ახალი ტრადიციის შესახებ აჭარის საკანონმდებლო ორგანოს თავმჯდომარეს დღეს ტრადიციულ პრესკონფერენციაზე ჰკითხეს. ავთანდილ ბერიძემ განაცხადა, რომ ამ ტრადიციის შესახებ 14 იანვარს ისაუბრა და ჟურნალისტებს მეტი ყურადღებით მოსმენა თხოვა.
“ჩვენ დავიწყეთ ადამიანური, ქართული, ჩვენს ქვეყანაში მიღებული ტრადიციების დამკვიდრება. დარწმუნებული ვარ არაფერი ახალი და უსაშველო არ გაგვიკეთებია. თქვენც დადიხართ თქვენი მეგობრების, თანამებრძოლების, თუ გყავთ ასეთი, თქვენი ახლობლების საფლავებზე. როდესაც სამი დეპუტატი მონაწილეობს, ამას წარმოვაჩენთ. კიდევ ერთ დეპუტატს უნდოდა, მაგრამ ფიზიკურად ვერ მოახერხა.” – ამბობს უმაღლესი საბჭოს ხელმძღვანელი. – ” ვისაც აქვს ისტორია. სამწუხაროდ ყველა დეპუტატს არ აქვს ისტორია. სამწუხაროდ არ ჰყავს ადამიანები… არცაა აუცილებელი რომ ჰყავდეს. რაც უფრო ნაკლები საფლავი გექნება მოსანახულებელი მით უკეთესი. სხვათა შორის რაც ადრე არ მითქვამს იმას მინდა ხაზი გავუსვა, თქვენთვის თორემ… ჩვენ მალხაზ სიორიძის საფლავზე ვიყავით. საქილიკო მალხაზ სიორიძის საფლავის მონახულებაში არაფერია. მალხაზ სიორიძე აჭარის უმაღლესი საბჭოს თავმჯდომარის მოადგილე გახლდათ ოთხი წელი. ჩვენი კოლეგის, ჩვენი თანამებრძოლის, რომელიც იყო სახალხო ფრონტის წევრი. სხვათა შორის, იმასაც გეტყვით, რომ რესპუბლიკური პარტიის წევრების საფლავი ამ თორმეტიდან ძალიან მცირეა”.
ვინ არიან ეს ადამიანები და რა თანამებრძოლეობაზეა საუბარი, ბერიძე განმარტავს: “ძირითადად სახალხო ფრონტელები არიან, ანუ 89 წლიდან. იქ ერთ-ერთ კომენტარში იყო სად იბრძოდითო. ჩვენ ვიბრძოდით კომუნისტური დიქტატურის წინააღმდეგ, მერე აჭარის “ლიდერის” ასლან აბაშიძის ე. წ. დიქტატურის წინააღმდეგ, შემდეგ მიხეილ სააკაშვილის დიქტატურის წინააღმდეგ. ვიბრძოდით მაგალითად საარჩევნო ბრძოლებში, ვიყავით საკანონმდებლო ბრძოლებში ჩაბმული, ვიყავით სამიტინგო ბრძოლებშიც. ერთ-ერთმა, მეჯინისწყლიდან ფეხით მსვლელობას ვაწყობდით და გზაში ინფარქტი მიიღო და გარდაიცვალა. არ იყო თანამებრძოლი?!” _ აცხადებს ბერიძე.
ექნება თუ არა ამას ტრადიციული ხასიათი, ბერიძე ამბობს, რომ იგი ყოველთვის დადის მეგობრების საფლავებზე. იმ ადამიანებს კი, ვინც ახალ ტრადიციას აქილიკებს, ავთანდილ ბერიძე აღდგომის შემდეგ საფლავებზე მისვლის ტრადიციას შეახსენებს.
