საბოლოო სიტყვა კი, მაინც ლანჩხუთის საკრებულოს ეკუთვნის. მხოლოდ საკრებულოს აქვს უფლება დაამტკიცოს ან დაბლოკოს კომისიის მიერ შერჩეული კანდიდატი.
“გურია ნიუსს” ადგილობრივ, ყოფილ და მოქმედ სამთავრობო წრეებთან დაახლოებული პირი დაუკავშირდა, რომელსაც ანონიმად სურს დარჩენა, მაგრამ მზადაა კულუარებში მიმდინარე ბევრ მოვლენას ახადოს ფარდა.
მისი განცხადებით, საკრებულო კომისიის მიერ გამარჯვებულად გამოცხადებულ კანდიდატს უარს არ ეტყვის, რადგან სამთავრობო წრეებში მიაჩნიათ, რომ კომისიაც და საკრებულოც ექს- გამგბლის გიორგი გოგუაძის ხალხითაა დაკომპლექტებული. ამას ღიად აცხადებს ლანჩხუთელ “რესპუბლიკელთა” ლიდერი რომან ბიწაძეც. მან კომისიის დატოვების მიზეზად ის დაასახელა, რომ “გოგუაძის კომისიაში მისი ადგილი არ იყო”.
გამგეობის წინ მიმდინარე აქციაზე ახალი პლაკატებიც გამოფინეს: “ძირს გოგუაძის ფარსი კომისია“ და “არა ფარულ და მაფიოზურ გარიგებებს!“
ბიწაძემ, ბოლო მომენტში, განცხადება შეიტანა და გამგებლობის ერთ-ერთი კანდიდატი გახდა. “მაინტერესებს, რა მიზეზით მეტყვიან უარს. რით მაჯობებს რომელიმე კანდიდატი _ განათლებით, გამოცდილებით, თუ პროფესიონალიზმით?“ _ ასე ხსნის ბიწაძე კონკურსში მონაწილეობას და იქვე დასძენს, რომ მისმა კანდიდატურამ კომისიაში დაბნეულობა შეიტანა.
არის კიდევ 4 კანდიდატი, რომელთაგან 2 ლანჩხუთელია _ აპოლონ წილოსანი და ზაზა ურუშაძე. დანარჩენ ორს _ აბაშელ ქალბატონს და მსურველს აჭარიდან, შანსი თითქმის არ აქვთ. რაც შეეხება წილოსანს, არსებულ ვითარებაში არც მას აქვს შანსი, თუმცა თავად ასე არ ფიქრობს და დარწმუნებულია, რომ კომისია მასზე შეაჩერებს არჩევანს.
როგორც ჩვენი ანონიმი რესპონდენტი ამბობს, ყველაზე რეალური ზაზა ურუშაძის კანდიდატურაა. მას მხარს მაჟორიტარი დეპუტატი თემურ ჩხაიძე უჭერს. თუმცა, საჭიროა კომისიისა და საკრებულოს მხარდაჭერაც.
ჩვენი წყაროს ინფორმაციით, გიორგი გოგუაძე ურუშაძის გაყვანის სანაცვლოდ, თემურ ჩხაიძეს საფეხბურთო კლუბ “გურიას“ დირექტორობას მოთხოვს. ეს იქნება “ლანჩხუთური კოჰაბიტაცია”, თუმცა არ იქნება იოლად შესასრულებელი _ ამბობს ანონიმი წყარო. ამის მიზეზად კი, ის შემდეგ გარემოებებს ასახელებს: კლუბი ამჟამად პირველ ადგილზეა და საკადრო ცვლილებით მაჟორიტარი რისკზე უნდა წავიდეს. გასულ წელსაც კარგი შანსი ჰქონდა “გურიას“, მაგრამ უმაღლეს ლიგაში ვერ გადავიდა. წელსაც იგივე რომ მოხდეს, პასუხისმგებლობა დეპუტატს დაეკისრება; და მთავარი _ ლანჩხუთში ისედაც ბევრს საუბრობენ გოგუაძე-ჩხაიძის ალიანსზე, რასაც მაჟორიტარი დეპუტატი უარყოფს.
ექს გამგებლის პოლიტიკურ-საფეხბურთო რეაბილიტაციით, ჩხაიძე ოპონენტებს, რომლებიც საკუთარ თანამებრძოლებშიც მოუმრავლდა ბოლო დროს, ზემოთ ნათქვამი ჭორის ღიად დადასტურების საფუძველს მისცემს, ეს კი მას არ უნდა “აწყობდეს”. რამდენად წავა, თუნდაც გამგებლობის კანდიდატის მხარდაჭერის სანაცვლოდ თემურ ჩხაიძე ასეთ შეთანხმებაზე, ეს მალე გამოჩნდება.
ზემოთ აღნიშნულთან დაკავშირებით, გიორგი გოგუაძეს დავუკავშირდით, რომელმაც სატელეფონო საუბარში ეს ინფორმაცია არ დაადასტურა. იგი “გურიას“ მიმართ საკუთარ ინტერესებს არ უარყოფს, მაგრამ კლუბის დირექტორობის სურვილის გამჟღავნებისგან თავს იკავებს.
ამ საკითხთან დაკავშირებით, შევეცადეთ მაჟორიტარი დეპუტატის პოზიციაც დაგვეფიქსირებინა, მაგრამ სადღესასწაულო დღეებში მასთან დაკავშირება შეუძლებელი აღმოჩნდა. ჩვენ აუცილებლად გაგაცნობთ დეპუტატის პოზიციას ამ საკითხთან დაკავშირებით.
