ჩვენ ეხლა დავიწყეთ ეს პროცესი, რათა ელემენტარულად წარმომადგენლობები გვქონდეს რეგიონებში, რაც მე კოალიციის საბჭოზეც დავაყენე და ისიც ავუხსენი ყველას, რომ თავმჯდომარედ დავბრუნდები და ისიც ვუთხარი, რომ ჩემი თავმჯდომარეობა და რეგიონებში მუშაობა იქნება ზომიერი და ეს არ იქნება ისე, რომ ვთქვათ, ხიბლი დაეკარგოს დანარჩენ პარტიებს.
… კიდევ ერთ მაგალითს მოგიყვანთ, როგორ სწრაფად გებულობენ ინფორმაციებს და როგორ სწრაფად გადის ეს გარეთ. აი, ოზურგეთში, მაგალითად, როდესაც ჩვენ პარტიულ ორგანიზაციებს რეგიონებში ვნერგავთ, იქ პარტიული ორგანიზაციის ხელმძღვანელად, ჩემი სტუდენტობის დროინდელი მეგობარი, დავით დარჩია აურჩევიათ ჩვენებს, ახალი პარტია მაქვს მხედველობაში. დავით დარჩია ჩამოვიდა თბილისში და მეუბნება, რომ იქაური პოლიციის უფროსი მივიდა მასთან და ეუბნება, რაღა გინდა ამ პარტიაში, იქ ყველაფერი გადაწყვეტილია, ყველა პროცესი დასრულებულია, ირაკლი ალასანია იქნება პრეზიდენტი და ჯობია, იმ გუნდში წამოდი, რაღა გინდა აქო. აი, ეს ელემენტარული უყურადღებობა იყო ირაკლის მხრიდან, რაც სულ სხვანაირად გავრცელდა რეგიონებში…”
საქართველოს პრემიერ-მინისტრის, ბიძინა ივანიშვილი ამ განცხადების შემდეგ, „გურია ნიუსი“ „ქართული ოცნების“ ოზურგეთის რაიონული ორგანიზაციის თავმჯდომარეობის კანდიდატს, დავით დარჩიას დაუკავშირდა.
(ფოტოზე: მარჯვნივ დავით დარჩია და მარცხნივ ოზურგეთის გამგებელი კოტე შარაშენიძე)
დავით დარჩია ამ ეტაპზე დეტალებზე არ საუბრობს და ამბობს, რომ რადგან პრემიერ-მინისტრმა გააკეთა ეს განცხადება, სიმართლეს შეესაბამება.
_ ბატონო დავით, ცნობილი ხდება, რომ ერთ-ერთმა სამართალდამცავმა გითხრათ, „ქართული ოცნების“ რაიონული ორგანიზაციის თავმჯდომარე ნუ იქნებით, რადგან საქართველოს პრეზიდენტი ირაკლი ალასანია ხდებაო და მათ გუნდში გადასვლა გირჩიათ.
_ არ ვიცი, რას მეუბნები, უბრალოდ ახლა არ შემიძლია…
_ ეს განცხადება პრემიერ-მინისტრმა გააკეთა.
_ პრემიერ-მინისტრი დიდი თანამდებობის პირია და სიცრუეს ხომ არ იტყოდა?
_ ანუ სიმართლეა, რასაც ამბობს ბატონი ბიძინა ივანიშვილი.
_ დღეს, მოკლედ მეტს ვერაფერს გეტყვით, შეგიძლიათ ხვალ დამიკავშირდეთ, _ გვითხრა დავით დარჩიამ.
გაეხვა თუ არა შსს გურიის სამხარეო პოლიციის სამმართველოს უფროსი, ზაზა პეტრიაშვილი სკანდალში? – ამ კითხვაზე პასუხი ჯერ გაუცემელია, რადგან ზაზა პეტრიშვილი „გურია ნიუსის“ ზარებს არ პასუხობს. ამ დღეებში, ჩვენთვის ცნობილი გახდა, რომ მას თანამდებობას ატოვინებინებდნენ, მაგრამ ეს ინფორმაცია შინაგან საქმეთა სამინისტროს პრესამსახურის ხელმძღვანელმა, ნინო გიორგობიანმა არ დაადასტურა. რამდენადაც ჩვენთვისაა ცნობილი, ზაზა პეტრიაშვილი ამ ეტაპზე თბილისში იმყოფება და არ არის გამორიცხული, რომ ეს ვიზიტი დავით დარჩიას საქმეს უკავშირდებოდეს.
