მათ ყველანაირი ხერხით შეეძლოთ უდანაშაულო ადამიანი გამოეცხადებინათ დამნაშავედ. სასამართლო მათ ხელში იყო, სამართალდამცველები მთლიანად პოლიტიზირებულები იყვნენ და ამის გამო მივიღეთ პოლიტიზირებულად მოტივირებული არაერთი საქმე. ამაზე ხმამაღლა აკრიტიკებდნენ მათ როგორც ადგილობრივი არასამთავრობოები, ასევე საერთაშორისო ორგანიზაციები. ჩვენ სწორედ იმის გამო აგვირჩია ხალხმა, რომ სამართლიანობა აღგვედგინა ამ ქვეყანაში,” _ აცხადებს პარლამენტის ვიცე-სპიკერი მანანა კობახიძე “გურია ნიუსთან” საუბარში.
_ საპარლამენტო უმცირესობის წარმომადგენლები ამბობენ, რომ ასეთი ფართომასშტაბიანი ამნისტიის შესახებ კანონს მხოლოდ კაპიტულაციის შემდეგ იღებენ.
_ რაც შეეხება ფართომასშტაბიან ამნისტიას, მთელი ამ წლების განმავლობაში ციხეში იყო საშინელი ვითარება, წამება თუ არაადამიანური მოპყრობა, ღირსების შელახვა, ჯანმრთელი ადამიანები ხვდებოდნენ ციხეში და უარეს შემთხვევაში გარდაიცვლებოდნენ, მაგალითისთვის მოვიყვან კახაბერ თედლიაშვილის საქმეს, რომელიც „გურია ნიუსმა“ ძალიან კარგად იცის, სხვა შემთხვევაში კი ან ინვალიდებად რჩებოდნენ, ან აწამებდნენ, ან ცოცხებით აუპატიურებდნენ. ამ ყველაფრის გათვალისწინებით, დიახაც, ძალიან ჰუმანური აქცია იყო, რომ მიუხედავად დანაშაულის სიმძიმისა, ერთი მეოთხედით შემცირება ყველას შეხებოდა.
_ ოპოზიციის წარმომადგენლებმა განაცხადეს, რომ ახალი ხელისუფლება „ნარკობარიგებს“ უშვებს ციხეებიდან.
_ რაც შეეხება სხვა, ნაკლებად მძიმე სახის დანაშაულებს, მთელს მსოფლიოშია აღიარებული, რომ ქალებს და არასრულწლოვნებს, პერიოდულად ეხებათ ამნისტია. თუმცა, არასწორი ინფორმაცია გაავრცელეს, როცა განაცხადეს, რომ ნარკობარიგებს უშვებენ ციხიდანო. ნარკობარიგები გარეთ არ გამოსულან. რაც შეეხება ნარკომომხმარებლებს, ჩვენი მიდგომა ასეთია, რომ ისინი ავადმყოფები არიან და მათ ჭირდებათ დახმარება და მკურნალობა. ვფიქრობ, რომ ეს ჰუმანურია და საზოგადოება ამას ითხოვდა. თანაც, საქართველო, მთელს ევროპაში, ერთ სულ მოსახლეზე, პატიმრების რაოდენობით ნომერ პირველი ქვეყანაა და ყველა რეკომენდაცია ჩვენი დასავლელი პარტნიორების და ევროსაბჭოსი, სწორედ იმას ითვალისწინებდა, რომ შეგვემცირებინა პატიმრების რაოდენობა და უფრო მეტად გამოგვეყენებინა ალტერნატიული ღონისძიებები. ჩვენ ამ რეკომენდაციებს ვიცავთ.
_ სამართალდამცავ სტრუქტურებს, ალბათ, ნებისმიერ შემთხვევაში მოუწევთ გაძლიერებულად მუშაობა…
_ ჩვენ ვიღებთ პასუხისმგებლობას და სამართალდამცავი სტრუქტურები ნამდვილად მუშაობენ გაძლიერებულ რეჟიმში. 7 დეკემბერს კახეთიდან მოვდიოდი და ყურადღება მივაქციე იმას, რომ ლამის ყოველ 20 მეტრში პატრულირებდა საპატრულო მანქანა და ჩემი მანქანაც გააჩერეს, როგორც შემდეგ გაირკვა, დაბურული შუშების გამო და ძალიან კარგი, რომ ასე მოიქცნენ. ისინი ძალიან ოპერატიულად მუშაობენ და არავითარი საფუძველი იმისა, რომ კრიმინალი უკან მობრუნდება, არ არსებობს. ამნისტია ყველა ნორმალურ ქვეყანაში ხორციელდება და არაფრის დრამატიზირება საჭირო არ არის.
რასაც პრეზიდენტი პედოფილებთან დაკავშირებით აცხადებდა, როდესაც ასეთი მცირე სანქციაა ამ დანაშაულზე, 5 წლამდე აღკვეთა, ნაკლებად მძიმეს შეეხო, რა თქმა უნდა, ოღონს სექსუალურ დანაშაულებებზე იქ იყო დათქმები. თუ პრეზიდენტი უკმაყოფილოა იმიტომ, რომ ასეთ დანაშაულზე სანქცია ნაკლებია, მაშინ ამაზე იდავოს. და ისიც გაიხსენოს, რომ დღეს მოქმედი სისხლის სამართლის კოდექსი მათი მიღებულია. თუ არ აკმაყოფილებს ეს სანქცია, მაშინ მოითხოვოს მისი შეცვლა. ეს უკვე, სულ სხვა თემაა. ის, რომ ვიღაც გამაუპატიურებლებს გარეთ ვუშვებთ, ტყუილია და მსგავსი განცხადებების გაკეთება იყო საზოგადოების შეცდომაში შეყვანის მცდელობა. ტყულად ნუ ცდილობენ ხალხის დაშინებას. არანორმალური ის იყო, პარლამენტის ტრიბუნიდან რომ აცხადებდა, ყველა ციხეში და ყველას ესროლეთო.
