“დანიშვნის დღიდან სისტემის დეპოლიტიზაციაზე ვსაუბრობდი, რაც გულისმოხბს იმას, რომ ძალოვანი სტრუქტურების ნაცვლად შეიქმნება დამოუკიდებელი და მიუკერძოებელი სამართალდამცავი სტრუქტურები. შსს ჩამოყალიბდება საზოგადოებაზე ორიენტირებულ ორგანიზაციად, რომლის მიზანი მოქალაქის უფლებების დაცვა იქნება.
ორი სიტყვით შევეხებით სამინისტროს რესტრუქტურიზაციას. გავაუქმეთ ცნობილი კონსტიტუციური უსაფრთხოების დეპარტამენტი ე.წ. “კუდი” და “სოდი”, რომელიც ბოლო წლების განმავლობაში, სამწუხაროდ პოლიტიკური რეპრესიის მანქანად გადაიქცა. მათი ძირითადი ფუნქცია და მოვალეობა იყო საკუთარი მოქალაქეების დევნა, ტერორი, დაშინება და ა.შ. “კუდის” ბაზაზე შევქმენით ანტიკორუფციული სახელმწიფო უსაფრთხოების სააგენტო. უფრო თანამედროვე, დასავლური ტიპის სააგენტოები, რითაც საბოლოოდ გაიმიჯნა აქამდე პოლიციისა და უსაფრთხოების აღრეული ფუნქციები.
ანტიკორუფციული სააგენტო განახორციელებს სამოხელეო კორუფციული დანაშაულის წინააღმდეგ ბრძოლას, ხოლო სახელმწიფო უსაფრთხოების სააგენტო უზრუნველყოფს ქვეყნის საფრთხეების პროგნოზირებას და სახელმწიფოს წინააღმდეგ მიმართული დანაშაულის აღმოფხვრას. ძალიან ვამაყობთ კიდევ ერთი ქმნილებით, როგორიც არის რეფორმების და განვითარების საგენტო, რომელიც უშუალოდ შეიქმნა და მუშაობდა ამ დოკუმენტზე. ჩვენი ინსტრუქციების თანახმად, შსს სისტემაში პოლიტიკის დაგეგმვის პროცესების ინსტიტუციონალიზაციის რეფორმების განხორციელების და მათზე მონიტორინგის კოორდინაციის მიზნით, შეიქმნა ხსენებული რეფორმების და განვითარების სააგენტო.
ჩვენი მიზანია საზოგადოებაზე ორიენტირებული პოლიციის ჩამოყალიბება. სიმშვიდის, წესრიგის და უსაფრთხოების შენარჩუნების მიზნით, პოლიცია თავის საქმიანობას საზოგადებასთან პარტნიორობის გზით განახორციელებს.”– აღნიშნა სტუდენტებთან შეხვედრის დროს ღარიბაშვილმა.
