ოზურგეთის საგანმანათლებლო რესურსცენტრის ხელმძღვანელმა ლელა იმედაშვილმა ჟურნალისტებთან იმ სიახლეების შესახებ ისაუბრა, რომელიც უახლოეს მომავალში გახორციელდება განათლების სისტემაში. იმედაშვილის თქმით, წელს პირველად, საჯარო სკოლის დირექტორებს და დირექტორობის მსურველებს სასერტიფიკაციო გამოცდების ჩაბარება მოუწევთ:
_ პირველკლასელთა რეგისტრაცია წელს ონლაინ რეჟიმში მოხდება. ყველა საჯარო სკოლას აქვს საკუთარი ვებგვერდი, რომელზეც პირველკლასელები დარეგისტრირდებიან. მშობლებს მინდა ვთხოვო, დროულად გაატარონ რეგისტრაციაში სასკოლო ასაკის ბავშვები, რადგან წელს, ყველა პირველკლასელი და მისი მასწავლებელი მიიღებს კომპიუტერს. ამიტომ, საჭიროა 15 მაისამდე დასრულდეს პროცესი. თუ ბავშვი რეგისტრაციას გაივლის 16 მაისს, იგი ვეღარ მიიღებს კომპიუტერს. რეგისტრაცია 5 წლის ასაკიდან დაიწყება, _ აღნიშნა იმედაშვილმა.
მისივე თქმით, აბიტურიენტთა რეგისტრაცია 25 მარტამდე გაგრძელდება და ონლაინ რეჟიმში იწარმოებს:
_ საატესტატო გამოცდების ჩასატარებლად, ოზურგეთის მუნიციპალიტეტში შერჩეულია 19 სკოლა. ჩვენ ვეცადეთ, ტერიტორიული ბალანსი დაგვეცვა, რომ ბავშვებს გადაადგილების გამო პრობლემები არ შექმნოდათ. ვფიქრობ, საკმარისია ცენტრების რაოდენობა და მოსწავლეებს ხელი არ შეეშლებათ გამოცდაზე დროულად მისვლაში. წელს ახალგაზრდები 8 საატესტატო გამოცდას ჩააბარებენ. მათ, ვისაც შარშან არ ჩაუბარებიათ მსგავსი გამოცდა, თავიდან ყველა გამოცდის ჩაბარება მოუხდებათ.
იმედაშვილმა ისაუბრა სოციალურად დაუცველი ოჯახის წარმომადგენლებზეც, რომლებმაც აუცილებლად უნდა წარადგინონ სკოლებში საჭირო დოკუმენტაცია სახელმძღვანელოების მისაღებად. საუბარი შეეხო პედაგოგების სერტიფიცირებასაც _ წელს ყველა სპეციალობის მასწავლებლებს მიეცემათ საშუალება, სერტიფიცირება გაიარონ, როგორც პროფესიულ უნარებში, ასევე საგანშიც: _ პედაგოგები, რომლებმაც პირველად უნდა გაიარონ სერტიფიცირება და ისინიც, ვინც შარშან გაიარეს რეგისტრაცია, ჩააბარეს უნარების გამოცდა, რეგისტრაციას უფასოდ გაივლიან. იმათ, ვინც შარშან ვერ ჩააბარეს, სარეგისტრაციოდ გარკვეული თანხის გადახდა მოუხდებათ.
როგორც შეხვედრაზე ითქვა, ყველაზე აჟიტირებული თემა იყო დირექტორების სერტიფიცირება:
_ არჩეული დირექტორებისთვის ჯერ არ არის საჭირო სერთიფიცირება, ხოლო დანარჩენი სკოლების დირექტორობის მსურველებმა სასერტიფიკაციო გამოცდები უნდა ჩააბარონ. სერტიფიკაცია შეუძლია გაიაროს ყველამ, ვისაც უმაღლესი განათლება აქვს. მსურველებმა უნდა მოგვმართონ რესურსცენტრში 20 მარტამდე. სერტიფიცირება ორ ეტაპად ჩატარდება _ ეს იქნება ტესტირება და გასაუბრება, _ თქვა იმედაშვილმა.
