სია 18 ადამიანისაგან შედგება, რომელიც წყაროს ცნობით, ახალ მთავრობაში ნათესაობის ნიშნით დასაქმდა.
სიის თავში უმაღლესი საბჭოს იურიდიულ, საკადრო და საქმისწარმოების დეპარტამენტის მიწვეული სპეციალისტი გელა ღოღობერიძე წერია. ღოღობერიძის შესახებ წყაროს მითითებული აქვს, რომ იგი უმაღლესი საბჭოს დეპუტატის, საფინანსო და ეკონომიკურ საკითხთა კომისიის თავმჯდომარის ალექსანდრე ჩიტიშვილის ცოლის ძმაა.
“გურია ნიუსი“ აჭარის საკანონმდებლო ორგანოს დეპუტატ ალექსანდრე ჩიტიშვილს დაუკავშრიდა. ჩიტიშვილი ადასტურებს, რომ ღოღობერიძე მისი ცოლის ნათესავია
“ცოლის ძმა არ არის, მაგრამ ცოლის ახლობელი არის, მართალი გითხრათ. მაგრამ მინდა იცოდეთ, რომ გელა ღოღობერიძე იყო “ქართულ ოცნებაში” კოორდინატორი. 5 წელია არის წარმატებული ადვოკატი და არის კარგი იურისტი და შეირჩა ამის მიხედვით და არა იმის მიხედვით, რომ ვინმეს ნათესავია” –ამბობს ჩიტიშვილი.
უმაღლესი საბჭოს დეპუტატი ზოგადად ნათესაობით დანიშვნებსაც ეხმაურება და ამბობს, რომ მისთვის მთავარი პროფესიონალიზმია. “მე გეუბნებით მაქვს ერთი პრინციპი: იმ ადამიანებს, რომლებიც არიან განათლებულები, თავიანთი საქმის სპეციალისტები და ამ დროს “ქართულ ოცნებაში” იყვნენ და დიდი წვლილი მიუძღვით იმაში, რაც ქართველ ხალხმა მოიპოვა, ნებისმიერს ეკუთვნის სამუშაო. თუკი ვინმე ვინმეს ნათესავია, მაგრამ თავისი საქმის სპეციალისტი, ამიტომ არ უნდა დაიწყოს მუშაობა? ” – აცხადებს ალექსანდრე ჩიტიშვილი.
საფინანსო და ეკონომიკური კომისიის ხელმძღვანელი ადასტურებს, რომ მის კომისიაში მუშაობს ანზორ დუმბაძის შვილი, თუმცა ამბობს, რომ ანზორ დუმბაძის ოჯახი მურმან დუმბაძეს არ ენათესავება. ანზორ დუმბაძე პოლიციის გენერალია. ასლან აბაშიძის მმართველობის დროს აჭარის შს მინისტრის მოადგილე იყო.
წყაროს მიერ მოწოდებულ სიაში რიგით მეორე ლეილა ღოღობერიძეა. ღოღობერიძე უმაღლესი საბჭოს ჯანდაცვის კომისიის აპარატის უფროსია. წყაროს ცნობით, ლეილა ღოღობერიძე ამ თანამდებობაზე მას შენდეგ დაინიშნა, რაც მისი ქმარი ნუგზარ კეკელიძე აჭარის მთავრობის ადმინისტრაციის უფროსი გახდა.
უმაღლესი საბჭოს აპარატის უფროსის მოადგილე ჯამბულ კურცხალიძე მურმან დუმბაძის მამიდაშვილია, ხოლო როსტომ შერვაშიძე, რომელიც აჭარის სოფლის მეურნეობის მინისტრის მოადგილეა, მურმან დუმბაძის დეიდაშვილია. მურმან დუმბაძის ქვისლი (ცოლის დის ქმარი) სულიკო თებიძე კი აჭარის განათლების მინისტრის მოადგილეა. აჭარის საკანონმდებლო ორგანოშია დასაქმებული მურმან დუმბაძის დის შვილი გიორგი გორაძე.
წყაროს მიერ მოწოდებული სიის მიხედვით, აჭარის განათლების მინისტრის კიდევ ერთი მოადგილე ქეთევან მანელიშვილი, მურმან დუმბაძის ძმის შვილის ნათლიაა.
