“პრეზიდენტთანაც გავაგზავნე წერილი და დიდი იმედით ველოდი პასუხს”

რომლითაც საკუთარ სოციალურ მდგომარეობას აცნობდა. წერილს ჩოხატაურის მუნიციპალიტეტის სოფელ ნაბეღლავში მცხოვრები, 75 წლის ქალბატონი, მზია კვაჭანტირაძე აწერს ხელს.

კვაჭანტირაძეების ოჯახს ძალიან უჭირს და სოციალური დახმარება სჭირდება, რომელსაც რამდენიმე წლის წინ იღებდნენ. დემოგრაფიული ცვლილების გამო, ხელახალი გადამოწმების შემდეგ, შედარებით მაღალი სარეიტინგო ქულა მიიღეს და დახმარებაც მოეხსნათ.

ქალბატონი მზია გვწერს, რომ ოჯახში ხუთი წევრი ცხოვრობს, ამათგან ერთი _ მცირეწლოვანია. არც ერთი მათგანი არ მუშაობს. მათი ერთადერთი შემოსავალი ოჯახის დიასახლისის პენსიაა, რომელიც საკმარისი არ არის ოჯახისთვის და ხშირად წამლისთვისაც კი არ რჩებათ ფული.

ოჯახში მისულებს, ქალბატონი მზია სახლში არ დაგვხვდა. მათ პრობლემებზე ჩვენთან ოჯახის რძალმა, ნაირა კიკვაძემ ისაუბრა:

_ სამი წლის წინ ვიღებდით სოციალურ დახმარებას, მერე მამამთილი გარდაიცვალა და დემოგრაფიული ცვლილების გამო, ხელახლა გადაამოწმეს და იქედან მოყოლებული, სულ უფრო და უფრო მაღალი ქულები მოგვდის. დახმარებაც მოიხსნა. მხოლოდ პოლისი გვაქვს. 2012 წლის 10 ოქტომბერს შევიტანეთ ხელახლა განცხადება სოციალური დახმარების მოთხოვნით. 10 ნოემბერს მივიღეთ პასუხი, რომელშიც მაღალი სარეიტინგო ქულა გვიწერია. როცა ვიკითხეთ, როგორ მოგვემატა ქულაო, ასე გვითხრეს, დეკლარაციაში მხოლოდ ის შევიტანეთ, რაც თქვენ ჩაგვაწერინეთ, ჩვენც არაფერი ვიცით მეტი, ხელახლა ერთი წლის მერე შეძლებთ განცხადების შემოტანასო. ადრეც გვინდოდა თქვენი გაზეთისთვის მოგვემართა, მაგრამ თავს ვიკავებდით, მაგრამ ახლა ჩემი დედამთილის ინიციატივით გამოვაგზავნეთ წერილი თქვენთან. მრცხვენია ამის თქმა, მაგრამ ძალიან გვიჭირს და ჩვენი ერთადერთი შემოსავალი ჩემი დედამთილის პენსია და ახლობლების დახმარებაა მხოლოდ. ოჯახში ხუთი წევრი ვართ, ჩემი შვილიშვილი მცირეწლოვანია, ათასი რამ სჭირდება ბავშვს. სოციალური აგენტი რომ მოვიდა და ჩვენს მდგომარეობა ნახა, თვითონაც გაკვირვებული დარჩა, როგორ ვერ უნდა მიიღოთ დახმარებაო. სახლში არც ძვირადღირებული ტექნიკა გვაქვს, ერთი სატელიტური ანტენა გვიდგას. სოფლის მეურნეობა გვაქვს, მაგრამ თავის დროზე სასუქს რომ ვერ იყიდი ან ტრაქტორს რომ ვერ მოიყვან, რას მოიწევ?! ამას ყველაფერს თავისი ხარჯები აქვს.

_ დახმარებისთვის არავისთვის მიგიმართავთ?

_ ლელა იმედაშვილი როცა იყო გამგებელი, მას მიმართა ჩემმა დედამთილმა და ერთჯერადი დახმარება გაგვიწია, 100 თუ 120 ლარის ოდენობით. სამსახური რომ მქონდეს, სულ არ მინდა დახმარება. ახალგაზრდა ქალი ვარ და ვიმუშავებდი, ჩემს ნაშრომს მივიტანდი სახლში, მაგრამ სამსახური სად არის? “ნაბეღლავის” ქარხანაში რომ მივედი, ადგილი არ არისო, მითხრეს. პრეზიდენტთანაც გავაგზავნე წერილი და დიდი იმედით ველოდი პასუხს, იმ პერიოდში ყველამ გააგზავნა წერილი პრეზიდენტთან და თითქმის ყველას ერთი და იგივე პასუხი მოგვივიდა. კი მქონდა რაღაცის იმედი, მეგონა, დამეხმარებოდნენ სამსახურის შოვნაში. ის მივწერე, რაც მაწუხებდა.

