ურთიერთბრალდებების კასკადი არ წყდება, პირიქით, უფრო და უფრო მწვავდება. ადგილობრივ მედიაში, თითქმის, ერთი თვეა, საინფორმაციო ომია გაჩაღებული, რომელსაც ბოლო აღარ უჩანს.
“გურია ნიუსში” გამოქვეყნებული მასალის პასუხად, რომელშიც ზაზა ურუშაძის პოზიცია იყო გაჟღერებული, ამირან ქანთარიამ საპასუხო წერილი დაწერა. ეტყობა, ამ თემაზე მომავალი გამგებელი ძალზე მწვავედ რეაგირებს. მის მიერ ჩატარებული პრესკონფერენცია, სწორედ მასსა და ქანთარიას შორის არსებულ დაპირისპირებას ეძღვნებოდა. ზაზა ურუშაძე მონდომებით ცდილობს დაიცვას თავი და ექიმის ბრალდებებს კონტრბრალდებებით პასუხობს.
წინა კვირაში გამართულ შეხვედრაზე კოალიცია “ქართული ოცნების” შტაბ-ბინაში ურუშაძემ იქეთ დაადანაშაულა გარდაცვლილი შოთა ქანთარია, დიდი რაოდენობით ფულის მითვისებაში. ამაზე გარდაცვლილის ძმას მხოლოდ ერთი პასუხი აქვს: “ეს არის უნამუსობა, რომელიც ძველი საქმეების გადასაფარად სჭირდება ურუშაძეს”.
,,გურია ნიუსს“ გთავაზობთ წერილს, რომლის ტექსტსაც უცვლელად გთავაზობთ:
“ჯერ არმოსული გამგებლის სიცრუეთა კასკადი, ანუ როგორ ,”პატიობს” ყაზახეთის პოლიცია დიდი რაოდენობით თანხების დატაცებას ქართველებს, საქმის ქურდების გარჩევის შემდეგ.
“მიმდინარე წლის 17 იანვარს “გურია ნიუსში’” ლანჩხუთის გამგებლობის მსურველმა ზაზა ურუშაძემ, კიდევ ახალი სიცრუე გააჟღერა და არა მარტო სიცრუე, მან ცილი დასწამა 7 წლის უკან გარდაცვლილ კაცს. იგი ამბობს, რომ თითქოს შოთა ქანთარიამ დიდი რაოდენობით თანხა მიითვისა და ყაზახეთის პოლიცია ეძებდა, მერე საქართველოში დააკავეს და ურუშაძეს გამოუძახეს შსს-ში.
ჩემი ძმა შსს-დან რამდენიმე საათში გაათავისუფლეს, როგორ გაიტაცეს და რანაირად მოხდა შსს-ში და ა.შ. ეს კიდევ სხვა თემაა. თუ შოთა ქანთარიას ყაზახეთის პოლიცია ეძებდა, რატომ გამოუშვებდნენ რამდენიმე საათში შსს-დან და ამის შემდეგ რატომ და ვინ გადასცა საქმე ქურდებს, რომლებმაც ჩემი ძმა გაამართლეს. აქედან გააკეთეთ დასკვნა: თურმე, ყაზახეთის პოლიციამ ჩემ ძმას დიდი რაოდენობით მითვისებული თანხა დიდსულოვნად აჩუქა, რადგანაც საქმე ქურდებმა გაარჩიეს. წარმოგიდგენიათ ასეთი აბსურდი? ამას რომ გამგებლობის მსურველი იტყვის, არის თუ არა ის ადეკვატური? ბატონო თემურ! რას გვერჩით ლანჩხუთლებს? შენ ხომ აქ, ლანჩხუთში დაიბადე და გაიზარდე, გადამთიელი ხომ არ ხარ, რატომ გვახვევ თავს ლანჩხუთლებს ასეთ, რბილად რომ ვთქვათ, ცრუ ადამიანს გამგებლად, რა დაგიშავეს ლანჩხუთლებმა? მთელი ლანჩხუთი ხომ დაგიდგა გვერდით არჩევნებზე. არ თქვა, ახლა, არ ვერევი მაგ საქმეშიო. ამ კაცს, ზაზა ურუშაძეს ან ჩვენ, ლანჩხუთლები ვგონივართ უაზროები ან თვითონ მას მოთხოვე ჯანმრთელობის ცნობა, საიდან მოაქვს ეს ცრუ აზრები, ან ეს ცილისწამებლური, ერთმანეთთან წინააღმდეგობრივი, ალოგიკური აზრები. კარგად წაიკითხე ,,გურია ნიუსის’’ ზემოაღნიშნული ნომერი, იქვე მიხვდები ამ არაკაცურ სიცრუეს _ ვინ ვის წამებს ცილს.
