გადაწყდა, რომ აღმაშენებლის ხეივნის მე-10 კილომეტრზე, სადაც ცოტა ხნის წინ ორსადარბაზოიანი ცხრასართულიანი კორპუსის მშენებლობა დაიწყო, მართლმსაჯულების სახლი აშენდება.
ახალი ობიექტის გაბარიტები და მოცულობა ბევრად ნაკლებია. მართლმსაჯულების სახლის მშენებლობაზე ტენდერი იუსტიციის საბჭოს საერთო სასამართლოების დეპარტამენტმა ორი თვის წინ გამოაცხადა. 870 ათას ლარად ღირებული პროექტი შპს “ბაღდათრემშენმა” მოიგო. მართლმსაჯულების სახლი, რომელიც უკვე არსებულ ბეტონის საძირკველზე დაშენდება, სამი ნაწილისაგან შედგება _ პირველ ნაწილში ადმინისტრაცია, სასწავლო აუდიტორიები და სასტუმროს ტიპის საერთო საცხოვრებელი განთავსდება, მეორე ნაწილში დარბაზი, რომელიც 150 კაცს დაიტევს, მესამე ნაწილი კი ამ ორი ნაწილის შემაერთებელი ვესტიბიულია.
58 მოსამართლე, რომლებიც თანადაფინანსების პრინციპით სახელმწიფოსგან საცხოვრებელს ელოდა, უბინაოდ დარჩა. პროექტის შეცვლის მიზეზი უცნობია. სავარაუდოდ, ეს ბანკების მიერ მოსამართლეებისთვის კრედიტების გაცემაზე უარის თქმას უკავშირდება. დღეს მოქმედი მოსამართლეების მომავალი გაურკვეველია, ბანკებს კი გარისკვა არ სურთ.
ხელშეკრულებაში, რომელიც გასულ წელს საერთო სასამართლოების დეპარტამენტმა კომპანია “ზიმოსთან” გააფორმა, ნათქვამი იყო, რომ ბინა თანადაფინანსების პრინციპით შენდებოდა. ღირებულების 33%-ს ანუ 2 012 838 ლარს სახელმწიფო გადაიხდიდა, დანარჩენ 67% -ს კი საერთო სასამართლოების თანამშრომლები. ამასთან დაკავშირებით “საერთო სასამართლოების დეპარტამენტსა და საქართველოს ბანკს შორის მემორანდუმიც კი გაფორმდა.
საერთო სასამართლოების დეპარტამენტი საცხოვრებელი კორპუსის ამშენებელ კომპანია “ზიმოს” 1,5 მილიონი ლარის გადახდას 2012 წლისთვის დაპირდა. დარჩენილი ნახევარი მილიონი კი 2013 წელს უნდა დაეფარა.
მოსამართლეებისთვის ბინების აშენება გასული წლის ზაფხულში გადაწყდა, ცხრასართულიან კორპუსში ოროთახიან ბინას 58 მოსამართლე მიიღებდა. მოსამართლეთა საცხოვრებლის მშენებლობაზე სახელმწიფო ბიუჯეტიდან გამოყოფილი 6 200 ათასი ლარი 2012-2013 წლის ბიუჯეტით იყო გათვალისწინებული.
“გურია ნიუსი” პირველი მედიასაშუალება იყო, რომელმაც მოსამართლეებისთვის ბინების მშენებლობის ფაქტი გააჟღერა. უზენაესმა სასამართლომ “გურია ნიუსს” განუცხადა, რომ რეგიონებიდან სხვადასხვა ტრეინიგებზე ჩამოსულ მოსამართლეებს ეს ბინები დროებით სარგებლობაში გადაეცემოდათ: “ჩვენ ამ მოსამართლეებისთვის ქირას ვიხდით, რაც საკმაოდ ძვირი გვიჯდება. ამიტომ მივიღეთ გადაწყვეტილება, რომ აშენდეს უწყებრივი სახლი, სადაც მოსამართლეები დროებით იცხოვრებენ”, _ განაცხადა უზენაესი სასამართლოს პრესსამსახურის ხელმძღვანელმა ნანა ვასაძემ.
გასული წლის ოქტომბერში საპარლამენტო უმრავლესობის წევრმა თინა ხიდაშელმა სახელმწიფოს მიერ მოსამართლეებისთვის ბინის მშენებლობას გაუმართლებელი ხარჯი უწოდა: “არც ერთ შემთხვევაში არ მიმაჩნია ეს მიზანშეწონილად. ვერ ვხედავ იმის აუცილებლობას, რომ სახელმწიფომ ბინები აუშენოს იმ ადამიანებს, რომლებსაც სახელფასო და სოციალური მდგომარეობიდან გამომდინარე, გარანტირებული ცხოვრება აქვთ. ამასობაში ჩვენ მოსახლეობის ნახევარზე მეტი სიღარიბის ზღვარზე გვყავს. ჩვენ არ ვცხოვრობთ იმგვარ ქვეყანაში, სადაც სახელმწიფომ საკუთარ თავს ამგვარი ფუფუნების უფლება უნდა მისცეს. ყოვლად გაუმართლებლად მიმაჩნია ამის გაკეთება”, _ განაცხადა ხიდაშელმა “გურია ნიუსთან” საუბრისას.
ტენდერში გამარჯვებულ კომპანიასთან გაფორმებული ხელშეკრულების მიხედვით მართლმსაჯულების სახლის მშენებლობა 2013 წლის დეკემბერში უნდა დასრულდეს.
