აბაშელებმა საკრებულოს შენობაში შესვლა, მხოლოდ ჟურნალისტების მისვლის შემდეგ შეძლეს. თუმცა, ერთი საათის დაგვიანებით დაწყებულ საპრეტენზიო კომისიის სხდომაზე, რომელიც კანონის თანახმად საჯაროა, ისინი არ დაასწრეს. სხდომა ნაადრევად დატოვეს კომისიის თავმჯდომარის მოადგილემ, ზურაბ რუსიამ და მერაბ მიგინეიშვილმა.
_ სხდომა აბსოლუტურად დარღვევებით მიმდინარეობს, კენჭისყრა უკვე დასრულდა და 4 ხმით ისევ გოჩა ჭანტურია დარჩა კანდიდატად. კომისიის წევრები გვერდით ოთახში ჰყავდათ გაყვანილი, კენჭისყრის დროს კი არც ზურაბ მხეიძის და არც დავით კაჭარავას ტელეფონები არ გაჩერებულა. აშკარა იყო, რომ ყველა “დავერბოვკებული” იყო. თუმცა, კომისიის თავმჯდომარე ზურაბ მხეიძე და 3 წევრი _ ჯილდა ცომაია, მეორე საჯარო სკოლის დირექტორი, ბადრი ქობალავა, კლინიკის მენეჯერი და გელა თოფურია, ფრაქცია „დემოკრატების“ ლიდერი “ნაციონალები” არიან და ვინ წავიდოდა კომისიის გადაწყვეტილების წინააღმდეგ?!. _ აღნიშნა ჩვენთან საუბრისას ზურაბ რუსიამ.
_ გუშინდელი დღიდან ვითხოვთ, გოჩა ჭანტურიამ წარმოადგინოს სამოქმედო პროგრამა, თუმცა ეს ვერ შეძლო. ამ დილით, კი კომისიის სხდომაზე მოიტანეს რაღაც სამოქმედო გეგმა, რომელიც ხელმოუწერელია და გაგვიცხადეს, რომ ეს არის ის გეგმა და ასე რომ, ოქმიც უგულებელყოფილად ცნეს. ოთახში საკრებულოს და გამგეობის თანამშრომლებიც იყვნენ, აქვე იყო სახეშეცვლილი ნაციონალური ფრაქციის, ამჟამად “დემოკრატიული საქართველოს“ თავმჯდომარე, ირაკლი გაბუნიაც. რატომ იყვნენ ისინი კომისიის გადაწყვეტილების მიღებისას? რატომ მიიღო გადაწყვეტილება წინა კომისიის თავმჯდომარემ, დათო კაჭარავამ? მან ხომ აშკარად განაცხადა გუშინ, მე ჩემი საქმე გავაკეთე და ახლა აღარაფერი მეხებაო? დაავიწყდა კაჭარავას, სწორედ “ნაციონალებმა” რომ მიაბრძანეს ციხეში ვარდების რევოლუციის შემდეგ? დაავიწყდა, არავინ რომ არ ეუბნებოდა გამარჯობას? მაგრამ გაიხსენებს, ისე, როგორც ადრე, ფოსტის უფროსად ყოფნის დროს, ფინანსურმა პოლიციამ დარღვევები რომ აღმოუჩინა და ციხეში მიაბრძანა, ასე იქნება ახლაც. ფინანსური პოლიციის შესვლისას და ვიმედოვნებთ, რომ ეს ძალიან მალე მოხდება, _ გვითხრა მერაბ მიგინეიშვილმა.
საკრებულოს ფოიეში აქციის მონაწილეებს შეუერთდა 2007 წელს მოკლული ზვიად ნოდიას დედა, ლალი ნოდია, რომელიც აცხადებს, რომ მისი შვილის მკვლელი სწორედ აბაშის მაჟორიტარი _ დავით დარცმელიძეა და კომისიის წევრებს მოუწოდებდა, არ დაეჭირათ მხარი მკვლელისთვის და სამართლიანი გადაწყვეტილება მიეღოთ.
აბაშელებთან დღესაც მოვიდა „დაიცავი საქართველოს“ ლიდერი, კახა მიქაია. მისი თქმით, დღევანდელი დღე დანაშაულია ამ ადამიანების მიმართ და საჭიროა, დაისაჯოს ყველა ის პირი, რომელმაც თავის უფლებამოსილებას გადაამეტა. მიქაიას თქმით, დავით კაჭარავამ უკვე რამდენჯერმე დაარღვია კანონი.
_ ამ ადამიანების მოთხოვნა სამართლიანია და რაც მთავარია, აქცია მშვიდობიანად მიმდინარეობს. არ არის საჭირო სურათის გამუქება და ამ ხალხზე ათასი სიბინძურის დაბრალება. მე მათ სოლიდარობას ვუცხადებ _ დასძინა კახა მიქაიამ.
სხდომის დამთავრების შემდეგ კომისიის წევრები ისევ ოთახში იყვნენ ჩაკეტილები, იმ დერეფანში არავის უშვებდნენ, თუმცა ყველამ კარგად დაინახა, როგორ შევიდა იმ ოთახში კიდევ ერთი კანდიდატი, ზურაბ ლომია, რამაც ხალხის გაღიზიანება გამოიწვია.
აქციის მონაწილეები დაშლას არ აპირებენ. როგორც ამბობენ, შემდეგი ნაბიჯი სასამართლოში სარჩელის შეტანა იქნება. მანამდე კი არ მისცემენ საკრებულოს სხდომის ჩატარების უფლებას.
_ ჩვენ დავაჩქარებთ სარჩელის მომზადებას და სასამართლოში შევიტანთ. თუმცა, აღარც სასამართლოს იმედი გვაქვს, რადგან იქაც ახალაია-დარცმელიძის გავლენის ქვეშ მოქცეული ჩინოვნიკები არიან. წარმოგიდგენიათ? გოჩა ჭანტურია აცხადებს, რომ მას მხარს ქართულ ოცნებაზე გავლენიანი პიროვნება უჭერს. ის ახლა არაფრად აგდებს საზოგადოებრივ აზრს და გამგებლად რომ მოვიდეს, მაშინ რაღას იზამს. ჩვენ არ დავიშლებით და აუცილებლად მივაღწევთ კანონიერებას, _ გვითხრა ადვოკატმა, როლანდ შონიამ.
აქციის მონაწილეებს სხვადასხვა სოფლებიდან კიდევ შეუერთდნენ ადამიანები. აქცია გრძელდება. მოთხოვნებს ახლა კიდევ ერთი დაემატა _ გადადგეს საკრებულოს თავმჯდომარე თავისი გუნდით.
