როგორც ჩვენი ჟურნალისტი იტყობინებინება, შეხვედრის დროს, გამგებლის მოადგილის გიზო სართანიას დედა, ლალი (ვერა) ანთია ცოცხით “შეიარაღებული” მივიდა დემოკრატიული ჩართულობის ცენტრში და განაცხადა, რომ ეს ცოცხები უმცირესობის წარმომადგენლებისთვის მიჰქონდა. უმრავლესობის წევრებმა მას მოსთხოვეს დარბაზის დატოვება, რის შემდეგაც ლალი ანთია გავიდა იქედან.
შეგახსენებთ, რომ დემოკრატიული ჩართულობის ცენტრში მიმდინარეობს პარლამენტის წევრების გეგმიური შეხვედრა, საკონსტიტუციო ცვლილებებთან დაკავშირებით. დარბაზი გადაჭედილია და პარლამენტარების გარდა, საზოგადოების წარმომადგენლებიც ესწრებიან.
უმრავლესობიდან არიან: მანანა კობახიძე, ვახტანგ ხმალაძე, ზვიად ძიძიგური, ზაქარია ქუცნაშვილი და სხვები. უმცირესობას კი წარმოადგნენ: აკაკი მინაშვილი, აკაკი ბობოხიძე, მარიამ საჯაია, ნუგზარ წიკლაური.
შეხვედრაზე კიდევ ერთი ინციდენტი მოხდა. აკაკი მინაშვილის სიტყვით გამოსვლას შეძახილები მოჰყვა, _ როგორ გაბედე სიტყვით გამოსვლაო. აკაკი ბობოხიძეს კი დემაგოგი უწოდეს და მოსთხოვეს დარბაზის დატოვება. ბობოხიძემ პასუხად განაცხადა, _ არ გავჩერდებიო. უმრავლესობამ იქ შეკრებილ საზოგადოებას მოუწოდა, რომ მსგავსი განცხადებების გაკეთებისგან თავი შეეკავებინათ და პარლამენტარებისთვის მუშაობის საშუალება მიეცათ. თუმცა, საბოლოო ჯამში, ბობოხიძე და მინაშვილი დარბაზიდან გავიდნენ და გვერდით ოთახში გადაინაცვლეს.
