წყალტუბოში უკვე დაიწყო ფუნქციონირება პარტიის ოფისმა. “ოცნების” აქტივისტებს თავიანთი კანდიდატურა ჰყავთ _ ჯეირან ლიპარტელიანი, თუმცა, ბოლო ინფორმაციით, პარტიის თავმჯდომარედ ყოფილი მინისტრის, კობა ნარჩემაშვილის ძმა, ლაშა ნარჩემაშვილი მოიაზრება. მოსახლეობა არ აპირებს მისი პარტიის თავმჯდომარედ მიღებას და სთხოვს ბიძინა ივანიშვილს პირადად გააკონტროლოს რაიონებში პარტიის დაფუძნების პროცესი, ისინი ითხოვენ თავად მიიღონ გადაწყვეტილება და მათთვის სასურველი კანდიდატურა დაინიშნოს “ქართული ოცნების” რაიონულ ლიდერად.
დარეჯან ფაილოძე: “მე “ქართული ოცნების” წევრი ვარ. ჩვენ ბევრი რამ გადავიტანეთ იმისთვის, რომ დღეს ხელისუფლებაში “ქართული ოცნება” მოსულიყო. 8 თვის განმავლობაში მუხლჩაუხრელად ვიბრძოდით, არა მარტო აქტივისტები, არამედ მათი ოჯახის წევრები იყვნენ წნეხის ქვეშ. ამ პერიოდში ყველა ერთად ვიყავით და კარგად ვიცით, ვის რა შესაძლებლობა აქვს. ამიტომ ყველას გადაწყვეტილებით პარტიის თავმჯდომარედ ჯეირან ლიპარტელიანი მოვიაზრეთ. ახლა თბილისის ცენტრალურ ოფისში გავაგზავნეთ მანდატების ჩამოსატანად, რომ ყრილობაზე დარიგებულიყო, მაგრამ გავიგეთ, რომ რაიონული ორგანიზაციის თავმჯდომარედ ლაშა ნარჩემაშვილს გვინიშნავენ. არ გვაძლევენ საკუთარი აზრის გამოთქმის და არჩევნის გაკეთების საშუალებას. ერთხელაც არ გამოჩენილა ნარჩემაშვილი აქ და არ გაუცია პასუხი ჩვენს კითხვაზე – სად იყო მაშინ, როცა ჩვენ ამდენი ზეწოლის და წნეხის ქვეშ ვიყავით? რა გააკეთა “ოცნების” გამარჯვებისთვის?”
გიორგი გორდეზიანი: “ჩვენ არ შევეგუებით, რომ ისევ “ზევიდან” იმართებოდეს პროცესები და ვიღაც-ვიღაცეები წყვეტდნენ, როგორც ადრე, ცალკეული რაიონების და ადამიანების ბედს. კრება უნდა ჩატარებულიყო 25-ში, 2 საათზე და რატომ გადაიდო, ვისი მითითებით არ დაბრუნდა ლიპარტელიანი მანდატებთან ერთად და საერთოდ, ვინ დანიშნა ნარჩემაშვილი თავმჯდომარედ, უცნობია. ამისთვის არ გვიბრძოლია, რომ “ნაციონალები 2″ მოსულიყვნენ სათავეში და ისევ მათ ემართათ ყველაფერი. არაფრით არ შევეგუებით ამ სიტუაციას და ვთხოვთ ბატონ ბიძინა ივანიშვილს, ჩაერიოს ამ პროცესებში, სანამ ისევ უმართავი გახდება ყველაფერი”.
პავლე გორდეზიანი: “ჩვენ პიროვნულად ვიცნობთ ლაშა ნაცვლიშვილს, რადგან ის წყალტუბოელია, მაგრამ არანაირი შეხება “ქართულ ოცნებასთან” არ ჰქონია. ჩვენ ვაპროტესტებთ ასეთ ქმედებებს. ვიცით, რომ სხვა რაიონებშიც განაწყენებულები არიან “ოცნების” აქტივისტები და აუცილებლად გავერთიანდებით, თუ ამის საჭიროებას დავინახავთ. ხალხის ძალა და ერთად დგომის შედეგი კი 1 ოქტომბერს დაინახა ყველამ. ბევრს რას ვითხოვთ? გვინდა ჩვენ თვითონ გადავწყვიტოთ და ავირჩიოთ ის ღირსეული კადრი, რომელსაც ხალხი გაყვება და ბევრ სასარგებლო საქმეს გააკეთებს”.
ანალოგიური სიტუაციაა სხვა რაიონებშიც. “გურია ნიუსი” დაუკავშირდა “ქართული ოცნების” საზოგადოებასთან ურთიერთობის სამსახურს, სადაც კომენტარის გაკეთება მოგვიანებით შეგვპირდნენ.
