მათ ყველას ერთი მოთხოვნა ჰქონდათ _ პასუხი გაეცეს კითხვებს: ვინ არის და საიდან მოვიდა გოჩა ჭანტურია, გადადგეს აბაშის საკრებულოს თავმჯდომარე და აპარატი.
აქცია გახსნა ირაკლი რუხაძის მხარდამჭერმა მერაბ მიგინეიშვილმა.
მერაბ მიგინეიშვილი: “ჩვენ დღეს აქ შევიკრიბეთ როგორც ირაკლი რუხაძის, ისე სიმართლის მხარდასაჭერად. ჩვენ ვითხოვთ შეწყვიტონ ცრუ ბრალდებები, ვითომდა “ქართული ოცნების” შიგნით განხეთქილებაა და ვითომდა ცალ-ცალკე ყველა ვხვდებით გოჩა ჭანტურიას და რაღაც ბინძურ შეთანხმებაზე მივდივართ მასთან. ჩვენ მოვითხოვთ პასუხი გასცეს გამგებელმა მოშიმშილე ქალებს, რომლებსაც “ზონდერქალები” უწოდა _ რატომ და რა ფაქტებზე დაყრდნობით აკეთებს ისეთ განცხადებებს, რომლებიც არაერთი ტელე-არხიდან მოვისმინეთ მის მიერ. ჩვენ გაჩერებას არ ვაპირებთ. დღეს სხვა რაიონებშიც ასეთივე მდგომარეობაა. გავერთიანდებით და ყველას დავანახებთ, რომ გვერდით დგომაც ვიცით და ერთმანეთის გატანაც”.
აქციას შემოუერთდა მარტვილის მოსახლეობაც. მათ შეკრებილებს სიტყვით მიმართეს და მხარდაჭერა გამოუცხადეს. აქციაზე იყვნენ ზუგდიდის წარმომადგენლები. “დაიცავი საქართველოს” ლიდერმა კახა მიქაიამ სიტყვით მიმართა აქციის მონაწილეებს:
კახა მიქაია: “მეამაყებით, აბაშელებო! ჩვენ დღესაც ყველა ერთად ვიბრძვით იმ რეჟიმის წინააღმდეგ, რომელსაც ქართველმა ხალხმა განაჩენი 1 ოქტომბერს გამოუტანა. დღეს აქ ვართ ერთად შეკრებილები და კიდევ ერთხელ ყველამ ხმამაღლა ვუთხრათ უკვე ექს-პრეზიდენტ სააკაშვილს, რომ მისმა მატარებელმა ჩაიარა და წავიდეს, მოგვშორდეს, დაგვანებოს თავი და მოგვცეს საშუალება, მშვიდად და სამართლიანად ვაშენოთ ჩვენი მომავალი. ქართველი ხალხი გაჩერებას არ აპირებს. აქციები დღეს აბაშიდან დაიწყო, ხვალ ყველანი ზუგდიდში შევიკრიბებით. ვისაც სურვილი გაქვთ, შემოგვიერთდით. მერე სხვა რაიონში და ქალაქში გადავინაცვლებთ და ერთხელ და სამუდამოდ დავამთავრებთ სამეგრელოში სააკაშვილის და მისი ბანდფორმირებების სისხლიან რეჟიმს. ასე რომ, გელოდებით ხვალ, ზუგდიდში, 12 საათიდან.”
მალე აქციას “ქართული ოცნების” ახალგაზრდული ფრთა შემოუერთდა. ახალგაზრდებს ოვაციით და ტაშით შეხვდნენ იქ შეკრებილები. აქციაზე სიტყვით ახალგაზრდული ფრთის აქტივისტი თორნიკე ქარცივაძე გამოვიდა.
