გარდა ამისა, მიმდინარე სასწავლო წლიდან “მომავლის” ანგარიშზე თითოეული ბავშვის მშობელს ყოველთვიურად 10 ლარი შეაქვს, რაც როგორც მუნიციპალიტეტის საფინანსო სამსახურში გვითხრეს, წელიწადში 40 000 ლარამდე ადის. ხელისუფლება ამბობს, რომ ეს ის დაწესებულებაა, რომლის განვითარებაზე დიდ ყურადღებას ამახვილებს და სწორედ ამიტომ აქვს დიდი ბიუჯეტი, რომელზეც “ქამრის შემოჭერის” პრინციპი არ ვრცელდება. ამავე მიზეზით, გასული წლის ზაფხულში, ადგილობრივი ბიუჯეტიდან გამოყოფილი 80 000 ლარით, 3 საბავშვო ბაღს (დაბა ჩოხატაურში) ბუნებრივი აირი შეუყვანეს. ხელისუფლებას არც ამ თემის გაპიარება დავიწყებია და ჯერ კიდევ აგვისტოში, ჟურნალისტებს განუცხადეს, რომ #1 საბავშვო ბაღს, #2 ბაგა-ბაღს და #3 საბავშვო ბაღს ზამთარში გათბობის პრობლემა არ ექნებოდათ. ყველაზე საოცარი ის იყო, რომ გაზის ამ ზამთარში ჩართვას #3 საბავშვო ბაღშიც გვპირდებოდნენ, არადა, იმ ქუჩაზე გაზის მილი არც კი გადის! მართალია შენობაში გაზი დამონტაჟებულია, თუმცა, როგორც “სოკარ ჯორჯიაში” აცხადებენ, მისი ჩართვის პერსპექტივა ცოტა შორია. რაც შეეხება დანარჩენ ორ ბაღს, მიუხედავად იმისა, რომ გაზის მილებიც არის და მიმდებარე ტერიტორიაზე განთავსებულ დაწესებულებებს ბუნებრივი აირიც მიეწოდებათ, გაზი არ ჩაურთეს. უფრო მეტიც, საბავშვო ბაღის საძინებლები, პრაქტიკულად, გათბობის გარეშეა დარჩენილი, რადგან შეშის ერთი ღუმელი ორ დიდ ოთახს კარგად რომ ვერ ათბობს, ამაში თავად დავრწმუნდით.
ჩოხატაურის მუნიციპალიტეტის გამგებლის, გია გიორგაძის თქმით, გათბობის ჩაურთველობა ფანჯრების ბრალია:
_ როგორც გვითხრეს, ფანჯრები ძალიან ძველია, ქარი შედის და ოთახები არ თბება, გამოსაცვლელია. “მომავლის” ხელმძღვანელმა მოგვმართა თხოვნით, რომ გამოგვეცვალა და მხოლოდ შემდეგ ჩაგვერთო გაზი. ამინდების დადგომისთანავე კაპიტალური რემონტი ჩაუტარდება #1 ბაღს, იგეგმება სხვა ბაღების რემონტიც. მომავალ წელს ორივე ბაღში გაზი აუცილებლად ჩაირთვება, _ გვითხრა გიორგაძემ, რომელსაც, თურმე, ფანჯრების სიძველის შესახებ ინფორმაცია მხოლოდ გადმოცემით ჰქონია.
ბაღებში შექმნილი ამ პრობლემის შესახებ, საკრებულოს სოციალურმა კომისიამ ზედამხედველობის სამსახურს უკვე მიწერა და სიტუაციაში გარკვევაც სთხოვა. ზედამხედველობის სამსახურმა სიტუაცია ადგილზევე შეამოწმა და გადმოცემის მიხედვით, აღწერა.
_ ჩვენ არ ვართ გაზის სპეციალისტები, რომ დეტალებზე გესაუბროთ. ბაღების გაერთიანების ხელმძღვანელმა გვითხრა, რომ გაყვანილობებს ნაწილები აკლია, რომლის გარეშეც გაზი ვერ ჩაირთვება. ჩვენც ამ ნათქვამის შესაბამისად მივწერეთ საკრებულოს სოციალურ კომისიას, _ აღნიშნა ჩვენთან საუბრისას ზედამხედველობის სამსახურის უფროსმა, ზაალ ბერძენიშვილმა.
სააღმზრდელო დაწესებულება “მომავლის” ხელმძღვანელი, ნინო ბარამიძე “გურია ნიუსთან” საუბრისას ამბობს, რომ გათბობა მეტალოპლასტმასის ფანჯრების ჩასმის შემდეგ ჩაირთვება:
_ ბუნებრივი აირის შემოყვანა ბაღებში ზაფხულში მოხდა. თუკი იცოდით, რომ ზამთარში ფანჯრები პრობლემას შექმნიდა, რატომ არაფერი მოიმოქმედეთ? უმჯობესი არ იყო, ჯერ ფანჯრები შეგეცვალათ და გაზის შემოყვანაზე მერე გეზრუნათ?
_ მე ვერაფერს გეტყვით მაგაზე.
_ როდესაც ეს ამბავი მოვიკითხეთ, ორი სხვადასხვა პასუხი მივიღეთ: ერთი ოფიციალური ინფორმაციით ბაღებში გაზი ფარღალალა ფანჯრების გამო არ იყო ჩართული, მეორე, ასევე ოფიციალური ინფორმაციით კი, გაყვანილობას ნაწილები აკლია… რომელია მართალი?
_ ფანჯრებიც არ არის. როგორც გვითხრეს, რაღაც მოტორი აკლია. უნდოდათ გაკეთება, მაგრამ იანვარმა მოუსწრო (საინტერესოა, როგორ “მოუსწრო” აგვისტოს იანვარმა! ნ.გ). წელს ბაღების რემონტები იგეგმება და ეს პრობლემაც მოიხსნება, _ გვითხრა ბარამიძემ.
