“ჩემი ძმის, ისევე როგორც მიშა მესხის, გათავისუფლება იყო ადვილი, იმიტომ რომ ისინი არ იყვნენ მსჯავრდებულები. წელიწადნახევრის განმავლობაში ჩემი ძმის საქმის სააპელაციო განხილვა არ ინიშნებოდა და ჭიანურდებოდა მიზანმიმართულად. როდესაც არჩვენებში გავიმარჯვეთ და ვზეიმობდით, ჩემი ძმის ადვოკატ ირმა ჭკადუას დაურეკეს და უთხრეს, რომ 1 საათში სასამართლო იყო ჩანიშნული. პროკურატურა ამბობდა, შევთანხმდეთ სასჯელზე და გამოვუშვებთო. მე ვუთხარი, რომ ეს გამორიცხული იყო და ასეთ რამეზე არ წავიდოდით _ ჩემი ძმა იყო უდანაშაულო და ვითხოვდით პროკურატურას უკან წაეღო ბრალდება. მთელი დღე მიდიოდა ვაჭრობა ადვოკატსა და პროკურატურას შორის, ისინი გადაწყვეტილებას ვერ იღებდნენ, რადგან პროკურორი გაქცეული იყო. ამის შემდეგ ადვოკატი შეხვდა ჩემს ძმას და ვახომ უთხრა, რომ ციხიდან გამოსვლა უნდოდა. სასამართლო პროცესი დასრულდა შუაღამისას და ჩემი ძმა ციხიდან გამოვიდა. იმის შიშით, რომ საზოგადოებას არაფერი ეთქვა, მას ვერ დავტოვებდი ციხეში კიდევ 1 წლით. ეს იყო სრულიად ლეგალური, პატიოსანი და სწორი გზა,” _ განაცხადა სოზარ სუბარმა გადაცემა “პრეს-პრესში”.
სოზარ სუბარის ძმა ვახტანგ სუბელიანი 2010 წლის ოქტომბერში დააკავეს საბუთების გაყალბებასა და თაღლითობის ბრალდებით. გავრცელებული ინფორმაციით, მისი დაკავება სოზარ სუბარის პოლიტიკურ საქმიანობას უკავშირდებოდა. ვახტანგ სუბელიანმა ციხე 15 ოქტომბერს საპროცესო გარიგების საფუძველზე დატოვა, რასაც საზოგადოების მხრიდან არაერთგვაროვანი შეფასება მოყვა.