_ რა პასუხი მიიღეთ პრეზიდენტთან გაგზავნილ წერილზე?

_ სამინისტროში შექმნილია დახმარების თუ დასაქმების ჯგუფები და თქვენ დასაქმდებით პროფესიის მიხედვითო. მე არაფერი პროფესია არ მაქვს. არასდროს არ მიმუშავია-მეთქი, ვერ ვიტყვი, ადრე “ნაბეღლავის” დიდი ქარხნის გვერდით პატარა საწარმო იყო და იქ ვმუშაობდი. მერე თანამედროვე სტანდარტებს ვერ აკმაყოფილებსო და დახურეს. შემდეგ აქ ერთი რესტორანი იყო და იმ რესტორანში ლიმონათის საამქრო გაიხსნა. იქ გადავედი სამუშაოდ, ძლივძლივობით არსებობდა, მაგრამ რაღაც თანხა შემქონდა ოჯახში, შაქრის ფული მაინც იყო. ისიც დაიხურა. ახლა აქ ახალი ქარხანა შენდებაო და დამპირდნენ დაგასაქმებთო. ვნახოთ, რა იქნება.

კვაჭანტირაძეებისგან მიღებული წერილის შინაარსი ჩოხატაურის მუნიციპალიტეტის სოციალური სამსახურის უფროსს, ზურაბ კალანდაძეს გავაცანით და ვეცადეთ, მასთან გაგვერკვია ამ ოჯახისთვის სოციალური დახმარების მოხსნის მიზეზი.

_ ბატონო ზურაბ, ეს ოჯახი იღებდა სოციალურ დახმარებას და ოჯახის უფროსის გარდაცვალების შემდეგ, მაშინ, როცა ოჯახს დახმარება უფრო სჭირდებოდა, შეუჩერდათ. ამას ქალბატონი მზიაც აღნიშნავს ჩვენთან გამოგზავნილ წერილში. რამ გამოიწვია ქულების ასე მკვეთრად ზრდა?

_ ეს ოჯახი მართლაც იღებდა დახმარებას. როცა ოჯახში დემოგრაფიული ცვლილებაა, ვადამდელი გადამოწმება ხდება, სწორედ ასეთი გადამოწმების შემდეგ ოჯახმა მიიღო 68 000 სარეიტინგო ქულა, რაც საკმარისი არ იყო ფულადი დახმარების მისაღებად. ალბათ, იცით, რომ სოფლის რწმუნებულები უწევდნენ შუამდგომლობას ასეთ ოჯახებს. ამის გამო, ვადაზე ადრე, ისევ მივიდა მათთან სოციალური აგენტი, ამ გადამოწმების შემდეგ კი სარეიტინგო ქულამ 59 500 შეადგინა. ჩემი ვარაუდით, შესაძლოა, ოჯახის უფროსს ჯანმრთელობის მძიმე მდგომარეობა ჰქონდა. მოგეხსენებათ, რომ სოციალური აგენტი ოჯახის წევრების რაოდენობასთან ერთად მსგავს პრობლემებსაც აქცევს ყურადღებას და ითვალისწინებს. მისი გარდაცვალების შემდეგ ოჯახს დამამძიმებელი გარემოება არ ჰქონდა და შესაძლოა, ამიტომ მოიმატა ქულებმა. თუმცა, ქულები პროგრამულად დგება და კონკრეტულად იმის თქმა, თუ რა გახდა ქულების ზრდის მიზეზი, არ შემიძლია. სოციალური აგენტი სრული წესის დაცვით მოქმედებდა, დეკლარაციაც ნორმალურადაა შევსებული, მაგრამ თუ კი ოჯახს რაიმე ეეჭვება, შეუძლია, მობრძანდეს ჩვენთან, ვაჩვენებთ მათ ოჯახში შევსებულ დეკლარაციას და თუ რაიმე პრობლემა ექნებათ ან უზუსტობას აღმოაჩენენ, შეუძლიათ, მოგვმართონ პრეტენზიით. ერთი წლის შემდეგ კი, ხელახლა შეეძლებათ განცხადების შემოტანა, თუ კი მანამდე რაიმე ცვლილებები არ მოხდა კანონმდებლობაში, _ აღნიშნა ჩვენთან საუბრისას კალანდაძემ.