ალასანიას თქმით, თუკი კონტრდაზვერვის სამსახურს ამ პირებთან დაკავშირებით პრობლემა და კითხვები არ გააჩნიათ, შესაბამისად მისთვის როგორც თავდაცვის მინისტრისთვის, ყველაფერი გარკვეულია.
ჟურნალისტის კითხვაზე, არის თუ არა მზად ალასანია ჯარში დააბრუნოს მუხროვანის ამბოხში მონაწილე კობა ოთანაძე , თავდაცვის მინისტრმა განაცხადა :
“რაც შეეხება ამბოხებას, ჩემთვის, როგორც თავდაცვის მინისტრისთვის, მიუღებელია ამბოხების პრეცედენტიც კი დაიშვას ჩვენს შეიარაღებულ ძალებში და ის ადამიანები, რომლებიც ამბოხების მონაწილეები იყვნენ ან შეიძლება ეჭვმიტანილები იყვნენ ამ საკითხში, რაიმე ფორმით კიდევ დაბრუნდნენ შეიარაღებულ ძალებში.თუკი მათ დანაშაული არ დაუდასტურდათ, მაშინ ბუნებრივია, ყველა კითხვა მოხსნილია. ამბოხებაში ეჭვმიტანილი და წვლილშეტანილი ხალხი ეს არის თავისთავად საფრთხე ისეთი უწყებისთვის, რომელიც მკაცრ სუბორდინაციაზეა აწყობილი. ამიტომ, ჩვენ ასეთი ადამიანების მიმართ არ ვიქნებით ტოლერანტული.”
თავდაცვის მინისტრის თქმით, სამინისტროში შეიქმნა სპეციალური კომისია, რომელიც ჯარიდან სხვადასხვა მიზეზებით დათხოვნილი ოფიცრების შეიარაღებულ ძალებში დაბრუნების საკითხს სწავლობს. ამ დროისათვის დაბრუნების სურვილი 3 ათასზე მეტმა ოფიცერმა გამოთქვა.
“თუ ოფიცერს აქვს სათანადო განათლება და გამოცდილება, ამ შემთხვევაში მოხდება მისი კანდიდატურის განხილვა. ამ დროისათვის დაახლოებით 3 ათასი განცხადებაა შემოტანილი იმ ადამიანების მიერ, ვინც თავდაცვის სამინისტროდან სხვადასხვა მიზეზებით, მათ შორის პირადი შეუთავსებლობისა და პოლიტიკური ნიშნით დაითხოვეს.” _ განაცხადა ალასანიამ.
