,5 მილიონ ლარზე მეტი ღირებულების ტენდერები მოიგო. შპს “ფიროსმანს” საკრებულოს წევრი, არჩევნებში მონაწილეობის მიღებამდე ხელმძღვანელობდა. მას კომპანიის 33% ეკუთვნის, ხოლო ასევე 33% ეკუთვნის რევაზ არძენაძეს, ქედის რაიონის მაჟორიტარს უმაღლეს საბჭოში. ორივე მათგანი “ერთიანი ნაციონალური მოძრაობის” სიით მოხვდენენ საკრებულოსა თუ უმაღლეს საბჭოში.
მერიის კიდევ ერთი ფავორიტი კომპანია, რომელმაც 2010 წელს მერიის 6 ტენდერი მოიგო უმაღლესი საბჭოს წინა მოწვევის წევრს, “ნაციონალური მოძრაობიდან” ზაზა გოგოტიშვილს ეკუთვნის. “ანაგმა” ექვს ტენდერში ჯამში 2,5 მილიონი მიიღო. “ანაგი” გოგოტიშვილის მეუღლია ნანა აროშიძის სახელზეა რეგისტრირებული.
2,5 მილიონი ღირებულების ტენდერებში გაიმარჯვა შპს “ზიმო”-მ. კომპანიამ 2010 წლის არჩევნებზე “ნაციონალურ მოძრაობას” 50 ათასი ლარიც შეწირა. აღნიშნული კომპანია „ნაცმოძრაობის“ შემომწირველი 2012 წელსაც იყო. მსხვილი შეკვეთები მიიღო შპს “გზა”-მ. არაოფიციალურად, კომპანია ლევან ვარშალომიძის ძმის, ირაკლი ვარშალომიძის საკუთრებაშია.
სამუშაოების შესრულებისათვის ხუთ ტენდერში 4 მილიონ ლარზე მეტი მიიღო წინა საქართველოს პარლამენტის წინა მოწვევის ნაციონალი დეპუტატის ასლან თავდგირიძის ძმის კომპანია “ხინომ”. კომპანია იმავე წელს დაფუძნდა და ტენდერებშიც აქტიურად იღებდა მონაწილეობას.