თორნიკე ქარცივაძე: “ჩვენ, “ქართული ოცნების” ახალგაზრდული ფრთის აქტივისტები სოლიდარობას ვუცხადებთ აბაშელ მოშიმშილეებს, მაგრამ ჩვენ აქ შევიკრიბეთ ერთი მოთხოვნით: ვითხოვთ პასუხს – თუ აბაშის ახალი გამგებელი, საკრებულო და გამგეობა ახალი მთავრობის და “ოცნების” იდეების გამზიარებლები არიან, მაშინ რატომ გვებრძოდნენ, გვავიწროვებდნენ და გვდევნიდნენ მთელი 8 თვის განმავლობაში? თუ გოჩა ჭანტურია მართლაც “ქართული ოცნების” მხარდაჭერილი კანდიდატია, მაშინ სად იყო ის ამ თვეების მანძილზე და რატომ ერთხელაც არავის უნახავს “ოცნების” გვერდით? ის ამბობს, რომ არ არის ნაციონალი, მაშინ რატომ მოვიდა იმ გუნდის მხარდაჭერით და რატომ არის დღესაც მათთან და არა ჩვენთან? ჩვენ ვართ ის ახალგაზრდები, რომლებსაც დღე და ღამე გაერთიანებული გვქონდა წინა ხელისუფლების შესაცვლელად და სწორედ ამიტომ ვაძლევთ თავს უფლებას დავსვათ ეს კითხვები და პასუხსაც მოვითხოვთ”.
აქციაზე სოფელ სუჯუნიდან ცხენებით ჩამოვიდნენ “ოცნების” აქტივისტები. ჩვენ ერთ-ერთ მათგანს გავესაუბრეთ.
ნუგზარ მიმინოშვილი: “ჩვენ სიმბოლურად ცხენებით ჩამოვედით სოფლიდან, რადგან დიდი კონსტანტინეს სამშობლოში სტუმრებს ოდითგანვე ცხენებზე ამხედრებულები ხვდებოდნენ. დღეს აბაშაში სტუმრები არიან სხვადასხვა ქალაქებიდან და ჩვენც პატივისცემა გამოვხატეთ მათ მიმართ. ჩვენ მხარს ვუჭერთ ირაკლი რუხაძეს და მოვითხოვთ ერთხელ და სამუდამოდ დასამარდეს ნაციონალური მოძრაობა და მისი უკანონო ქმედებები. ჩვენ მთელი წინასაარჩევნო პერიოდი, აქ შეკრებილ ადამიანებთან ერთად, რა არ გადავიტანეთ და გოჩა ჭანტურიას სახელი არასდროს გაგვიგონია. ახლა რა უნდა? საიდან მოვიდა?”
აქციის მონაწილეებმა კიდევ ერთხელ დააფიქსირეს მათი მხარდაჭერა გამგებლობის კანდიდატ ირაკლი რუხაძის მიმართ. აქციის დასასრულს ადვოკატმა ხალხს როლანდ შონიამ მიმართა:
როლანდ შონია: “დღეს, როგორც იცით, სასამართლოდან ველოდებით განჩინების პასუხს. სასამართლო ჯერ კიდევ კუბლაშვილის დაქვემდებარებაშია და მეეჭვება, სამართლიანი გადაწყვეტილება იქნას გამოტანილი, მაგრამ ჩვენ კანონიერად ვმოქმედებთ. მივდივართ სენაკში და იქ ველოდებით სასამართლო გადაწყვეტილებას. ვისაც სურვილი გაქვთ, შემოგვიერთდით და წავიდეთ სენაკში”.
აქციის მსვლელობას გამგეობის და საკრებულოს თანამშრომლები კაბინეტების ფანჯრებიდან აკვირდებოდნენ. მოშიმშილეები კი შიმშილობას განაგრძობენ და დარწმუნებულები არიან, რომ “ყველაფერი ეს ერთად აღებული კარგს შედეგს გამოიღებს”.
აბაშაში ისევ ხალხმრავლობაა და ყველა მოუთმენლად ელოდება სასამართლოს გადაწყვეტილებას.
