მინისტრმა 2013 წლის სამომავლო გეგმებზე ისაუბრა რეგიონების მიხედვით. ჟურნალისტებს დაურიგდათ მასალა როგორც საქართველოში, ისე რეგიონების მიხედვით განსახორციელებელი 
ინფრასტრუქტურული პროექტების შესახებ. შეხვედრა დაახლოებით სამი საათის განმავლობაში გაგრძელდა და მინისტრმა და მისმა მოადგილეებმა ყველა იმ კითხვას უპასუხეს, რაც რეგიონული მედიის ჟურნალისტებმა დაუსვეს.
საქართველოს რეგიონული განვითარებისა და ინფრასტრუქტურის მინისტრმა თავად გააცნო ჟურნალისტებს 2013 წლის სამოქმედო გეგმა და განაცხადა, რომ ამ წელს სამინისტროს საქმიანობა ორი ძირითადი მიმართულებით – რეგიონული განვითარებისა და ინფრასტრუქტურის მოწესრიგების მიმართულებებით გახორციელდება.
როგორც დავით ნარმანიამ განაცხადა: “რეგიონული განვითარების თვალსაზრისით, განსაკუთრებული ყურადღება დაეთმობა ადგილობრივი თვითმმართველობის რეფორმის გახორციელებას და მის ფარგლებში დაგეგმილ ღონისძიებებს, რაც მოიცავს: მმართველობის სისტემის დეცენტრალიზაციის, ადგილობრივი თვითმმართველობის ოპტიმიზაციისა და გაძლიერების, ხელისუფლების რეგიონული დონის მოდიფიცირებისა და სრულყოფის მიმართულებით დაგეგმილ ღონისძიებებს. მნიშვნელოვან რეფორმებთან დაკავშირებული საკანონმდებლო ინიციატივების მომზადებას. ასევე, რეფორმების გახორციელების სამართლებრივ-ტექნიკურ უზრუნველყოფასა და კოორდინაციას; რეგიონული განვითარების სტრატეგიების შემუშავებისა და გახორციელების სისტემის სრულყოფას.”
განსაკუთრებული ყურადღება დაეთმო შეხვედრაზე ინფორმაციის გამჭვირვალობის საკითხს, როგორც მედიასთან და არასამთავრობო ორგანიზაციებთან, ასევე მოქალაქეებთან მიმართებაში.
ამ მიზნით, მოხდება სამინისტროს და მის დაქვემდებარებაში მყოფი სტრუქტურული ერთეულების ვებ-გვერდების მოდერნიზება. დაინტერესებულ პირებს შესაძლებლობა ექნებათ, მათთვის საინტერესო ყველა საჯარო ინფორმაცია მოიძიონ აღნიშნულ ვებ-გვერდებზე. ასევე: დაგეგმილი და მიმდინარე პროექტების მონიტორინგის პროცესში აქტიურად ჩერთვებიან არასამთავრობო ორგანიზაციები; პერიოდულად ჩატარდება დონორ ორგანიზაციებთან საკოორდინაციო და საინფორმაციო შეხვედრები და საჯარო ინფორმაციის გაცემაზე პასუხისმგებელი პირის მეშვეობით მოხდება საჯარო ინფორმაციის გაცემა დაინტერესებულ ფიზიკურ და იურიდიულ პირებზე. შიდა აუდიტის სამსახურის მიერ კი გატარდება მონიტორინგი საჯარო ინფორმაციის გაცემაზე.
თვითმმართველობის საყოველთაო რეფორმასთან დაკავშირებით ითქვა, რომ მიმდინარეობს მუშაობა საკანონმდებლო ინიციატივაზე, რომელიც ეხება თვითმმართველობაში მოქალაქეთა მონაწილეობის მრავალფეროვანი და ქმედითი მექანიზმების ინსტიტუციონალიზაციას.
როგორც მინისტრის მოადგილე თენგიზ შერგელაშვილმა განაცხადა, საკანონმდებლო ინიციატივის თანახმად, მოსახლეობის ინტერესების დაცვის მიზნით, ყველა დასახლებულ პუნქტში აირჩევა მამასახლისი და საზოგადოებრივი საბჭო, რაც ხელს შეუწყობს მმართველობით პროცესებში საზოგადოების მონაწილეობის ეფექტური სისტემის ჩამოყალიბებას.
მინისტრის მოადგილის თქმით, ეს საკითხი, როგორც სამინისტროს საკანონმდებლო ინიციატივა, პირველად სწორედ რეგიონულ მედიასთან გაჟღერდა და ექსკლუზივია რეგიონული მედიისთვის.
