წულუკიანმა ეს განცხადება დღეს უზენაესი სასამართლოს თავმჯდომარის განცხადების საპასუხოდ გააკეთა.
”მე ვთქვი, რომ სასამართლო რეფორმა მაინც ჩატარდება და ეს შემიძლია მრავალჯერ გავიმეორო, მიუხედავად იმისა როგორი არ უნდა იყოს ჩემზე და ჩემს ოჯახზე თავდასხმა, პირიქით ეს თავდასხმები კიდევ უფრო მააქტიურებს და ხელს მიწყობს ,რომ რეფორმა მივიყვანო ბოლომდე. რაც შეეხება კუბლაშვილის განცხადებას,მას ალბათ ახსოვს რომ მე სულ რამდენიმე თვის წინ ძალიან კარგად და წარმატებით ავიხდინე ჩემი ”ქართული ოცნება ”ნაძალადევში და ჩემი მომდევნო ქართული ოცნებაა სასამართლო რეფორმა, რომელსაც აგრეთვე ავიხდენ. მე კუბლაშვილს ვპირდები რომ ის აღარ იქნება ყველა რგოლის მაკონტროლებელი”-განაცხადა იუსტიციის მინისტრმა თეა წულუკიანმა.
უზენაესი სასამართლოს თავმჯდომარე დღეს წულუკიანისა და დავით საგანელიძის გუშინდელ განცხადებებს გამოეხმაურა და აღნიშნა, რომ ”მათ ოცნებებს ახდენა არ უწერია”
“მათ ოცნებებს ახდენა არ უწერია. ის, რომ ისინი არ ენდობიან სასამართლოს, ჩვენთვის არ არის მნიშვნელოვანი. მთავარია, გვენდობოდეს ხალხი და არა – რომელიმე პოლიტიკური ჯგუფი და მინისტრი. ესაა ჩემი პასუხი ყველა იმ პოლიტიკურ გამოხდომაზე, რასაც ბოლო პერიოდში აქვს ადგილი. ასეთი გამოხდომებით სასამართლოში ვერავინ ვერაფერს მიაღწევს”, – განაცხადა კოტე კუბლაშვილმა.
უზენაესის სასამართლოს თავმჯდომარე ხელისუფლებას პროკურატურის კვალიფიციური კადრებით დაკომპლექტებას ურჩევს.
“თუ მათ სურთ, სასამართლოდან მიიღონ ისეთი გადაწყვეტილებები, რომლებიც მათთვის სასურველია, ამისთვის ერთადერთი რამის გაკეთებაა საჭირო – კარგად უნდა მოამზადონ კადრები და დასაბუთებული პოზიციები მიიტანონ სასამართლოში. იქ კი მოგეხსენებათ, რომ ყველა საქმეზე მოქმედებს შეჯიბრობითობის პრინციპი. მოსამართლეს მხოლოდ შეჯიბრებითობის საფუძველზე გამოაქვს შესაბამისი გადაწვეტილება. შეჯიბრობითობა ნიშნავს დაცვისა და ბრალდების კვალიფიკაციაზე დაყრდნობით მიღებულ გადაწყვეტილებას. ეს მარტივია და ამ გზაზე ჩვენ 2010 წლიდან დავდექით, როცა ახალი სისხლის სამართლის საპროცესო კოდექსი იყო მიღებული”, – აღნიშნა კუბლაშვილმა.
