“ნოემბერსა და დეკემბერში ციხეებიდან ქალაქის საავადმყოფოებში 2 ათასი გაყვანა დაგვჭირდა, რაშიც დაახლოებით 400 ათასი ლარი დაიხარჯა. ეს არის დიდი თანხა, მაგრამ სახელმწიფო ვალდებულია პატიმრებს უმკურნალოს. ძირითადი პრობლემები ცხვირის ძგიდეების მოტეხილობა, ხერხემლის დაზიანება და ფეხებშორის მანიპულაციების საჭიროებაა, რაც წლების მანძილზე არაადამიანური მოპყრობისა და წამების შედეგია,” _ განაცხადა სოზარ სუბარმა გადაცემა “პრეს-პრესში”.
სასჯელაღსრულების მინისტრის თქმით, თითოეულ ციხესთან ღამით სასწრაფო დახმარების ბრიგადა იმორიგევებს და საჭიროების შემთხვევაში, პატიმრებს ქალაქის კლინიკებში გადაიყვანს.
“იმისათვის, რომ ციხეებში ექიმებს ღამით ემორიგევათ, დაახლოებით 120 ექიმის დამატება გვჭირდებოდა. ერთი შტატიც რომ დაამატო, ეს საკითხი პარლამენტში უნდა გაიტანო. გარდა ამისა, 120 პროფესიონალის მონახვა ადვილი არ არის და ძვირი ჯდება, დაახლოებით მილიონ ლარზე მეტი. ამიტომ მოვნახეთ უფრო იაფი, ეფექტური და სწრაფი გამოსავალი. სასწრაფო დახმარების კომპანიას შევთავაზეთ თანამშრომლობა, ფულს ვუხდით, რომ მორიგეობა დააწესოს და ყველა დაწესებულების ეზოში დგას ერთი მანქანა. ეს დაახლოებით 2-ჯერ ნაკლები გვიჯდება იმაზე, რომ გვყოლოდა საკუთარი ღამის ექიმები. გარდა ამისა, სასწრაფო დახმარებას აქვს გარკვეული წამლები, მანქანაში იჯდება რამდენიმე პროფილის ექიმი და თუ პატიმრის გაყვანა გახდა საჭირო ქალაქის საავადმყოფოებში, ამაზეც ეს ჯგუფები იზრუნებენ,” _ განაცხადა სუბარმა გადაცემა “პრეს-პრესში”.
სოზარ სუბარის თქმით, ეს გადაწყვეტილება განპირობებული იყო იმითაც, რომ გარედან მოყვანილი ექიმების პატიმრებთან ზედმეტი ადაპტაცია არ მოხდება, რადგან ბრიგადები მუდმივად შეიცვლება.
“გარდა ამისა, როცა ექიმი თანამშრომელია, შეიძლება ვიღაცამ იფიქროს, რომ ამ ექიმს აქვს მოტივაცია დაწეროს მსუბუქი დიაგნოზი. სასწრაფო დახმარების ექიმებს ასეთი მოტივაცია არ ექნებათ და ჩვენ იძულებულნი გავხდებით პატიმარს ის მკურნალობა ჩავუტაროთ, რასაც ეს ექიმები ჩათვლიან საჭიროდ . ეს არის ერთგვარი კონტროლი გარედან,” _ განაცხადა სოზარ სუბარმა.
