ირაკლი ჩავლეიშვილი ამბობს, რომ მას ნდობა უკვე გამოუცხადეს და ბათუმის საკრებულოს თავმჯდომარე სავარაუდოდ ის იქნება. მას საკრებულოს სხვა წევრები იმედი აქვს, რომ კირთაძის გადარჩევას მხარს დაუჭერენ. შესაძლოა თუ არა, რომ საკრებულოს უმრავლესობამ ვერ შეძლოს გიორგი კირთაძის გადაყენება და თანამდებობა კიდევ 3 თვით შეუნარჩუნდეს, ამაზე ჩავლეიშვილი გვპასუხობს:
“მართალი გითხრა, მაგის გარანტია არავის აქვს, მაგრამ ეს 12 კაცი, რომელიც აწერს ხელს, პასუხისმგებლობით სავსე ხალხია და იციან რაზეც აწერდნენ ხელს და ამას რა პროცედურებიც მოყვება. ხელისმოწერა ნიშნავს იმის დასტურს, რომ ესენი ითხოვენ რიგგარეშე სხდომის მოწვევას საკრებულოს თავმჯდომარის გადარჩევის მოთხოვნით. ვნახოთ, ერთი კვირის თავზე ვინ როგორ მოიქცევა” – აცხადებს ჩავლეიშვილი.
საკრებულოს მოქმედი თავმჯდომარე კი ამბობს, რომ კოლეგები კანონს არღვევენ, რადგან საკრებულომ ერთხელ უკვე იმსჯელა თავმჯდომარის გადაყენების შესახებ და 3 თვის განმავლობაში მისი გადაყენება არ შეუძლიათ. 3 თვიანი ვადა 19 თებერვალს გადის, დეპუტატები კი ვადის ამოწურვამდე ერთი კვირით ადრე ითხოვენ კირთაძის გადაყენებას.
“როგორც “ქართული ოცნება” ცდილობს, რომ გადამაყენოს, მეც ვეცდები რომ შევინარჩუნო. პოლიტიკური პროცესია და სწორადაც ცდილობენ, მაგრამ კანონს რატომ არღვევენ ვერ ვხვდები. ორი კვირის მერე რომ გადამაყენონ, პრობლემა არ არის, ხელს ჩამოვართმევ, უკან გადავჯდები და მე გავხდები ოპონენეტი ახალი საკრებულოს თავმჯდომარის. მინდა გითხრათ, რომ მაინცა და მაინც კომფორტულ გარემოში არ დავტოვებ ახალ თავმჯდმარეს” – ამბობს კირთაძე.
ირაკლი ჩავლეიშვილი ამბობს, რომ ის დეპუტატები, რომლებიც დღეს კირთაძის გადაყენებაში საკრებულოს ოპოზიციას უჭერენ მხარს, თავის დროზე დაშინების გზით გახდნენ საკრებულოს წევრები და მათში “ტრანსფორმაცია” მოხდა.
“ცხოვრება მოულოდნელობებითაა აღსავსე და ამითია საინტერესო. თავის დროზე გახსოვთ რა დაპირებებით მოვიდა “ნაციონალური მოძრაობა” და რომ არ შეასრულა ეს დაპირებები. ადამიანის თავში ხდება ტრანსფორმაცია და ახლებურად ფიქრი. ის ადამიანები ვინც მოიყვანა საკრებულოს თავმჯდომარედ გიორგი კირთაძე, იმათ რა გაუკეთეს იცით? არც ერთს არ დაკლებია უშიშროება, სოდი, კუდი… ზეწოლა. დიდი ნაწილი აქედან, თავის დროზე, ბიზნესმენებიიყვნენ, დააძალეს დეპუტატობა, ფული გადაახდევინეს და ეს ხალხი ჰყავდათ გაწამებულები. როდესაც ადამიანები იცვლიან პოზიციას, ეს ჩვეულებრივი პოლიტიკური პროცესია და ვერ ვხედავ ამასი ვერაფერ განსაკუთრებულს” – თქვა “გურია ნიუსთან” საუბარში ირაკლი ჩავლეიშვილმა.
გიორგი კირთაძე კი ამბობს, რომ ვერ ხედავს მიზეზს რატომ უნდა გადადგეს თანამდებობიდან.
“თუ 19 თებერვლის შემდეგ მოხდება, არ არის პრობლემა. პოლიტიკური პროცესია და არაფერი არანორმალური არ არის. ჩემი აზრით, არანორმალური არის ის, რომ საკრებულოს თავმჯდომარეები საქართველოში, სამწუხაროდ, ტოვებენ ფრაქციებს, პარტიებს და გადადიან “ქართულ ოცნებაში”. სირცხვილი, ჩემი აზრით, არის ეს. ჩემი თანამდებობიდან საკუთარი სურვილით გადადგომა, პირველ რიგში, ნიშნავს იმას, რომ რაღაც შემეშინდა, რაღაც ცუდი საქმე მაქვს გაკეთებული ან რაღაცა. ამიტომ მე არ გადავდგები. ის რომ სხვა პარტიაში არ გადავალ, ამის თეორიული შანსიც არ არის. გული მწყდება უბრალოდ. ყველა გადაწყვეტილება რაც მიგვიღია, ერთად მიგვიღია. ძველი თემების გამო ჩემმა თანაგუნდელმა ვერ უნდა მომხსნას, რადგან გადაწყვეტილება ერთად მივიღეთ. 2013 წლის ბიუჯეტი ყველამ მივიღეთ ერთად და ერთხმად. ერთად გავავწყვიტეთ, როგორ უნდა გვეცხოვრა 2013 წელს. ლოგიკა მითხარით, რატომ უნდა გადავდგე? თუ ბიუჯეტზე ხმას აძლევს ყველა და მეუბნება, რომ სწორად წარმოადგინე ყველაფერი, სწორი ხედვები გაქვს ქალაქში რაც უნდა გაკეთდესო, აქედან 20 დღის მერე მეუბნება, გადადექიო? ამიხსნას ვინმემ, რატომ უნდა გადავდგე?” – ამბობს კირთაძე.
ბათუმის საკრებულოში 21 დეპუტატია. საკრებულოს მოქმედი თავმჯდომარის გადაყენების განცხადებას (რიგგარეშე სხდომის მოწვევას, სადაც ეს უნდა გადაწყდეს) მხარს 12 დეპუტატი უჭერს. მათ შორის 7 ყოფილი ნაციონალია. თუმცა შესაძლოა, რომ ყოფილმა ნაციონალებმა გიორგი კირთაძის გადადგომას მხარი არ დაუჭირონ, ან უბრალოდ სხდომას არ დაესწრონ და დამსწრეთა უმრავლესობამ საკითხის დადებითად გადაწყვეტა ვერ შეძლოს. ამ შემთხვევაში, მოქმედ თავმჯდომარეს უფლებასმოსილება კიდევ 3 თვით გაუგრძელდება.