ასეთ პიროვნებასთან საუბრის თუ პოლემიკის სურვილიც დამეკარგა. ურჩიე მას, რომ ჩემი სახელის ხსენებას საერთოდ თავი დაანებოს, თორემ ლანჩხუთლებს ძალიან ბევრი გვაქვს სათქმელი.“
წერილს ხელს, ამირან ქანთარია, მედიცინის მეცნიერებათა დოქტორი, ასოცირებული პროფესორი აწერს.
“ზაზა ურუშაძემ კოალიცია “ქართული ოცნების” შტაბ-ბინაში პრესკონფერენცია გამართა, სადაც ამ თემის ირგვლივ წარმოშობილ კითხვებსაც უპასუხა. მან აღნიშნა, რომ ამირან ქანთარიას წინააღმდეგ, ოზურგეთის რაიონულ სასამართლოში სარჩელი შეიტანა და ჟურნალისტებს დაპირდა, რომ ყველა დეტალი პრესისთვის ხელმისაწვდომი იქნება.
ამირან ქანთარიამ ჩვენთან ამ დავის ირგვლივ არსებულ წვრილმანებზეც ისაუბრა, მაგრამ ამ ეტაპზე თავს იკავებს მისი გამოქვეყნებისგან. იგი მოვლენების განვითარებას დაელოდება და მხოლოდ ამის შემდეგ ისაუბრებს საჯაროდ დეტალებზე.
პრესკონფერენციას კოალიციის მხრიდან ვახტანგ ზენაიშვილი ესწრებოდა. ლანჩხუთში ძალიან აქტუალურია ხმები, რომლის მიხედვითაც ვახტანგ ზენაიშვილი, ურუშაძის გამგებლად დანიშვნის შემთხვევაში, მის მოადგილედ დაინიშნება. ზაზა ურუშაძემ დაადასტურა ამ ხმათა ნამდვილობა და აღნიშნა, რომ ეს მისი პირადი ინიციატივაა. ამის პარალელურად, რომან ბიწაძის კანდიდატურაზეც აქტიურად საუბრობენ, თუმცა, ურუშაძე ამბობს, რომ ამ თემასთან დაკავშირებით მასთან არავის უსაუბრია.
პრესკონფერენცია ძირითადად ექიმ ამირან ქანთარიას და ზაზა ურუშაძეს შორის არსებულ უთანხმოებას ეხებოდა. ზაზა ურუშაძე შეეცადა, ამ უსიამოვნო ხმებიდან ” ერთხელ და სამუდამოდ” გათავისუფლებულიყო.
“გურია ნიუსი” ზაზა ურუშაძეს დაუკავშირდა:
_ მაგ საკითხთან დაკავშირებით, უკვე კომენტარებისგან მაქსიმალურად თავს შევიკავებ, მე მივმართე უკვე ოზურგეთის რაიონულ სასამართლოს, სადაც გაირკვევა სიმართლე. მე ვეცდები, ჩემი სიმართლე სასამართლოს გზით დავამტკიცო, მჯერა, რომ ვარ მართალი ადამიანი, მე მაგ საქმესთან შეხება არასდროს მქონია, ეს არის ცილისწამება ჩემს მიმართ.
_თქვენ აცხადებთ, რომ ხართ აბსოლუტურად მართალი. მაშინ ვის უნდა აწყობდეს მსგავსი სიტუაცია? რა მიზნით ხდება ეს ყველაფერი?
_რა თქმა უნდა, არიან დაინტერესებული პირები, რომელთაც უნდათ რაიონის გამგებლობა და ამიტომ, ჩემი ვარაუდით, ამასთან არის დაკავშირებული, მეტი არაფერი. მე ვერ ვხვდები, რაშია საქმე, ვფიქრობ, ეს ადამიანია შეცდომაში შეყვანილი. ამიტომ ყველაფერს სასამართლო გაარკვევს, _ გვითხრა ურუშაძემ.
