_ მოგესალმებით ძვირფასო კოლეგებო და მსურს გითხრათ, რომ მიუხედავად არაერთის მოსაზრებისა, თითქოს, მე თქვენთან დაპირისპირება მქონდეს, ეს არასწორია, _ დაიწყო კვერღელიძემ, თუმცა დეპუტატმა ლევან ნინიძემ იქვე შეაწყვეტინა, _ კი, გაქვთ ყველასთან დაპირისპირება და თავიდანვე გქონდათ, როცა შემობრძანდითო.
შეგახსენებთ, რომ კვერღელიძე, არც ისე დიდი ხნის წინ, საკრებულოდან გასული “თავისუფალი დემოკრატების” წევრის, თემურ სალუქვაძის ნაცვლად შესული დეპუტატია საკრებულოში.
საკრებულოს თავმჯდომარემ ალეკო მამეშვილმა შეახსენა კვერღელიძეს, პრესკონფერენციის გამართვა თუ გნებავთ, სხდომის დამთავრების შემდეგ შეგიძლიათ, ეს გააკეთოთ, ახლა კი სულ სხვა საკითხზე ვსაუბრობთო.
კვერღელიძემ უკან არ დაიხია და მოითხოვა განმარტება თუ რატომ არ წარმოადგინა საკრებულოს თავმჯდომარემ ანგარიში.
_ მას უნდა წარმოედგინა სამუშაო გეგმა, რომელშიც უნდა ჩაიდოს ანგარიში, რა გააკეთა სამ ან თუნდაც, ექვს თვეში, ასევე უნდა წარმოადგინოს ანგარიში ბატონმა კოტემაც, თუმცა, ის ახალარჩეულია ჯერ, _ თქვა კვერღელიძემ. მან იქვე დასძინა, რომ კოტე შარაშენიძე კოალიციის წარმომადგენელია და ოზურგეთის გამგებლად მის არჩევას მხარს უჭერდა და უჭერს, თუმცა, მისი არჩევის დროსაც ორგანული კანონის 33-ე მუხლი დაირღვა და პროცედურული ნორმების დარღვევის გამო, გული შესტკივა.
კოტე შარაშენიძემ რეპლიკა არ დაიშურა: _ ნუ გტკივა მაგაზე გული, დროს ნუ კარგავ ამაზე ლაპარაკით, იმდენი საქმეა საკეთებელი!
_ მთავარია მესამე საკითხი, ყველაზე მთავარი! რა დიდი ვალდებულება ჰქონდა ალეკო მამეშვილს იმ ინდმეწარმეზე, რომლის შესახებაც ბრძანებულებას იანვარში მოაწერა ხელი დეკემბრის თვის თარიღით, _ დასვა კითხვა დიმიტრი კვერღელიძემ.
ალეკო მამეშვილმა კიდევ ერთხელ მიუთითა დეპუტატს, დაბრუნებოდა დღის წესრიგით გათვალისწინებულ მესამე საკითხს.
მიუხედავად მწვავე რეპლიკებისა და საკმაოდ გამკენწლავი შეფასებებისა, არც კვერღელიძემ დაასახელა ინდმეწარმის ვინაობა და არც მამეშვილმა გააკეთა ახსნა-განმარტება დასმულ კითხვაზე.
სხდომის დამთავრების შემდეგ, ჩვენ ვესაუბრეთ დიმიტრი კვერღელიძეს.
_ ბატონო დიმიტრი, ცოტა ბუნდოვანია თქვენგან დასმული კითხვა, რომელ ინდმეწარმეზეა საუბარი და აქვს თუ არა რაიმე დანაშაულის ჩადენას ადგილი მამეშვილის მხრიდან?
_ იმავე ინდმეწარმის ინტერესებიდან გამომდინარე, არ ვასახელებ მის ვინაობას.
_ რაზე და როდის მოაწერა ხელი მამეშვილმა?
_ რაღაც სამუშაოს შესრულებას, რომელიც ფინანსდებოდა ბიუჯეტიდან. მან იანვრის თვეში მოაწერა ხელი, როცა შვებულებაში იმყოფებოდა, თან დეკემბრის თვის რიცხვით.
_ამას მტკიცებულება სჭირდება, რა იცით, რომ იანვარში მოაწერა ხელი და არა იმ დროს, რა რიცხვითაც მითითებულია.
_ ალბათ, არსებობს მტკიცებულება.
_ და თქვენ კომპრომატი მოუძებნეთ მამეშვილს, რომ გადადგეს? ულტიმატუმს უყენებთ, ამის თქმა გინდათ?
_ მას შეუძლია, მიიღოს გადაწყვეტილება, წინ 24 საათი აქვს დრო.
_ და თქვენ გსურთ, გახდეთ საკრებულოს თავმჯდომარე?
_ ასეთი კითხვა თქვენ არ უნდა მაკადროთ.
_ დღეს ზუსტად ეს გითხრეს საკრებულოს სხდომაზე: მოსვლამდე იძახდი, რომ თავმჯდომარეობა გინდოდაო და ლევან ნინიძემ გაზეთებში გამოქვეყნებული სტატიები მოიშველია.
_ მე აქ მოსვლამდე მაღალანაზღაურებად სამსახურში ვიყავი და ის დავტოვე, ამიტომ ასეთი კითხვა, გიმეორებთ, არ უნდა მაკადროთ.