ექიმი პედიატრის, ვახტანგ გაჩეჩილაძის თქმით, გართულებული ვირუსების ფონზე, ეს პრობლემა ბავშვების ჯანმრთელობას უფრო მეტ საფრთხეს უქმნის.
_ არავითარ შემთხვევაში არ არის გამართლებული, როცა სხვადასხვა ასაკობრივი ჯგუფის ბავშვები ერთად არიან თავმოყრილი. ეს ძირითადად მაშინ ხდება, როდესაც დაწესებულებაში სისტემური გათბობა არ არის და პედაგოგები ბავშვების ერთ ოთახში თავმოყრას ცდილობენ. როგორც ვიცი, თებერვლის დღეებში ასე ხდებოდა თითქმის ყველა ბაღში. გარდა ამისა, ბავშვის ცხელი ოთახიდან ცივ ოთახში გაყვანა (სამყოფი ოთახიდან საძინებელში გაყვანას ვგულისხმობ) ბავშვის გაციების და ვირუსის გავრცელების ალბათობას ბევრად ზრდის. მით უმეტეს, ახლა ქვეყანაში მძიმე ვირუსული ფონია, არსებობს ე.წ. ღორის გრიპის გავრცელების საშიშროება. ჩვენ ყველანაირი ზომა უნდა მივიღოთ საშიშროების თავიდან ასაცილებლად. განსაკუთრებული ყურადღება უნდა მიექცეს ისეთ ასაკობრივ ჯგუფებს, როგორიც ბაგა-ბაღების კონტინგენტია. ამაზე ხელისუფლებამ უნდა იზრუნოს და პრიორიტეტი ბაღების სათანადო აღჭურვა უნდა გახდეს. გარეგანი ფასადების მოწესრიგებას სჯობს, რომ მომავალ თაობაზე უფრო მეტი ვიფიქროთ და მათი ჯანმრთელობისთვის ყველაფერი გავაკეთოთ, _ თქვა გაჩეჩილაძემ.
ნინო ბარამიძე ამბობს რომ სხვადასხვა ასაკის ბავშვები ერთ ჯგუფში არ არიან:
_ ქალბატონო ნინო, როგორც ექიმებმა გვითხრეს, სხვადასხვა ასაკობრივი ჯგუფის ბავშვების ერთად ყოფნა ვირუსის გავრცელების საშიშროებას აძლიერებს…
_ ეგ სად ხდებოდა, ჩვენთან ეგეთი რამ არ იყო.
_ თებერვალში, ქალბატონო ნინო, ჯგუფები გაერთიანებული იყო…
_ როცა მთელ ბაღში 10 ბავშვია სულ, სხვა გზა არ არის.
_ როგორც მშობლებმა გვითხრეს, გასულ თვეში ბავშვები შიშით ვერ ატარებენ… ვირუსის ეშინოდათ….
_ ბავშვები ახლაც არ დადიან.
_ ბევრ მშობელს შვილის ბაღში მიყვანის ეშინია, რადგან არცერთ საძინებელში გათბობა არ არის. არც შეშის და არც ელექტროღუმელი… თქვენ, როგორც ხელმძღვანელმა, ეს საკითხი თუ დააყენეთ ზემდგომებთან?
_ ყველა საქმის კურსშია და ყველაფერი მომავლიდან მოწესრიგდება.
_ ჩვენ გვითხრეს რომ არანაირი ოფიციალური განაცხადი თქვენი მხრიდან არც გამგეობაში და არც საკრებულოში არ შესულა…
_ ოფიციალური რა, კომისია იყო გამოყოფილი. ჩამოწერილია ის, რაც გვჭირდება. ბიუჯეტში გათვალისწინებულია და შევიძენთ. სითბოს პრობლემა არცერთ ბაღში ნამდვილად არ შექმნილა, _ დააზუსტა ბარამიძემ.
ფაქტი ერთია: გამგეობაში დევს მიღება-ჩაბარების აქტი, სადაც წერია, რომ საბავშვო ბაღებში გაზი შეყვანილია. თუმცა, როგორც ზემოთ აღნიშნეთ, ეს მხოლოდ ქაღალდზეა ასე _ ბუნებრივი აირით ვერცერთი ბაღი ვერ სარგებლობს. დიდი დაინტერესების მიუხედავად, ვერ მივიღეთ პასუხი კითხვაზე, რატომ დაამონტაჟეს გაზგაყვანილობა #3 ბაღში, როცა ამის არანაირი ტექნიკური პირობა არ არსებობდა?! ერთი დეტალიც _ თუ ბავშვები კვირეების განმავლობაში არ დადიან საბავშვო ბაღში და რამდენიმე ჯგუფში მხოლოდ 10-მდე ბავშვი გროვდება, რაში იხარჯება ნახევარმილიონიანი ბიუჯეტი და რატომაა აუცილებელი მშობლებმაც უკანასკნელი ლარები ბავშვების კვებისთვის “შეაწიონ სახელმწიფოს”?!
აღსანიშნავია ისიც, რომ ჩოხატაურში რამდენიმე დღეში ორი საბავშვო ბაღი გაიხსნება _ კოხნარში და საჭამიასერში. სექტემბრიდან ფუნქციონირებას დაიწყებს ჩაისუბნის საბავშვო ბაღიც. ჯერჯერობით არ არის ცნობილი რა თანხა გაიცა ამისთვის ადგილობრივი ბიუჯეტიდან. თუმცა ცნობილია, რომ მიუხედავად 70 მშობლის მოთხოვნისა, საბავშვო ბაღს, უფულობის მიზეზით, არ ხსნიან ზოტში.
