“რამდენიმე დღის წინ დამიძახა პრეზიდენტმა და ეს თანამდებობა შემომთავაზა, ჩვენ ამაზე ვისაუბრეთ და პრეზიდენტისაგან მივიღე კონკრეტული დავალებები,”_ ამბობს ხათუნა ოჩიაური.
_ რეგიონებში მიმდინარე რთული პოლიტიკური პროცესების გათვალისწინებით, როგორ აპირებთ დაკისრებული მოვალეობის შესრულებას?
_ ეს არ იქნება იოლი გზა და დღევანდელი მდგომარეობის გათვალისწინებით ვფიქრობ, რომ ეს იქნება დიდი გამოწვევა, მაგრამ დიდი პასუხისმგებლობაა ჩემზე, დიდი ნდობა მაქვს გამოცხადებული და ყველაფერს გავაკეთებ იმისთვის, რომ გუბერნატორის ფუნქციები აღვასრულო. ეს ფუნქცია კი არის ერთგვარი შუამავლის როლის შესრულება ხალხსა და პრეზიდენტს შორის და ხალხის პრობლემების კიდევ უფრო ახლოს გაცნობა, ასევე დახმარება მათი პრობლემატიკის გადაწყვეტაში. ამ მიმართულებით მე ვიქნები ძალიან აქტიური და ყველაფერს გავაკეთებ იმისათვის, რომ ზამთარშიც და შემდეგაც, იმ ხალხს, რომელიც ცხოვრობს მთაში, ძალიან რთულ პირობებში, შევუმსუბუქო ცხოვრება. პრობლემების მოგვარებას ადგილობრივ თვითმმართველობასთან ერთად შევეცდები.
_ ადგილობრივ თვითმმართველობებში, უმრავლესობას “ქართული ოცნება” შეადგენს. გაქვთ რაიმე კონკრეტული გეგმა მათთან თანამშრომლობისთვის?
_ კიდევ ერთხელ ვამბობ, რა თქმა უნდა, ეს არ იქნება იოლი გზა, მაგრამ მე ყველაფერს გავაკეთებ. ჩემთვის მთავარი იქნება ის საქმე, რომელიც იქ დამხვდება გასაკეთებელი.
_ რწმუნებულის თანამდებობაზე წარდგენისას, პრეზიდენტმა თქვენი გამოცდილება ახსენა, რა გამოცდილება გაქვთ ადმინისტრირებაში?
_ დიახ, კონკრეტულად პრეზიდენტმა ახსენა ჩემი პოლიტიკური გამოცდილება, მე ვიყავი თბილისის საკრებულოს წევრი, შემდეგ პარლამენტის წევრი და სწორედ ამ გამოცდილებაზე საუბრობდა პრეზიდენტი.
_ ადგილობრივებისგან მხარდაჭერას ელით?
_ მე მგონია, რომ ჩვენ ხალხის გულებთან მისასვლელ გზას ვნახავთ. რა თქმა უნდა, იქ დამხვდება ისეთი ხალხი, ვინც მხარდაჭერას გამომიცხადებს და ისეთი, რომელიც ჩემი წინააღმდეგი იქნება. ეს ნორმალური პროცესია, რადგან დემოკრატიული ქვეყანაა, ყველას აქვს პოზიციის დაფიქსირების უფლება. ჩემთვის მთავარია ის საქმე, რომელიც უნდა გაკეთდეს და არა ხალხის პოლიტიკური შეხედულებები.
_ გეგმავთ საკადრო ცვლილებებს?
_ საკადრო ცვლილელებებზე ჯერ არ მიფიქრია, არა მგონია.
