_ მოსაზრებები, რასაც დღევანდელი საპარლამენტო უმცირესობა იძახის, რომ ქვეყანაში არ იყო პოლიტიკური დევნა, აბსურდია. შერჩევითი სამართალი მოქმედებდა ქვეყანაში და პიროვნული დევნა მიმდინარეობდა პოლიტიკური ნიშნით, ეს იმდენად თვალსაჩინო იყო, რომ როგორ შეიძლება ამის შემდეგ თქვა, ქვეყანაში ადამიანის უფლებები არ ირღვევოდა? _ აცხადებს ქარჩავა „გურია ნიუსთან“.
მისი თქმით, შალვა გოგინაშვილი აქტიურად იყო ჩართული 2007 წლის აქციებში, ის უფლებამდაცველ დაჩი ცაგურიას მეგობარია და ერთად აპროტესტებდნენ უსამართლობას საქართველოში. 2009 წლის 29 ივლისს, როდესაც კარვების ქალაქი იყო თბილისში, ჩატარდა უცნობის კონცერტი, სწორედ მაშინ კინო “რუსთაველის” მხრიდან ის ზონდერ ჯგუფებთან შეტაკებაში მოყვა. ერთი კვირის შემდეგ დააკავეს ბრალდებით, თითქოს სხეულის განზრახ დაზიანება მიაყენა ერთ-ერთ პოლიციელს.
_მას ბრალი ედებოდა პოლიციელის მკვლელობის მცდელობაში, რაც, რა თქმა უნდა, აბსურდული იყო. მე ვიცავდი მის უფლებებს. სანამ სასჯელს გამოუტადნენ, ექიმის დაკითხვა ვერ მოვახერხე, რადგან ამის უფლება არ მომცეს. შემდეგ ამოვიღე პოლიციელის ისტორია, რაც არ ემთხვეოდა ექსპერტიზის დასკვნას. სასამართლოს გადაწყვეტილებით, ახალგაზრდა შალვა გოგინაშვილს 15 წელი მიუსაჯეს. ეს საქმე წავიდა სტრასბურგში, საქმეში „ახალგაზრდა იურისტთა ასოციაციაც“ ჩაერთო. შალვა გოგინაშვილი ციხეში ევროსაბჭოს კომისარმა თომას ჰამერბერგმა მოინახულა. მან ასევე სხვა პატიმრებიც მოინახულა და შემდეგ თავის ანგარიში განაცხადა:
“ოპოზიციის დაკავებული აქტივისტებისა და მათი მხარდამჭერების ზოგიერთ საქმეში სამართლიანი სასამართლოს უფლებაა დარღვეულია, რომლის მიხედვით, სისხლის სამართლის ყველა სამართალდამრღვევს უფლება აქვს, მისი მოწმის წარმოდგენა და დაკითხვა მოითხოვოს იმავე პირობებით, რაც მის წინააღმდეგ წარმოდგენილ მოწმეებს აქვთ მინიჭებული, ასევე რასაც სამართალწარმოების დროს მხარეების თანასწორუფლებიანობა მოითხოვს. არსებობს ინფორმაცია, რომ სასამართლოებმა პროკურორის მოთხოვნის დასაკმაყოფილებლად ბრალდებულის დასჯის გადაწყვეტილება ხალისით მიიღეს, მიუხედავად იმისა, რომ, როგორც ითქვა, არ იყო წარმოდგენილი საფუძვლიანი მტკიცებულებები, რომლებიც ბრალეულობის დასადასტურებლად საკმარისი იქნებოდა.”
რაც შეეხება გიორგი ჩიხლაძეს, ის ირაკლი ოქრუაშვილის ნათლულია და მისი პირადი მცველი იყო. მას ბრალად ედებოდა უკანონო შეიარაღების ფორმირებაში მონაწილეობა და ორგანიზება.
_ სწორედ მის მიმართ განხორციელდა ტანჯვის და წამების ფაქტი, სადაც დათა ახალაია ფიგურირებს. მისი წამების ფაქტებთან დაკავშირებით, ხშირად ვსაუბრობდი მედიასთან. მტკიცებულებებიც გვაქვს აღებული, რომ ის ნამდვილად ნაწამები იყო და ახლახან მივმართეთ პროკურატურას. გიორგი დაიკითხა და ალბათ, დათა ახალაიას მიმართ ერთ-ერთ ბრალდებად შემდგომში იქნება გიორგი ჩიხრაძის ტანჯვის და წამების ფაქტი და საქმე, _ აცხადებს ადვოკატი.
რაც შეეხება ანდრო ჯოხაძეს, რომელიც აქტიურად მონაწილეობდა “ვარდების რევოლუციის” შემდეგ საპროტესტო აქციებში, ის ლევან გაჩეჩილაძის პირადი მცველი იყო.
_ ორი წლის წინ თითქოს პოლიციის ქურდობის ფაქტზე დააკავეს და მიუსაჯეს ოთხი წელი. მასაც, რა თქმა უნდა არასამართლიანად მოექცენ, _ განაცხადა ედიშერ ქარჩავამ “გურია ნიუსთან”.
