“სხვა გზა არ გვაქვს _ უნდა შევუნდოთ იმ ადამიანებს, რომლებსაც შეეშალათ”

ჩვენ უბეში ჩამალული გიურზა უნდა მოვიშოროთ. ამას დიდი ნებისყოფა სჭირდება და ჩვენ ეს უნდა შევძლოთ! ჩვენ ვართ გურულები, მთლად სასწაულები და ხელი ხელს და მხარი _ მხარს!” _ თქვა ჩოხატაურში “ქართული ოცნების” კონფერენციაზე კონფერენციის თავმჯდომარემ რუსუდან ბერიშვილმა.

“როდესაც კოალიცია იქმნებოდა, ფორსმაჟორი იყო _ ერთ წელიწადში ყველაფერი უნდა მოსწრებულიყო და პარტიას დიდი ყურადღება არ მიქცევია _ კოალიციას მივხედეთ. მე როცა ჩამოვედი და ჩემი შტაბის წევრებს შევხვდი, ვუთხარი, რომ არც “ფორუმი” მაინტერესებდა, არც “რესპუბლიკელები” და არც “ოცნება” _ საქართველოსთვის უნდა მიგვეხედა. ახლა კი დადგა დრო, პარტიის გაძლიერებისთვის ვიზრუნოთ”, _ თქვა კონფერენციაზე ჩოხატაურის მაჟორიტარმა დეპუტატმა თემურ ჭკუასელმა.

“ძალიან მალე იგრძნობს ჩოხატაური ცვლილებებს. ჩემთან ბევრი ადამიანი მოდის _ მათ საჯარო სამსახურის დაწყება უნდათ. მაგრაამ გეტყვით, რომ მალე კერძო სექტორში უფრო პრიორიტეტული იქნება მუშაობა _ ჩოხატაურში რამდენიმე საწარმოს აშენება უკვე გადაწყვეტილია. დაზუსტებით გეტყვით, რომ შემოდგომაზე ყველა სახის ხილს ჩაიბარებენ და თქვენ შემოსავალი გაგიჩნდებათ.

5 თებერვალს ვხვდები განათლების მინისტრს და სკოლებში არსებულ მდგომარეობას პირადად გავაცნობ.ფრანგულ ფირმებთან მაქვს მოლაპარაკება, რომ სიმინდის და ყველის გადამამუშავებელი ქარხანა გაიხსნას. მიღწეულია შეთანხმება, რომ აღდგება გორაბერეჟოულის ტექნიკუმი. ასევე, ვიზრუნებთ ტყეპარკზე,“ _ თქვა ჭკუასელმა “ქართული ოცნების” კონფერენციაზე ჩოხატაურში, რომელსაც 100 დელეგატი ესწრება.