სიაში მოხვდა აჭარის მთავრობის საზოგადოებასთან ურთიერთობის ხელმძღვანელი ნათია სირაბიძეც. წყაროს ცნობით იგი მთავრობის თავმჯდომარის ცოლის ნათესავია.
“არჩილის მეუღლე არის ჩემი მოგვარე. ბილოგიური ნათესავი არ არის. რა თქმა უნდა, რამდენიმე თაობის იქეთ კავშირები გვაქვს, მაგრამ როგორც ასეთი, ნათესავი არ არის. მე ვფიქრობ, რომ ასეთი რამ არის შეურაცხმყოფელი რადგან 15 წელია უკვე ამ სფეროში ვარ და ჩემი სიტყვა მაქვს ნათქვამი. ისიც არ არის მართალი, რომ მე დამაწინაურეს. მე საქართველოს საკონსტიტუციო სასამართლოს პრესსამსახურის ხელმძღვანელი ვიყავი და სტატუსით სად საქართველოს საკონსტიტუციო სასამართლო და სად აჭარის მთავრობა. შემოთავაზება იყო ამათი მხრიდან და დავთანხმდი” – ამბობს ნათია სირაბიძე.
წყაროს ინფორმაციით აჭარის სოფლის მეურნეობის მინისტრი ზაურ ფუტკარაძე მურმან დუმბაძის ძმის, ნუგზარ დუმბაძის მეგობარია. ნუგზარ დუმბაძის მეგობარია აჭარის ჯანდაცვის მინისტრი ნუგზარ სურმანიძეც.
აჭარის ფინანსთა მინისტრი გიორგი თავართქილაძე კი აჭარის მთავრობის თავმჯდომარის არჩილ ხაბაძის მეჯვარეა.
“გურია ნიუსი” მურმან დუმბაძესთან დაკავშირებას ეცადა. რამდენიმე დღის წინ მურმან დუმბაძე, ავთანდილ ბერიძე, მედეა ვასაძე, გიორგი მასალკინი, ირაკლი ჩავლეიშვილი და აკაკი ძნელაძე აჭარის მთავრობაში არჩილ ხაბაძესთან შეხვედრაზე იმყოფებოდნენ. ორსაათიანი ლოდინის შემდეგ, დუპუტატებმა მთავრობის შენობა დატოვეს, თუმცა არც მურმან დუმბაძემ და არც ავთანდილ ბერიძემ კომენტარი არ გააკეთეს. მათ მიზეზად დროის უქონლობა დაასახელეს და მიმდებარე ტერიტორია დატოვეს. მოგვიანებით, დეპუტატებთან დაკავშირება მობილურის საშუალებით ვცადეთ, თუმცა მათ ჩვენს სატელეფონო ზარებს არ უპასუხეს.
“გურია ნიუსი” ნეპოტიზმთან დაკავშირებულ მურმან დუმბაძის კომენტარს გთავაზობთ, რომელიც ერთი კვირის წინ გააკეთა:
“შავით თეთრზე დაწერეთ, უფრო მსხვილი შრიფტით: ნებისმიერი ადამიანი, ვისაც ერგება და ვფიქრობ, რომ რეკომენდაცია აქვს გასაწევი – გავუწევ! თუნდაც იყოს ჩემი ოჯახის წევრი. აქ არავითარი საფრთხე ამ თვალსაზრისით არ არის. მთავარია, იყოს კვალიფიციური წევრი იმ ადგილისა, რომლის მოპოვებასაც ის აპირებს“ – ამბობს დუმბაძე.
“გურია ნიუსს” კიდევ ერთ წყარომ მიაწოდა ინფორმაცია ნათესაურ კავშირებით დანიშნული ადამიანების შესახებ. წყაროს ცნობით, აჭარის მთავრობის ადმინისტრაციის უფროსი ნუგზარ კეკელიძე ავთანდილ ბერიძის ქვისლია. ქედის გამგებლადაა წარდგენილი ავთანდილ ბერიძის ბიძაშვილი. კიდევ ერთი სავარაუდო დანიშვნა აჭარის ტელევიზიას ეხება. როგორც წყარო ამბობს, აჭარის ტელევიზიის საინფორმაციო სამსახურის უფროსად დანიშვნას მურმან დუმბაძე თავის ძმისს შვილს ნათია დუმბაძეს უპირებს.
