“2008 წელს, მიშა სააკაშვილს პირადად მივმართე რუსეთში საქართველოს სასარგებლოდ ჯაშუშობის ბრალდებით დაკავებული ზაზა ხერკილაძის გადაცვლასთან დაკავშირებით. არსებობს ამის დამადასტურებელი დოკუმენტებიც, მაგრამ მაშინ მან ამაზე უარი განაცხადა. სააკაშვილს მაშინ არ ადარდებდა რუსულ ციხეში გაუსაძლის პირობებში მყოფი ქართველი მზვერავების ბედი. მას მხოლოდ ახლა მოუვიდა თავში ეს იდეა , მაგრამ ამას უკვე ახალი ხელისუფლება მიხედავს და არა სააკაშვილი. მას უკვე არაფერი ესაქმება იმ ადამიანებთან, იმიტომ, რომ მან არ გამოიყენა ეს შესაძლებლობა 4 წლის წინ”.
მაისაიას თქმით, აბსურდულია, როცა სააკაშვილი ჯაშუშების გაცვლაზე საუბრობს, რადგან ნატოს ჯაშუშს, რაშიც მაისაიას ადანაშაულებდნენ, პროფესიონალ მზვერავში ვერ გაცვლიდნენ: “მე მედავებიან ნატოს ჯაშუშობას და რუსეთის ფედერაციაში დაპატიმრებულ მზვერავში როგორ გამცვლიდნენ? პოლიტპატიმრის პროფესიონალში გაცვლა წარმოუდგენელია. გასაცვლელად სააკაშვილმა დაიჭიროს თავისი ჯაშუშები, რომელიც ჰყავს, მაგალითად, ვანო მერაბიშვილის სახით და ის გაცვალოს ხერკილაძეში”.
ვახტანგ მაისაია დაკავების შემდეგ უშუალოდ მოინახულა ვანო მერაბიშვილმა და გარკვეული პირობის სანაცვლოდ გათავისუფლებასაც დაჰპირდა: “ვანო მერაბიშვილი 2005-2008 წლებში სამჯერ იყო მინსკში და ეს ვიზიტები საეჭვოდ ემთხვეოდა გრუს ჩინოვნიკების ვიზიტს. ჩემს ნაშრომში, რომელიც მოვამზადე საერთაშორისო კრიზისების მართვის ჯგუფის დაკვეთით ღია წყაროებზე დაყრდნობით, გაშიფრული მქონდა მისი კონტაქტები რუსეთის სპეცსამსახურებთან. ეს იყო ლოგიკური ანალიზის ფორმატში მომზადებული ვერსია, ვარაუდი, რაც ვანო მერაბიშვილმა და მისმა მოადგილე ამირან მესხელმა პირადად დამიდასტურეს. მერაბიშვილი ე. წ. მოდულის შენობაში შემხვდა და მკითხა, ვინ მოგაწოდა ეს მასალა, წყარო დამისახელე და დღესვე გაგიშვებო. ვკითხე, ამ მასალაში არის ისეთი რამ, რაც რეალობას არ შეესაბამება-მეთქი? რომ შეესაბამება, იმიტომაც დაგაპატიმრეთო. რა თქმა უნდა, წყაროებს ვერ დავუსახელებდი, იმიტომ, რომ მე გავაკეთე ღია წყაროების სეგრეგაცია და, უბრალოდ, ვივარაუდე ეს”
მაისაია ამბობს, რომ ეს მასალები დღემდე ინახება მის საქმეში, რასაც, ჯერჯერობით, საიდუმლო გრიფი ადევს. სამხედრო ანალიტიკოსმა დღეს მთავარ პროკურატურას მიმართა და მის საქმეზე გრიფის მოხსნა მოითხოვა.