ლანჩხუთის მაჟორიტარი დეპუტატი თემურ ჩხაიძე “გურია ნიუსთან” აცხადებს, რომ ზაზა ურუშაძეს მხარს უჭერს და დარწმუნებულია მის სიმართლეში:
_რაც შეეხება ზაზა ურუშაძეს, მე თვითონ ვარ ძალიან დაინტერესებული, რომ ზაზა ურუშაძემ გაიმართლოს თავი, თუმცა დარწმუნებული, ვარ რომ თავის გასამართლებელი არაფერი არ აქვს, მაგრამ მაინც, ის კითხვები რაც არსებობს მისი მისამართით, ყველას გაეცეს პასუხი ლანჩულებისა და მთელი საზოგადოების წინაშე. რა თქმა უნდა, აუცილებელია, რომ ყველა ლანჩხუთელმა იცოდეს, ვინ არის და რას წარმოადგენს ეს პიროვნება, მე დარწმუნებული ვარ, რომ ის გამართლებული კაცი იქნება.
– ბატონო თემურ, ეს ადამიანი, ამირან ქანთარია, მოგმართავთ თქვენ, რომ ზაზა ურუშაძის მხარდაჭერისთვის ლანჩხუთლებს თვალში ნაცარს აყრით და ლანჩხუთი ამას არ იმსახურებს. _ბატონ ამირანს მე ახლოს ვიცნობ, მაგრამ მე არავითარი საუბარი არ მქონია მაგ საკითხთან დაკავშირებით. მე ვთვლი, რომ ეს არის ჩემი სწორი გადაწყვეტილება და ჩავთვალოთ, რომ ერთ-ერთი საუკეთესო ამ სიტუაციაში.
_ ესე იგი, ბატონო თემურ, ეს არის სწორი გადაწყვეტილება თქვენს მიერ, რომ ზაზა ურუშაძე გახდეს ლანჩხუთის გამგებელი?
_დიახ, მე ასე ვთვლი. ვუჭერ მხარს და სულით და გულით მის გვერდით ვდგავარ, იმიტომ, რომ ამ ადამიანმა, როგორც დეპუტატი, ნამდვილად დამაფასა, ის ერთ-ერთი საუკეთესო კანდიდატია დღევანდელ სიტუაციაში, -გვითხრა თემურ ჩხაიძემ.
ზაზა ურუშაძის უფლებებს სასამართლოში ადვოკატი რეზო გობრონიძე იცავს:
_ ზაზა ურუშაძემ სასამართლოში სარჩელი შეიტანა, მოპასუხე გახლავთ ამირან ქანთარია, მცხოვრები ლანჩხუთში, რომელმაც პრესის საშუალებით გაავრცელა ინფორმაცია, რომ ზაზა ურუშაძე არის არაკეთილსინდისიერი ადამიანი, ასევე აბსურდულია განცხადებები, რომ ის, თითქოს, ადრე უშიშროებაში მუშაობდა, საზოგადოებას მიაწოდა ცრუ ინფორმაცია, იმის შესახებ, რომ თითქოს ის იყო უღირსი ადამიანი. ამირან ქანთარიას მიზანი იყო ის, რომ ზაზა ურუშაძე არ გახდეს გამგებელი და მონაჭორით სურდა, საზოგადოებაში გამოეწვია უარყოფითი დამოკიდებულება ამ პიროვნების მიმართ. ურუშაძემ მიმართა სასამართლოს და ჩვენი მოთხოვნა, რომ დაავალოს სასამართლომ ამირან ქანთარიას, შეწყვიტოს ზაზა ურუშაძის მიმართ ცილისმწამებლური კამპანია და საჯაროდ მოუხადოს ბოდიში ან მტკიცება წარადგინოს, ვინაა ზაზა. საჯაროდ მოიხადოს ბოდიში ცილისწამებისთვის. ეს არის მოქალაქეთა ერთი ჯგუფის მიერ გამოყენებული პიროვნება, რომელიც სხვა კანდიდატის მხარდასაჭერად ცდილობს ამ ადამიანის სახელის გატეხვას. ამ სიტუაციაში ბრალდების ტვირთია მასზეა და მან უნდა დაამტკიცოს ის , რასაც საჯაროდ აცხადებს. აცხადებს გობრონიძე “გურია ნიუსთან”.
