აქციის მონაწილეები ითხოვდნენ ბინებით უზრუნველყოფას, ან შესაბამისი თანხების გამოყოფას, რათა შეძლონ ბინების ქირაობა. აქციის ორგანიზატორი იყო სტუდენტური ჯგუფი ”ლაბორატორია 1918”, რომელსაც სხვა სტუდენტებიც შეუერთდნენ და სოლიდარობა გამოუცხადეს უსახლკაროებს.
საქმე იმაშია, რომ ათონელის ქუჩაზე, ყოფილ 68-ე საჯარო სკოლაში შესახლებულ სოციალურად დაუცველ ოჯახებზე აღძრულია სისხლის სამართლის საქმე. ისინი ამბობენ, რომ შესაძლოა ამ შენობის დაკავების გამო, მათ სოციალურად დაუცველის სტატუსიც მოუხსნან. ეს ადამიანები გაუსაძლის პირობებში ცხოვრობენ, ხოლო მათი მშველელი არ ჩანს.
აქცია 15 საათზე დაიწყო ათონელის ქუჩაზე, საიდანაც გაგრძელდა ეკონომიკისა და მდგრადი განვითარების სამინისტროსთან, სადაც სტუდენტებმა და სოციალურად დაუცველებმა გააპროტესტეს ბანკების პოლიტიკა. საქმე იმაშია, რომ ამ ადამიანთა უმრავლესობამ ბინები დაკარგა ბანკის ვალების გადაუხდელობის გამო.
ამის შემდეგ სტუდენტები და სოციალურად დაუცველები მსვლელობით გაემართნენ თბილისის მერიისკენ. ისინი შეჩერდნენ საზოგადოებრივი მაუწყებლის შენობასთან და მოითხოვეს გადამღები ჯგუფი, რომელიც გააშუქებდა არსებულ პრობლემას. ნახევარსაათიანი ლოდინის შემდეგ გადამღები ჯგუფი ჩამოვიდა.
ამის შემდეგ აქცია მერიის შენობასთან გაგრძელდა, სადაც აქციის მონაწილეები მოითხოვდნენ გიგი უგულავასთან შეხვედრას, თუმცა მერი ადგილზე არ იყო. შეხვედრაზე თანხმობა განაცხადა ვიცემერმა ქაცარავამ, რომელმაც თქვა რომ შეხვდებოდა 7 კაცს, ყველასთან კი ვერ ილაპარაკებდა. 7-კაციანი ჯგუფი, რომელშიც სოციალურად დაუცველები და სტუდენტები იყვნენ, შეხვდა ქაცარავას. ვიცემერის თქმით, გარდა იმისა, რომ მერიას არ აქვს სახსრები ამ პრობლემათა მოსაგვარებლად, ეს საქმე არ შედის მათ კომპეტენციაში _ ამას შრომის, ჯანმრთელობის დაცვისა და სოციალური უზრუნველყოფის სამინისტრომ უნდა მიხედოს.
აქციის მონაწილეებმა განაცხადეს, რომ ორშაბათს, 2 საათისთვის ისინი შეიკრიბებიან დიდუბეში, სამთო ქიმიის შენობასთან, რათა გამართონ საპროტესტო აქცია და მოითხოვონ მინისტრ სერგიენკოსთან შეხვედრა.
