“როდესაც ურეკში ვიმყოფებოდი, ერთ-ერთმა ქალბატონმა, რომელიც სოფელ შრომის მცხოვრებია, პირადად მითხრა, რომ შრომაში მოსახლეობას, ყველაზე მეტად, გზის პრობლემა აწუხებს. მას არ სჯეროდა და პირდაპირ მითხრა, ხშირად გვპირდება ხელისუფლება, მაგრამ კაცისშვილი არ გვაქცევს ყურადღებასო. მე ამ ქალბატონს შევპირდი, რომ გზის მშენებლობას დავიწყებდით. ის, რაც 50 წლის მანძილზე არ გაკეთებულა, ახლა გაკეთდება, “ _ განაცხადა სააკაშვილმა.
მან, ამ შეხვედრაზე (2012 წლის 13 სექტემბერს) ისიც თქვა, ამიერიდან გურიას აღარ მოვშორდებიო, მაგრამ არჩევნების შემდეგ ის რეგიონს აღარ სტუმრებია.
საკააშვილმა “ერთიანი ნაციონალური მოძრაობის” ოზურგეთის მაჟორიტარობის კანდიდატს, რამაზ ნიკოლაიშვილს სოფელ შრომაში ისიც ჰკითხა, როდის დასრულდებოდა გზის მშენებლობა, რაზეც ნიკოლაიშვილმა უპასუხა, _ 4 თვეშიო. საქართველოს გზების დეპარტამენტის ყოფილმა თავმჯდომარემ მამუკა ლეჟავამ კი გვითხრა, რომ გზის მშენებლობა ორ წელიწადში დასრულდებოდა.
რეგიონული განვითარებისა და ინფრასტრუქტურის მინისტრი, დავით ნარმანია ნატანები-შრომა-ურეკის გზის მშენებლობაზე ამბობს, რომ სამუშაოები აუცილებლად გაგრძელდება.
_ ჩვენ გვაქვს არა მხოლოდ ამ მონაკვეთზე, არამედ სხვა მონაკვეთებზე დაკავშირებითაც ინფორმაცია, როცა ჯერ კიდევ სამუშაოები არ იყო დაწყებული და ისე ხდებოდა გზის მონაკვეთების გახსნა. ამ გზასთან დაკავშირებით ჩვენთვის გამოსავალი არის ის, რომ კონტრაქტი დადებულია შემსრულებელ კომპანიასთან. თანხა გათვალისწინებულია 2013 წლის ბიუჯეტში და სამუშაოები გაგრძელდება, თუმცა პერიოდულად მოხდება გადახედვა, როგორც ამ გზის შესრულებასთან დაკავშირებულ საკითხებზე, ისე სხვა მონაკვეთებზეც. რამდენად დროულად, კვალიფიციურად, ხარისხიანად შესრულდება სამუშაოები, ასევე გადაიხედება მისი ფინანსური დოკუმენტაციაც. ეს ყველაფერი ჩვენი ზედამხედველობის ქვეშ იქნება” _ განაცხადა მინისტრმა ჩვენთან საუბრის დროს.
ნატანები-შრომა-ურეკის გზის რეაბილიტაციას სამშენებლო კომპანია “სანი” ახორციელებს. “სანის” დირექტორი სერგო გვარამია “გურია ნიუსთან” ამბობს, რომ გზის მშენებლობის სამუშაოები ამ ეტაპზე, უსახსრობის გამო არის შეჩერებული.
სერგო გვარამია: _ გზის მშენებლობა უნდა დასრულდეს 2013 წლის ნოემბერში, 17 კილომეტრია, ხოლო ამ ეტაპზე, მანდ სამუშაოები შეჩერებულია მხოლოდ ერთი მიზეზის – უსახსრობის გამო. ჩვენ, ამ ობიექტზე სექტემბერში დავიწყეთ მუშაობა, არც ავანსი მიგვიღია, ისე დავიწყეთ მუშაობა. 3 კილომეტრი გზა უკვე დაგებულია და დღესაც არა მაქვს თანხები მიღებული.
_ ეს თანხები ვისგან უნდა ჩაგერიცხოთ?
_ რეგიონული განვითრებისა და ინფრასტრუქტურის სამინისტროდან.
_ გზის სამუშაოების პრეზენტაცია საზეიმოდ მოხდა, ხომ არ იყო ეს პროცესი დაჩქარებული?
_ არა, მაშინ უკვე ტენდერი ჩატარებული იყო და დავიწყეთ უკვე მუშაობა, მაგრამ იმ პერიოდისთვის ავანსი არ გვქონდა მიღებული. ნუ, ახლა სამ კილომეტრამდე გზა დავაგეთ და დღემდე ფული არ მიგვიღია, ავანსზე ლაპარაკი ზედმეტია. 2 000 000 მილიონი ავანსი მეკუთვნის.
_ ბატონო სერგო, თუ ავანსი არ იყო ჩამორიცხული, როგორ ახერხებდით ამ გზის მშენებელობის დაწყებას?
_ ჩვენ ძლიერი კომპანია გვაქვს და შეგვეძლო, ავანსის გარეშე დაგვეწყო ეს სამუშაოები. საკუთარი სახსრები გაგვაჩნდა და ბანკებთანაც კარგი ურთიერთობა გვქონდა. ახლა კი ბანკებთან გაგვირთულდა ურთიერთობა, ისინი სესხებს არ გვაძლევენ და ამიტომაც მოხდა დროებით სამუშაოების შეჩერება.
_ რეგიონული განვითარებისა და ინფრასტრუქტურის სამინისტროს თუ მიმართეთ?
_ კი, გვითხრეს, რომ ძალიან მალე მოაგვარებენ ამ საკითხს და როგორც კი თანხებს მოგცემენ, ეგრევე დავიწყებთ მუშაობას. დღესაც ვესაუბრე სამინისტროს წარმომადგენელს და გვითხრეს, რომ ავანსის საქმეს გაარკვევენ მსოფლიო ბანკთან. მოგეხსენებათ, რომ ეს მსოფლიო ბანკის პროექტია. გურულებს გადაეცით ჩემგან მოკითხვა და თავის დროზე გზას აუცილებლად ჩავაბარეთ.
“გურია ნიუსის” ინფორმაციით, ამ ეტაპზე მუშებს კუთვნილი ჯამაგირის ნახევარი აღებული არ აქვს. ამ ინფორმაციას ჩვენთან საუბრის დროს სერგო გვარამიაც ადასტურებს და ამბობს, რომ როგორც კი ფული ჩამოირიცხება ეს პრობლემა აუცილებლად მოგვარდება.
