“ნაციონალური მოძრაობის” ახალი თავმჯდომარე: “მე არაფრის არ მეშინია!”

_ ბატონო მიხეილ, გადაწყვეტილება თქვენი სურვილით მიიღეთ?

_ მე ვიყავი და ვარ “ნაციონალური მოძრაობის” ოზურგეთის ორგანიზაციის ერთ-ერთ დამფუძნებელი, რომელიც 2000 წლიდან დავაფუძნეთ, მას შემდეგ ვარ პარტიის  წევრი, თუმცა ძალიან დიდი ხანი ვიყავი საჯარო სამსახურში და აქედან გამომდინარე, არ მქონდა უფლება აქტიურად მემუშავა პარტიაში. პირველმა მე დავტოვე გამგებლის მოადგილის პოსტი და გადავწყვიტე, ისევ ჩავდგომოდი პარტიას სათავეში.  ვარ პარტიის თავმჯდომარე და დიდი სიამოვნებით   გავაკეთებ ძალიან ბევრ საქმეს ჩვენი რიონისთვის.

_ თქვენი უახლესი  გეგმები როგორია პარტიასთან დაკავშირებით?

_ რა თქმა უნდა, პარტიას სჭირდება გადახალისება, განვითარებული მოვლენების გამო, პარტიაში  მიდის რაღაც პროცესები. ძალიან ბევრმა დატოვა პარტია, ასევე საკრებულოში „ნაციონალური ფრაქცია“, ანუ არის დუღილის პროცესი, თუმცა ყველაფერი დალაგდება. პირველ რიგში, სოფელში ჩამოვაყალიბებ პირველად ორგანიზაციებს.

_ ბატონო მიხეილ, იქნებ გვითხრათ რატომ ტოვებენ „ნაციონალები“ პარტიას? დაიშალა „ნაციონალური ფრაქცია“ საკრებულოში. . .

_ დაგეთანხმებით, საკრებულოში ფრაქცია უმრავლესობა დაიშალა. ყველა ადამიანს თავისი ინდივიდუალური აზრი გააჩნია, მათ ალბათ უნდოდათ გამარჯვებულის მხარეს ყოფნა. მათი უმეტესობა მხოლოდ ამისთვის იყო „ნაციონალებში“ და ახლაც მხოლოდ ამიტომ გადავიდნენ „ოცნების“ მხარეს, თუმცა ეს არის მათი თავისუფალი ნება და პირადი გადაწყვეტილება.

_ ზოგ შემთხვევაში მართლაც შეიძლება იყო პირადი ნება, თუმცა ,ჩვენი ინფორმაციით  საკრებულოს წევრების გარკვეულ ნაწილზე ზეწოლა განხორციელდა, ან რაღაცას  დაჰპირდნენ სანაცვლოდ,  ან დაემუქრნენ და ა.შ.

_პარტიაში წევრობაზე არ ყოფილა ზეწოლა, თანამდებობისთვის კი, იყო ფაქტები, მაგრამ ჯერჯერობით, ჩემს მიერ არ არის გადამოწმებული. ვიცი, რომ თანამდებობის პირებზე არის გარკვეული ზეწოლის ფაქტები, მაგრამ ეს იქნება აუცილებლად მხილებული ჩვენს მიერ და მიწოდებული შესაბამისი ორგანოებისთვის.

მე რამდენიმე დღეა,  რაც  პარტიის თავმჯდომარე გავხდი, ყველაფერში გავერკვევი. ჭორის დონეზე ვერ ვისაუბრებ, მჭირდება ფაქტები და თუ კი რაიმე გახდება ჩემთვის ცნობილი, მაშინვე იქნება მყისიერი რეაგირება ჩვენი მხრიდან. ყოვლად დაუშვებელია საკრებულოს წევრებზე ზეწოლა.

_რა ინფორმაციას ფლობთ რწმუნებულებზე ზეწოლასთან დაკავშირებით?

_ რწმუნებულბთან დაკავშირებითაც არის რაღაც ინფორმაციები, ასეთი ფაქტი  დაფიქსირდა ნასაკირალში. ასევე, დაუზუსტებული ინფორმაციით, ჭანიეთის რწმუნებულზეც არის რაღაც. .. სხვათაშორის, მინდა ყველა რწმუნებულს ვუთხრა, თქვენი გაზეთის საშუალებით, რომ მე ვიქნები პირადად  მათი დამცველი, ვისზეც ზეწოლა გახორციელდება, არა მარტო მე, საერთაშორისო და არასამთავროები ორგანიზაციებიც.

_ რა ინფორმაციას  ფლობთ ყოფილ გამგებელსა და „ნაციონალური პარტიის “ თავმჯდომარეზე ილია ვაშაყმაძეზე? იყო მასზეც ზეწოლა?

_ზუსტად არ ვიცი რა მდგომარეობაშია, რა  ხდება სამართალდამცავებში ამასთან დაკავშირებით. ერთი ის ვიცი, რომ რასაც ედავებოდნენ, იმაში ილია აბსოლუტურად მართალია და მას ამის სრული უფლება ჰქონდა.

_ თუმცა მან აღნიშნული თანამდებობა დატოვა. .

_ კი ბატონო.

_ ბატონო მიხეილ, თქვენ გარკვეული წლების განმავლობაში იყავით საჯარო მოხელე, გეკავათ საკმაოდ მაღალი თანამდებობები, არ ფიქრობთ, რომ ამის გამო შეიძლება პრობლემები შეგექმნათ?  ვთქვათ, ამოგიგდონ ძველი საქმეები და ა.შ  მოკლედ, არ გეშინიათ?

_ ყველამ იცის ჩემი პოზიცია, მე არაფრის  მეშინია. მე არ მეშინია ჩემი განვლილი ცხოვრების და წარსულის, არ მაქვს უკან დასახევი, ვიმუშავე პირნათლად.