“რესპუბლიკელი” მარინა სუნგულია პირველი იყო, ვინც 2010 წელს კალანდის დღესასწაული გააკრიტიკა. ის დღეს ამბობს, რომ გუშინდელ კალანდას და 2010 წლის კალანდას შორის დიდი სხვაობა იყო, რადგან მაშინ კალანდის იმიტირება მოხდა საყვალა სალუქვაძის ოჯახში და ისე იყო გადმოცემული ტექსტით, ვითომ ეს ხდებოდა ყველა გურულის სახლში. ამიტომ იყო ეს შეურაცხმყოფელი. გუშინდელი კალანდა ჩატარდა შალვა რადიანის სახლ-მუზეუმში ანუ თავიდანვე ცნობილი გახდა, რომ ეს იყო იმიტირება და ხალხისთვის, პარლამენტარებისთვის მოხდა კალანდის, ჩვენი ტრადიციების ჩვენება.
საერთოდ, ასეთ შეხვედრას ყოველთვის მოჰყვება მეორე მხარე ანუ საქმიანი შეხვედრა (ჩვენ მიერ მოპოვებული ინფორმაციით, სტუმრები სოფელ დვაბზუდან რესტორან „ქალაქურში“ წავიდნენ და იქ ღამის 00:30 -მდე ქეიფობდნენ ავტ.), სადაც რამდენიმე საჭირბოროტო საკითხზე ვისაუბრეთ.
_ კონკრეტულად, რას ეხებოდა ეს შეხვედრა?
_ ეს არის შიდა სამზარეული.
_ როგორ შეაფასებდით იმ ფაქტს, როდესაც მსახიობების ნაწილმა, რომლებმაც 2010 წელს მიხეილ სააკაშვილს დაუდგეს “კალანდა”,2013 წლის კალანდაშიც მიიღო მონაწილეობა?
_ ისინი მაშინაც მსახიობები იყვნენ და ახლაც მსახიობები არიან და თავის როლს ასრულებენ. აქ პრობლემა ის იყო, რომ მაშინ ისინი იტყუებოდნენ, არ იყვნენ მსახიობები და იყვნენ გურული გლეხები. დღეს არ ვიტყუებით და ვამბობთ, რომ ესენი იყვნენ მსახიობები.
მაჟორიტარი დეპუტატის ზვიად კვაჭანტირაძის თქმით, წლევანდელი კალანდა არ იყო ფარსი.
_ გუშინდელი ღონისძიების მონაწილეებმა კარგად იცოდნენ, რომ ისინი მიდიოდნენ შალვა რადიანის სახელობის ეთნოგრაფიულ სახლ- მუზეუმში. ისიც იცოდნენ, რომ ეს იქნებოდა თეატრალიზებული ღონისძიება. იმის შესახებაც იცოდნენ, რომ მასპინძლების როლში იყვნენ მსახიობები. სულაც არ არის გასაკვირი, დღესასწაულის ფარგლებში პატარა ინსცენირებული ღონისძიება დაიდგას. მინდა ხაზგასმით აღვნიშნო, რომ საქართველოს პარლამენტის თავმჯდომარე, რაც ამ პოსტზე აირჩიეს, რეგიონში ჯერ სტუმრად არ ყოფილა. ჩვენ, გურულებს დაგვდო პატივი და პარლამენტარებთან ერთად გვესტუმრა. კიდევ ის იყო განსხვავება, რომ ჩვენ ჩვენს პარლამენტის თავმჯდომარეს გულწრფელად მივესალმეთ, რასაც ადგილი არ ჰქონდა 2010 წლის კალანდასთან, _ გვითხრა ზვიად კვაჭანტირაძემ.
