გაფიცვის პარალელურად, მიკროავტობუსების მძღოლთა გამაფრთხილებელი აქცია დღეს თბილისის საკრებულოსთან 17:00 საათზე დაიწყო და 20 წუთში დასრულდა. საკრებულოში სწორედ ამ დროს სხდომა მიმდინარეობდა. შენობის წინ შეკრებული მძღოლები კი იმ პრობლემებზე საუბრობდნენ, რომლებიც მათ 2010 წლიდან აქვთ შექმნილი.
დედაქალაქში დილიდან 600-მდე ყვითელი მიკროავტობუსის მძღოლია გაფიცული. მათ საკრებულოს შენობის წინ გამართულ აქციაზე დანარჩენ კოლეგებს სოლიდარობის, საკუთარი და მგზავრთა უფლებების დაცვისკენ მოუწოდეს.
მძღოლები მოითხოვენ გაუქმდეს 2010 წელს ჩატარებული ტენდერი და ახალი კონკურენტუნარიანი ტენდერი გამოცხადდეს; მათ მიერ გადასახდელი დღიური გეგმის საფასური განისაზღვროს ფიქსირებული 20 ლარით. დღეს კი მძღოლების განცხადებით დღიური გადასახადი 60 ლარიდან იწყება და ხაზებზე მგზავრთა ნაკადის მიხედვით 130 ლარამდე მერყეობს; მათი მოთხოვნაა ასევე, მგზავრობის საფასური 30-დან 50 თეთრამდე შემცირდეს. სოციალურად დაუცველი მოსახლეობისთვის კი აღდგეს 2013 წლის პირველი იანვრიდან გაუქმებული შეღავათები. სოციალურად დაუცველები იანვრამდე ყვითელი მიკროავტობუსებით მგზავრობისას საფასურის ნახევარს, მხოლოდ 40 თეთრს იხდიდნენ.
მძღოლები აცხადებენ, რომ დღეს ისინი ვალდებულნი არიან ტრანსპორტის დაზიანების შემთხვევაში, მიკროავტობუსი ”თეგეტა მოტორსში” შეაკეთონ. ხარჯებს კი თავად ფარავენ. მძღოლების განცხადებით, ისინი ამ შეზღუდვის გამო მიღებულ მომსახურებაში 30-40 პროცენტით მეტს იხდიან.
“ტენდერი რომ გაუქმდება, ყველა უკანონობას დაესმება წერტილი… რაც შეეხება მგზავრობის ფასის 80 თეთრამდე გაზრდას, თბილისის მერიის ტრანსპორტის საქალაქო სამსახურის უფროსი კაკო ჯოხაძე კატეგორიულად მთხოვდა, მძღოლებთან მიხვალ და ეტყვი, რომ ტარიფი აწიონო. სწორედ ჯოხაძის მეშვეობით თბილისის მერს, საკუთარ კაბინეტში რამდენიმე მძღოლი შეხვდა. მათ შორის მეც ვიყავი. მგზავრობის საფასურის გაზრდა გიგი უგულავას მითითება იყო,” – აცხადებს 85 ნომერი სამარშრუტო ხაზის დისპეჩერი ოთარ ციგლაშვილი.
მძღოლები ხვალ გლდანის ავტოფარეხთან შეიკრიბებიან. ისინი თითოეული ხაზიდან 2 წარმომადგენელს შეარჩევენ, რომლებიც საინიციატივო ჯგუფის წევრებს დაასახელებენ. ორშაბათს კი 10 კაციანი საინიციატივო ჯგუფი თბილისის მერთან შესვლას მოითხოვს, რომელსაც საკუთარ მოთხოვნებს დეტალურად გააცნობენ.
“ბიჭები, ხვალ თორმეტის ნახევარზე ყველანი ახმეტელის ”გარაჟთან”. ძმებო, არავინ ხაზზე არ გავა. გაფიცვას ბოლომდე ვაგრძელებთ, სანამ ჩვენი მოთხოვნები არ დაკმაყოფილდება. ტენდერი უნდა გაუქმდეს!” – ასე მიმართა ერთ-ერთმა აქციის მონაწილემ დანარჩენ კოლეგებს.
მძღოლების განცხადებით, გავრცელებული ინფორმაცია იმის თაობაზე, თითქოს მოლაპარაკებები დაიწყო, არასწორია. მათი თქმით დღეს მოლაპარაკება არავისთან გაუმართავთ.
