“მოხარულნი ვართ, რომ პატრიარქის აღსაყდრებიდან 35 და დაბადებიდან 80 წლის იუბილის აღსანიშნავად, საქართველოში ასეთი მაღალი რანგის დელეგაციის წარმომადგენლები ჩამოვიდნენ სხვადასხვა ქვეყნების საპატრიარქოებიდან. განსაკუთრებით კი მოხარულნი ვართ, რომ აქ მსოფლიო პატრიარქი ბართოლომეოს პირველი ბრძანდება. ეს არის კიდევ ერთი დემონსტრირება იმისა, რომ მისი უწმინდესობის ღვაწლი და დამსახურება ცნობილია არა მხოლოდ ქართველი ერისთვის, არამედ ქრისტიანული მსოფლიოსთვის”, – განაცხადა დავით უსუფაშვილმა.
როგორც მან თავისი გამოსვლისას აღნიშნა, ქართული სახელმწიფოს დამკვიდრების, განმტკიცების და მისი ფორმირების დასრულების საქმეში ძალიან სერიოზული როლის შესრულება უწევს როგორც საერო ხელისუფლებას, ისე სასულიერო პირებს, ჩვენს მართლმადიდებლურ ეკლესიას, მის უწმინდესობას.
“ჩვენ მოხარულნი ვართ, რომ თანამშრომლობა სახელმწიფოსა და ეკლესიას შორის არის ურთიერთგაგების, ურთიერთდახმარების და თანადგომის ატმოსფეროში, რაც ესოდენ აუცილებელია ჩვენი სამშობლოს წინსვლისთვის. დარწმუნებულნი ვართ, ეს თანამშრომლობა გაგრძელდება. მისი უწმინდესობის რჩევებით, დარიგებებით, ყოველდღიური ზრუნვით, ქართული სახელმწიფოს განვითარების გზაზე წარმატებები გვექნება”, – განაცხადა პარლამენტის თავმჯდომარემ.
“მსოფლიოს საპატრიარქო განსაკუთრებული პატივისცემითაა განმსჭვალული საქართველოს ეკლესიის მიმართ. მართლმადიდებლობის განმტკიცებაში დიდი წვლილი შეიტანა სრულიად საქართველოს კათოლიკოს-პატრიარქმა, ილია მეორემ, აღნიშნა მსოფლიო პატრიარქმა ბართლომეოს პირველმა თბილისში, პარლამენტის თავმჯდომარის სახელით გამართულ მიღებაზე.
“მოხარული ვარ, რომ საქართველოში ვიმყოფები და ვმონაწილეობ სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია მეორის საიუბილეო თარიღებთან დაკავშირებით გამართულ ღონისძიებებში.
ქართველი ხალხი არის ერთ-ერთი უძველესი ქრისტიანული ერი, რომელმაც შეინარჩუნა სარწმუნოება და ტრადიცია. ასევე, მჭიდრო და სიყვარულით სავსე ურთიერთობა სხვა მართლმადიდებელ ეკლესიებთან, მათ შორის კონსტანტინოპოლის ეკლესიებთან, რომელთანაც ურთიერთობა მას ჯერ კიდევ ბიზანტიის პერიოდიდან აკავშირებს”, – აღნიშნა მსოფლიო პატრიარქმა.
მისივე განმარტებით, მსოფლიოს საპატრიარქოს დელეგაციის საქართველოში ყოფნა იმ ავტორიტეტის დასტურია, რომელიც საქართველოს ეკლესიას მსოფლიოში გააჩნია.
პარლამენტში გამართულ მიღებას მსოფლიოს მართლმადიდებელი ეკლესიის წარმომადგენლები, სინოდის წევრები, ელჩები, საკანონმდებლო და აღმასრულებელი ხელისუფლების წარმომადგენლები ესწრებოდნენ
