ახალი გამგებლის გოჩა ჭანტურიას მხარდასაჭერ აქციაზე მისული ადამიანები საკმაო აგრესიულობით გამოირჩეოდნენ განსხვავებული აზრის მქონე ადამიანების მიმართ. მოშიმშილეების მხარდამჭერი ანზორ ბარბაქაძე სურათებს იღებდა, მას არა ერთმა ადამიანმა უთხრა, რომ დაეტოვებინა ტერიტორია, წინააღმდეგ შემთხვევაში საკადრის პასუხს მიიღებდა.
ანზორ ბარბაქაძე: “სურათებს ვიღებდი. უცებ ჩემთან მოვიდა სამი ადამიანი, ერთ-ერთი გამგეობის თანამშრომელი აპოლონ ლაბარტყავა ვიცანი, დანარჩენი ორი არ ვიცი, ვინაა. ეს აპო აქტიურობდა და დიდი აგრესიით გამოირჩეოდა _ წადი, ბიჭო, აქედან და ნუ იღებ სურათებს, თორემ ამ ფოტოაპარატს თავზე დაგაფშვნიო. მე არ მივაქციე ყურადღება და ისევ გავაგრძელე სურათების გადაღება. მან ისევ იგივე გამიმეორა და ჩემსკენაც გამოიწია, მაგრამ იმ ორმა შეაჩერეს და გაიყვანეს.”
“ზეწოლას, აგრესიას და დაშინებას ქართველმა ხალხმა განაჩენი 1 ოქტომბერს გამოუტანა, ასე რომ, უკან, წარსულში დაბრუნება დანაშაული იქნება ქართველი საზოგადოების წინაშე და ამაზე ყველამ პასუხი უნდა აგოს, – ამბობს ნაირა ბენიძე, – მე არც სკამი მინდა და არც თანამდებობა, მე აფხაზეთის ომის მებრძოლი ვარ და იმ დღეებიდან მოყოლებული, ყოველთვის ვცდილობ სამართლიანობის გვერდით ვიდგე. გოჩა ჭანტურიას მხარდასაჭერ აქციაზე ხალხს რომ ვუყურებდი, დრო ამერია _ ასე მეგონა წინასაარჩევნო პერიოდი იყო. იგივე ადამიანები, ისეთივე აგრესია და ცინიზმი. მე პირადად თავი შეურაცხყოფილად ვიგრძენი, როცა ამ ადამიანების მიერ წინასაარჩევნო პერიოდში ჩადენილი უკანონობა და დანაშაულები გამახსენდა. დიახ, სწორედ ჩვენ ვართ ახლა დამნაშავეები, ეს ადამიანები კიდევ თბილ ოთახებში და სკამებზე რომ სხედან. ისინი ხომ ის საჯარო მოხელეები იყვნენ, რომლებმაც გადაამეტეს უფლებამოსილებას. სწორედ ამიტომ არ შევწყვეტთ ბრძოლას და სულ მალე ყველა სიმართლეს გაიგებს”.
საკრებულოში კი უკვე მე-6 დღეა 6 ქალბატონი შიმშილობს…
