“ქართული ოცნების” ბრიფინგი აბაშაში

ბრიფინგზე განცხადება გააკეთეს ზურაბ ნინუამ და ვაჟა ლიპარტიამ.

ზურაბ ნინუა: “ჩვენ კიდევ ერთხელ მივმართავთ ფინანსთა მინისტრს, ბ–ნ ნოდარ ხადურს, რომ ფინანსური პოლიციის ჯგუფში, რომელიც აბაშაში უნდა ჩამოვიდეს, არ იყვნენ აბაშის მთავრობასთან დაკავშირებული პირები. მოვითხოვთ, რომ დაჩქარდეს ამ ჯგუფის ჩამოსვლა, რადგან აუდიტი უკვე მუშაობს რაიონში. ჩვენ გვაქვს ინფორმაცია, რომ უკვე დაიწყო შიდა დაპირისპირება ყოფილ გამგებელსა და მომქმედ საკრებულოს თავმჯდომარეს შორის. ჩვენ ვიცით, რომ გურამ გუნავას და დავით თოფურიას შორის ერთი დღის წინ ინციდენტი მოხდა _ მოგვაწოდეს ინფორმაცია, რომ თოფურიამ გუნავას ფიზიკური შეურაცხყოფა მიაყენა, მიზეზი კი, როგორც ირკვევა, ადგილობრივ თვითმმართველობის ორგანოებში ფინანსური პოლიციის შესვლაა, რასაც გუნავა კატეგორიულად ეწინააღმდეგება და არწმუნებს თოფურიას, რომ ეს დამღუპველი იქნება ორივესთვის. მოუწოდებდა მას, გადამდგარიყო თანამდებობიდან და თავიდან აეცილებინათ პრობლემები, რაზეც თოფურია არ დათანხმდა. გუნავას ბოლო სიტყვები კი ასეთი იყო, მე პერეფრაზირებას გავაკეთებ: “თუ ვუნმე მე შემეხება, ყველანი უკან გამომყვებით!”

ეს ინფორმაცია სანდო წყარომ მოგვაწოდა, თუმცა, პიროვნებას შეგნებულად არ ვასახელებ, რომ მას პრობლემები არ შეექმნას”

ვაჟა ლიპარტია: “გუშინ ყველამ მოვისმინეთ და წავიკითხეთ აბაშის გამგებლის გოჩა ჭანტურიას ინტერვიუ, სადაც ამბობს, რომ ის არის “ქართული ოცნების” და ახალი მთავრობის მიერ მხარდაჭერილი პიროვნება. ამ გამცხადების გაკეთებით ის ცრუობს, რადგან ჩვენ გვქონდა შეხვედრები როგორც სახელმწიფო კანცელარიაში, ასევე კოალიციაში და ყველას პასუხი ამ საკითხთან დაკავშირებით იყო უარყოფითი. გამგებელი ცრუობს, როცა აცხადებს, რომ ის შეხვდა “ოცნების” წევრებს და პირადად მეც. სრული პასუხისმგებლობით ვაცხადებ, რომ მას ადრე არც კი ვიცნობდი. თუ ის “ოცნების” მხარდაჭერილი პირია, რატომ არასდროს მოსულა წინასაარჩევნოდ ჩვენთან?! აი, ეს ხალხი იყო “ოცნების” აქტივისტები, რომლებმაც 8 თვის განმავლობაში მართლაც ბრძოლით მოიტანეს დღევანდელი გამარჯვება. გამგებელი ამბობს, რომ მას არასდროს დაუკარგავს რაიონის მაჯისცემა, რომ ის თვეში რამდენჯერმე ჩამოდიოდა აბაშაში და გარჯვეულ ჯგუფთან ჰქონდა კავშირი. სწორედ ეს გარკვეული ჯგუფი იყო ნაციონალური მოძრაობის წარმომადგენლები და სწორედ ამ ჯგუფმა მოიყვანა ის გამგებლად. კიდევ ერთხელ ვაცხადებ, რომ არც ადრე და არც ახლა “ქართულ ოცნებას” მასთან არანაირი კავშირი არ აქვს და არასდროს წავალთ მასთან მოლაპარაკებაზე.”