დღეს, ორგანიზაცია გამოეხმაურა ზუგდიდში მომხდარ ინციდენტს, როცა ქვეყნის უზენაეს კანონში მორიგი ცვლილებების პროექტის პირველი საყოველთაო-სახალხო განხილვა ხმაურისა და შელაპარაკების ფონზე მიმდინარეობდა.
“საერთაშორისო გამჭვირვალობა – საქართველო” საკონსტიტუციო ცვლილებების კომისიის პირველ გასვლით სხდომას და მასთან დაკავშირებულ მოვლენებს მთელი დღის განმავლობაში აკვიდებოდა.
ორგანიზაციის ცნობით, ზუგდიდის დემოკრატიული ჩართულობის ცენტრში გამართულ შეხვედრაზე კოალიცია “ქართული ოცნების” მხარდამჭერები შეძახილებითა და სტვენით შეხვდნენ საპარლამენტო უმცირესობის წევრებს. შეკამათება “ნაციონალებსა” და ადგილობრივ აქტივისტებს შორის შენობის გარეთ საპროტესტო აქციის ფონზე მიმდინარეობდა – კოალიციის რამდენიმე ათეული მხარდამჭერი აცხადებდა, რომ “ნაციონალური მოძრაობის” წევრებს ზუგდიდში ჩამოსვლის მორალური უფლება არ ჰქონდათ, რამდენიმე მათგანმა დარბაზში ცოცხით ხელში შესვლაც სცადა, თუმცა შეხვედრის ორგანიზატორებმა და საპარლამენტო უმრავლესობის წევრებმა მათ ამის საშუალება არ მისცეს.
“საერთაშორისო გამჭვირვალობა – საქართველოს” ასევე იტყობინება, რომ განსაკუთრებული აგრესიას ადგილობრივები საპარლამენტო უმცირესობის წევრების ნუგზარ წიკლაურისა და აკაკი ბობოხიძის მიმართ იჩენდნენ.
როგორც ორგანიზაცია აღნიშნავს, განხილვის ერთ-ერთი შემაფერხებელი ფაქტორი ისიც იყო, რომ დემორკატიული ჩართულობის ცენტრის შეხვედრების ოთახში არ იყო საკმარისი ფართი განხილვაზე მოსული მოქალაქეების დასატევად.
განხილვას ესწრებოდნენ ადგილობრივი მუნიციპალიტეტის საკრებულოს და გამგეობის წევრებიც.
“საერთაშორისო გამჭვირვალობა-საქართველო” თავის მიმართვაში ასევე აღნიშნავს, რომ შეხვედრის დასრულების შემდეგ პრობლემა შეიქმნა „ნაციონალური მოძრაობის“ წევრების ტრანსპორტირებასთან დაკავშირებით: საპროტესტო აქციის მონაწილეებმა დაბლოკეს გასასვლელი. ერთადერთი, ვინც პოლიციის კორდონის გარეშე მიაღწია ავტომანქანამდე, აკაკი ბობოხიძე იყო. უმცირესობის სხვა წევრებს კი დანიშნულების ადგილამდე მისვლა პოლიციის კორდონის დახმარებით მოუწიათ. “ნაციონალური მოძრაობის” წევრები შეკრებილმა აქტივისტებმა კვერცხების სროლითა და შეურაცხმყოფელი შეძახილებით გააცილეს.
“საერთაშორისო გამჭვირვალობა-საქართველოს” აქვე მოჰყავს საპარლამენტო უმრავლესობის წევრის ზვიად ძიძიგურის განცხადება, რომ საპროტესტო აქცია “ოცნების” ორგანიზებული არ იყო და მოქალაქეების აგრესიის ესმის, თუმცა, ძიძიგურის თქმით, კომისიამ სასწრაფოდ უნდა იფიქროს, განხილვების ორგანიზების ფორმატსა და სხვა დეტალებზე, რითაც ხელი უნდა შეუწყონ პროცესის გაცილებით მშვიდ მდგომარეობაში წარმართვას.
“საერთაშორისო გამჭვირვალობა-საქართველოს” პოზიციით, მიუხედავად იმისა, რომ “ქართული ოცნების” აქტივისტებს “ნაციონალური მოძრაობის” წევრებისადმი არაერთგვაროვანი დამოკიდებულება აქვთ და ხშირად განსხვავებული აზრის მოსმენა მათთვის მიუღებელია, მხოლოდ აზრთა სხვადასხვაობა და საქმიანი დისკუსია შეუწყობს ხელს საკონსტიტუციო ცვლილებების კომისიას მუშაობის ეფექტურად წარმართვას.
ორგანიზაცია რეკომენდაციას უწევს კომისიას, შეიქმნას ეფექტური მექანიზმები იმისთვის, რომ უმნიშვნელოვანესი ცვლილებების განხილვა წარიმართოს კონსტრუქციული და ცივილური ფორმით.