“სხვათაშორის, მთავრობა აღდგომის მეორე დღეს მასობრივ გასვლებს აწყობს საფლავებზე, მაშინ თქვენ საქილიკოდ არ გაგიხდიათ ეს. მაგალითად 2012 წლის აღდგომის ორშაბათს ყველა გასული იყო საფლავზე, ამის შესახებ ვიდეო სიუჟეტები მომზადდა თქვენი ტელევიზიების მიერ. მიდით და ნახეთ. თქვენ ნახეთ “გურია ნიუსს” ჰქონდა თუ არა სიუჟეტი აღდგომის მეორე დღეს გურიის ხელისუფლება რომ გავიდა, ნიკოლაიშვილი იყო თუ არ ვცდები მაშინ, გავიდა თუ არა საფლავებზე. საქართველოს პრეზიდენტი მაშინ მგონი დიდუბის პანთეონში გავიდა. ჩვეულებრივი ქართული წესია და ვინც ვერ გებულობს, უბრალოდ ვერ გებულობს,” _ პასუხობს დეპუტატების მიერ შემოთავაზებული ახალი ტრადიციის გამქილიკებლებს ავთანდილ ბერიძე.
კითხვაზე, რის მიხედვით “შეარჩევენ” საფლავებს და რამდენი საფლავის მონახულებას აპირებენ, ავთანდილ ბერიძე პასუხობს, რომ საკითხი ბიუროზე გადაწყდება და ამის შესახებ ყველა გაიგებს. მიცვალებულებისთვის პატივის მისაგებად გამოიყოფა თუ არა თანხები ბიუჯეტიდან, ბერიძე გვპასუხობს.
“თუკი დეპუტატები დააპირებენ, რომ ეს იქნება სადეპუტატო ღონისძიება, რა თქმა უნდა, ბიუჯეტის ხარჯზე მოხდება, თუმცა მე გარწმუნებთ, რომ საფლავებზე ზოგადად ბიუჯეტის ხარჯზე არ დადიან ადამიანები. მე ვერ წარმომიდგენია, ბიუჯეტის ფული გამოყო, იყიდო ხაჭაპური, ღვინო, ყვავილები და წახვიდე”.
_ ანუ ეს ხარჯი ბიუჯეტიდან არ იყო გამოყოფილი? (ავტ.)
_ ბოდიში. მაპატიე, მგონი მაშაყირებ, _ ამბობს ბერიძე.
_ არა, ბატონო ავთანდილ.
– აბა, როგორ ფიქრობ შენ, ჩვენ ბიუჯეტიდან გამოვყავით თანხები, გავაგზავნეთ კაცი და ვაყიდინეთ ღვინო? თუ ყვავილები ვაყიდინეთ? კონა ლარი… თხუთმეტი კონა ყვავილი…
“გურია ნიუსის” კითხვა უმაღლესი საბჭოს პრესსამსახურის ხელმძღვანელმა გააპროტესტა: “სხვა ჟურნალისტებსაც აქვთ კითხვები, ნუ გადახვალთ ფამილიარულ საუბრებში”.
აჭარის ნომერ პირველი კანონმდებლის პასუხი ბიუჯეტის თანხებით მიცვალებულთა მოხსენიების შესახებ ორაზროვნად რჩება. შესაძლოა, რომ საფლავზე ყვავილის მიტანა და ჭიქა ღვინის “წაქცევა” ბიუჯეტის ხარჯებში აღმოჩნდეს. რაღა თქმა უნდა, უმაღლესი საბჭოს დეპუტატებმა საფლავებზე მისასვლელად სამსახურეობრივი მანქანები და საწვავი გამოიყენეს. იმ დეპუტატებს კი, ვისაც როგორც ბერიძე ამბობს “მკვდრები არ ჰყავთ”, არც ეს ხარჯი ექნებათ. ბერიძის თქმით, საფლავებზე მხოლოდ “ისტორიის” მქონე დეპუტატები მიდიან. როგორც უმაღლესი საბჭოს ოფიციალურ გვერდზე ფოტოების თანმდევ ტექსტში წერია “მიცვალებულთა ნაწილისათვის პატივგება გაზაფხულისთვის გადაიდო”.
