საქართველოს პარლამენტის თავმჯდომარემ, დავით უსუფაშვილმა, გუშინ, საჯაროდ მოაწერა ხელი კანონს ამნისტიის შესახებ. ამ ფაქტს საჯაროდვე გამოეპასუხა უმცირესობის წარმომადგენელი გოკა გაბაშვილი, რომელმაც “ნაციონალური მოძრაობის” ოფისში საგანგებო ბრიფინგი მოაწყო.
გაბაშვილის განცხადებით, 2013 წლის 12 ივნისს პარლამენტის თავმჯდომარის მიერ ხელმოწერილ კანონზე პასუხისმგებლობას მთლიანად უმრავლესობას და ახალ ხელისუფლებას ეკისრება. მან აღნიშნულ კანონს ”საერთო ჰუმანურ ინტერესებს ამოფარებული საქართველოს სახელმწიფოს უსაფრთხოების წინააღმდეგ” უწოდა და განაცხადა:
_ ასეთ კანონებს იღებდნენ ფართომასშტაბიანი კაპიტულაციის შემდეგ. ახლა, ამ უპრეცედენტო კანონის მიღებით, გარეთ გამოვა რუსეთის ფედერაციასთან ჯაშუშობაში ეჭვმიტანილი ყველა დამნაშავე.”
საგანგებოდ გამართულ ბრიფინგზე, უმცირესობის წარმომადგენელს არაფერი უთქვამს პრეზიდენტ მიხეილ სააკაშვილის მიერ შეწყალებულ განსაკუთრებით მძიმე დანაშაულში, წამებასა და ქურდულ სამყაროსთან ურთიერთობაში მსჯავრდებულ პირებზე. ასევე ნარკოდანაშაულში მსჯავრდებულებზე, რომლებსაც 14 და 18 წელი ჰქონდათ მისჯილი.
“გურია ნიუსი” გთავაზობთ მოკლე ფაბულებს მიხეილ სააკაშვილის მიერ შეწყალებული პირების სისხლის სამართლის საქმეებიდან
დანაშაული სიცოცხლის წინააღმდეგ
ი. კ-შვილი _ მსჯავრდებული სსკ-ს 108-ე მუხლით. მისჯილი ჰქონდა 10 წელი. 2005 წელს, ურთიერთშელაპარაკების ნიადაგზე დანით მოკლა კ ნ -ძე. სასჯელი შესწყალების აქტით გაუნახევრდა.
რ. ხ-ოვი – მსჯავრდებული სისხლის სამართლის კოდექსის 19-108-ე მუხლით. რესტორანში ჩხუბისასა, 5-ჯერ ჩაარტყა დანა გულმკერდსა და მუცელში ს. ლ-იას. მისჯილი ჰქონდა 9 წელი. გათავისუფლდა პატიმრობისგან 04. 12. 2012 წელს.
პ. ბ-ლი _ მსჯავრდებული სისხლის სამართლის კოდექსის 108-ე მუხლით. რესტორანში, დანით 4 ჭრილობა მიაყენა და მოკლა ქ. ქ-შვილი. მისჯილი ჰქონდა 13 წელი. სასჯელი შეწყალების აქტით გაუნახევრდა 2-ჯერ. 12.11. 2012 წ და 28. 12. 2012 წელს.
მ. ბ-ძე _ მსჯავრდებული სისხლის სამართლის კოდექსის 108-ე მუხლით. მაკაროვის სისტემის ცეცხლსასროლი იარაღით მოკლა ზ. ს-ძე. მიესაჯა 17 წელი. შეწყალების აქტით შეუმცირდა სასჯელი 5 წლით. 13. 12. 2012 წელს
ა. მ-შვილი _ მსჯავრდებული 117-ე მუხლის მე-2 ნაწილით. მ. ჭ-ძეს დანით მიაყენა ჭრილობა. დაზიანების შედეგად მ. ჭ. გარდაიცვალა. მისჯილი ჰქონდა 11 წელი. შეწყალების აქტით გაუნახევრდა. 04. 12. 2012 წელს
დანაშაული სქესობრივი თავისუფლებისა და ხელშეუხებლობის წინააღმდეგ
გ. ხ-შვილი _ ერთ-ერთ დაბაში ჩაიდინა ნივთების ქურდობა და მანვე მცირეწლოვანის მიმართ განახორციელა გარყვნილი ქმედება ძალადობის გარეშე. მისჯილი ჰქონდა 2 წელი. გათავისუფლდა. 13. 12. 2012 წელს
დანაშაული ადამიანის უფლებებისა და თავისუფლებების წინააღმდეგ
ო. გ-ძე _ სამართალდამცავი ო. გ მსჯავრდებულია არასრულწლოვნის წამებაში, რათა მას ეღიარებინა არ ჩადენილი დანაშაული. მისჯილი ჰქონდა 11 წელი. შეწყალების აქტით გაუნახევრდა სასჯელი 28. 12. 2012 წელს.
პრეზიდენტის შეწყალებული ე. წ „ქურდული სამყაროს“ წევრები
ე. გ-იანი _ მსჯავრდებული ქურდული სამყაროს წევრობისთვის, განსაკუთრებით დიდი ოდენობის ნარკოტიკული საშუალების უკანონო დამზადება, წარმოება, შეძენა, შენახვა, გადაზიდვა, გადაგზავნისთვის და ჯგუფური გამოძალისთვის დიდი ოდენობის ქონების მიღების მიზნით. მისჯილი ჰქონდა 24 წელი. შეწყალებული იქნა და გათავისუფლებული საპატიმრო სასჯელის მოხდისგან 2012 წლის 28 დეკემბერს.
ი. ს-ია _ მსჯავრდებული ქურდული სამყაროს წევრობისთვის. მისჯილი ჰქონდა 5 წელი. გათავისუფლდა 2012 წლის 28 დეკემბერს.
ნარკოტიკული დანაშაული
ლ.მ- შვილი _ უკანონოდ გასაღების მიზნით დაუდგენელი პირებისგან შეიძინა 11 წონად დაფასოებული 3,6658 გრ. ჰეროინი. მისჯილი ჰქონდა 14 წელი. გათავისუფლდა 20.10. 2012 წელს.
ი. ბ-ძე _ საფრანგეთის რესპუბლიკაში შეიძინა და გადმოზიდა 32 აბი „სუბოტექსი“. მისჯილი ჰქონდა 10 წელი. მოიხადა მხოლოდ 8 თვე. შეწყალებული იქნა 04. 12. 2012 წელს.
დ. მ-შვილი _ პირადი ჩხრეკისას აღმოაჩნდა 20,8639 გრ ჰეროინი. მისჯილი ჰქონდა 14 წელი. შეწყალებული იქნა 04. 12. 2012 წელს.
ეს არის მხოლოდ მცირე ნაწილი პრეზიდენტის მიერ შეწყალებული პატიმრებისა. საერთო ჯამში, 2012 წლის პირველი ოქტომბრიდან 2012 წლის 28 დეკემბრის ჩათვლით პერიოდში, სულ შეწყალებული იქნა 1 544 მსჯავრდებული. მათ შორის საპატიმრო სასჯელის მოხდისგან სრულად გათავისუფლდა 1 359 (88. 0%) მსჯავრდებული; საპატიმრო სასჯელი შეუმსუბუქდა -156 (10. 1%); პ/მ მსჯავრი მოეხსნა _ 29 (1.9%) მსჯავრდებულს.
