შეხვედრაზე, რომელიც ახალგაზრდა პედაგოგთა კავშირის დარბაზში შედგა, საპარლამენტო უმრავლესობისა და უმცირესობის წარმომადგენლები შეკრებილებს ესაუბრნენ კონსტიტუციაში ცვლილებების შეტანის შესახებ. ეს შეეხებოდა ორ საკითხს _ საქართველოს საკანონმდებლო ორგანოს, პარლამენტის ადგილსამყოფელს და პრეზიდენტის უფლებამოსილებას.
უმრავლესობის წარმომადგენლების ვახტანგ ხმალაძისა და ზაქარია ქუცნაშვილის გამოსვლის შემდეგ, უმცირესობის წარმომადგენლებმა სერგო რატიანმა და ვახტანგ ლემონჯავამ ისაუბრეს, თუმცა, სერგო რატიანის გამოსვლისას, დარბაზის დაწყნარებას დიდი ძალისხმევა დასჭირდა. პარლამენტის ქუთაისში დატოვებაზე მტკიცებითი ფორმით საუბარმა და შესადარებლად ყაზახეთის დედაქალაქ ასტანის მაგალითის მოხმობის გამო, გურულებმა სერგო რატიანი ლამის გარეთ გაუხმეს. ჩოჩქოლის შეჩერება მანანა კობახიძემ შეძლო: გურულებო, ჯანყს ნუ მოაწყობთ, მოვუსმინოთ, თქვენ სტუმრის დახვედრა არ გეშლებათ, დაწყნარდით და მერე გამოთქვით თქვენი აზრიო, _ თხოვნით მიმართა მან გაფიცხებულ გურულებს. დაწყნარებული დარბაზი რატიანმა კვლავ წყობიდან გამოიყვანა, _ მე რომ ვსაუბრობ და არ მაცლით, მართალი ვარ, ესე იგიო.
ამის შემდეგ ხალხის დაწყნარება ძნელი გახდა.
_შენ, შვილო, დაიხსომე, მიშამ თავისი დრო მოჭამა, ბევრი ცუდი გაუკეთა ქვეყანას და მოსცილდით, სამარეში ნუ ჩაყვებით მას, თორემ ის კიდევ უშველის თავის თავს და თქვენ ხალხთან მისახედი პირი აღარ გექნებათ, _ ასე მიმართა ჭარმაგმა გურულმა დარბაზიდან სერგო რატიანს.
უმცირესობის მეორე წარმომადგენელმა ვახტანგ ლემონჯავამ ყაზახეთსა და ასტანაზე საუბარს, ესპანეთში ვალენსიის მნიშვნელობის შესახებ საუბარი არჩია, რამაც კიდევ ერთხელ “გააგიჟა” გურულები და ემოციური რეპლიკებიც უხვად წამოვიდა: _”წადით, გაგვეცალეთ”, “პატრიოტიზმზე პატრიოტებმა უნდა ისაუბრონ და არა თქვენნაირმა ცინიკოსებმა”, “მხოლოდ ერთს გკითხავთ _ შუბლის ძარღვი გაქვთ?”, “პრეზიდენტის მახინჯი ინსტიტუტი ერთხელ და სამუდამოდ მოგვაშორეთ”, “თქვენ გინდათ საქართველოს უკან დაბრუნება, თუმცა, ამას ვერ შეძლებთ. თქვენ კი ხართ უკან, აკვანში დასაბრუნებელი, რომ თავიდან, იქნებ, მოხერხდეს თქვენი აღზრდა”…
ოზურგეთის საკრებულოს ოპოზიციონერმა დეპუტატმა ლელა ნაცვალაძემ ნაციონალ პარლამენტარებს მიმართა, დღეს რომ ამ დარბაზში ეკონომიკური გასაჭირით გამოწვეული ემოციები მძლავრობს, ეს თქვენ არგუნეთ ქვეყანას და ხალხს, თქვენი მოღვაწეობის ცხრა წლის მანძილზეო. დარბაზში მყოფთა უმეტესობა, აშკარად მიემხრო პარლამენტის თბილისში დაბრუნებას და პრეზიდენტის უფლებამოსილების კანონპროექტის ჩარჩოში მოქცევას.
საბოლოოდ, საკმაოდ პოლიტიზირებული იერის მქონე, მაგრამ მაინც ეკონომიკური სიდუხჭირისგან გამოწვეული ემოციის გამომხატველი დარბაზი დაწყნარდა. მანანა კობახიძემ მადლობა მოუხადა მასპინძლებს საკმაოდ ხმაურიანი, ცოცხალი და საინტერესო შეხვედრისთვის. განხილვის მონაწილეები არაერთ პირად პრობლემურ საკითხზე ოზურგეთის მაჟორიტარ დეპუტატს ზვიად კვაჭანტირაძეს, “ქართული ოცნების” თავმჯდომარეს მანანა კობახიძეს და ვახტანგ ხმალაძეს ესაუბრნენ. მათ მიიღეს დაპირებები, რომ პრობლემების მოგვარებაში მაქსიმალურად დაეხმარებიან.
დღევანდელი შეხვედრა “ენდიაის” ორგანიზებით მოეწყო.
