_ 
აქ არაფერია დასამალი, აკაკი მაისურაძე უკვე დანიშნულია, ჩვენ წლების წინ ვმუშაობდით ერთად, ბოლოს მე თბილისში ვიყავი, ის კი იმერეთის მხარეში, _ გვითხრა გობეჯიშვილმა.
თავად აკაკი მაისურაძე კი მის დანიშვნას ჩვენთან საუბარში უარყოფს.
_ ჯერ ოფიციალურად არაფერი არ არის გადაწყვეტილი, ბრძანება ჩემი დანიშვნის შესახებ არ ყოფილა, სხვა ინფორმაციისთვის ძალიან გთხოვთ პრესსამსახურს დაუკავშირდით, ის გეტყვით ჩემს შესახებ ყველაფერს, _ გვითხრა მაისურაძემ.
_ “გურია ნიუსი” დაუკავშირდა შსს პრესსამსახურის ხელმძღვანელს ნინო გიორგობიანს, რომელმაც განგვიცხადა, რომ გურიის პოლიციაში გახორციელებული საკადრო ცვლილებების შესახებ მისთვის ცნობილი არ იყო.
_ მე ვიცი. რომ გურიაში არანაირი საკადრო ცვლილება არ განხორცილებულა, არც ბრძანებები დაწერილა.
_ ქალბატონო ნინო, არც იმის შესახებ არის ცნობილი, ვინ იქნება გურიის სამხარეო მთავარი სამმართველოს უფროსი?
_ არა, არა ჯერ არაფერი ვიცი, ხვალ დამიკავშირდით და თუ რაიმე იქნება ცნობილი აუცილებლად გეტყვით, _ გვითხრა გიორგობიანმა.
1982 წელს დაბადებული აკაკი მაისურაძე წარმოშობით იმერეთის ქალაქ ონიდანაა. ის შინაგან საქმეთა სამინისტროში სახვადასხვა თანამდებობაზე მუშაობდა, იყო იმერეთის, რაჭა-ლეჩხუმისა და ქვემო სვანეთის სამხარეო მთავარი სამმართველოს ამბროლაურის რაიონული სამმართველოს უფროსი, ბოლოს კი ხარაგაულის სამმართველოში მუშაობდა.
აკაკი მაისურაძის შესახებ ინტერნეტში რამდენიმე მედია საშუალება ავრცელებს ინფორმაციებს. ის ადამინების ფიზიკურ შეურაცხყოფასა და ცემაშია მხილებული. ერთი ფაქტი სახალხო დამცველის ანგარიშშიც მოხვდა.
“სახალხო დამცველი სოზარ სუბარი შინაგან საქმეთა სამინისტროსა და გენერალურ პროკურატურას მოუწოდებს. აქტუალურ საკითხად აქციონ სამართლებრივი სტრუქტურების თანამშრომელთა მიერ ადამიანებისთვის ფიზიკური ზეწოლისა და წამების ფაქტებზე რეაგირება.
სუბარის თქმით, წამების მსხვერპლზე ზეწოლა მანამდე გრძელდებოდა ხოლმე, სანამ დაზარალებული პირი არ შეწყვეტს ჩივილს.
ერთ-ერთი ასეთი ფაქტი 2007 წლის ოქტომბერში მოხდა ონის რაიონის სოფელ ქვედში, სადაც სიტყვიერი შეურაცხყოფისა და ურთიერთშელაპარაკების ნიადაგზე, ონის რაიონული განყოფილების უფროსის მოადგილემ აკაკი მაისურაძემ და მასთან მყოფმა განყოფილების ორმა თანამშრომელმა სასტიკად სცემეს სოფელ ქვედის მკვიდრი ლევან მაისურაძე.
ცემის ფაქტის თვითმხილველები არიან მამა-შვილი გოჩა და ზვიად ქისტაურები, რომლებმაც უგონო მდგომარეობაში მყოფი ლევან მაისურაძე მისი ძმის სახლში გადაიყვანეს.
სოზარ სუბარის ინფორმაციით, ლევან მაისურაძე ჯანმრთელობის გაუარესების გამო თვეზე მეტხანს მკურნალობდა თბილისში.
აღსანიშნავია, რომ აკაკი მაისურაძე და მისი ორი თანამშრომელი, ინციდენტამდე ერთი საათით ადრე ავტომატური ცეცხლსასროლი იარაღებითა და გინებით ლევან მაისურაძის ძმის ჯემალ მაისურაძის სახლშიც შეცვივდნენ და ლევან მაისურაძის მოკვლით იმუქრებოდნენ.
სუბარის თქმით, ეს შემთხვევა ძალიან ჰგავს სანდრო გირგვლიანის საქმეს, მაგრამ საბედნიეროდ, ლევან მაისურაძე ცოცხალი გადარჩა.”
სახალხო დამცველი შსს-ს და გენპროკურატურას მოუწოდებდა, ონის პოლიციის თანამშრომელთა ქმედების შესწავლა დაიწყოთ.
თავად მაისურაძე “გურია ნიუსთან” ადასტურებს, რომ ნამდვილად ის პოლიციელია, რომელიც სოზარ სუბარის განცხადებაში იყო მოხსენიებული, თუმცა აღნიშნავს, რომ მაშინ მისი საქმე საფუძვლიანად შეისწავლეს და მისი უდანაშაულობაც დაამტკიცა.
