ჩ
ოჩელს ბრალი უკანონო შემოსავლების ლეგალიზაციასა და სამეწარმეო საქმიანობაში უკანონო მონაწილეობაში დასდეს. უფრო კონკრეტულად კი საქმე ეხება კომპანია “ნიუ ენერჯის”, რომლის საქმიანობაშიც, გამოძიების მტკიცებით ჩოჩელი უკანონოდ მონაწილეობდა.
“იგი მფარველობას უწევდა აღნიშნულ შპს-ს და ხელს უწყობდა სახელმწიფო ბიუჯეტიდან დაფინანსებული პროექტების შესრულებასთან დაკავშირებული კონტრაქტების გაფორმებაში. აღნიშნული საქმიანობის სანაცვლოდ, იგი უკანონოდ იღებდა დიდი ოდენობით შემოსავლებს და ფულის გათეთრების გზით აძლევდა კანონიერ სახეს. 2010 წლის ზაფხულში, ცეზარ ჩოჩელის მოთხოვნის საფუძველზე, შპს “ნიუ ენერჯიმ”, ჩოგბურთის და კალათბურთის მოედნების მოსაწყობად თურქეთიდან ჩამოიტანა 61 845 ლარის ღირებულების საჭირო ინვენტარი და თბილისში, კერძოდ, სოფელ დიღომში, ცეზარ ჩოჩელის მეუღლის, სვეტლანა ჩოჩელის საცხოვრებელი სახლის ეზოში დაამონტაჟა. გამოძიება მიმდინარეობს სისხლის სამართლის კოდექსის 337 და 194 მუხლის მესამე ნაწილით, რაც 9-დან 12 წლამდე თავისუფლების აღკვეთას ითვალისწინებს”, _ განაცხადეს ფინანსთა სამინისტროს საგამოძიებო სამსახურში.
სასამართლომ ჩოჩელი გირაოს სანაცვლოდ გამოუშვა. შპს “ნიუ ენერჯი” ხელისუფლების ფავორიტ კომპანიად ითვლებოდა. ბოლო წლების განმავლობაში, აღნიშნულ შპს-ს რამდენიმე ასეული მილიონის სამუშაო აქვს შესრულებული: ავტობანის მშენებლობა იგოეთი-სვენეთის მაგისტრალზე, რომლის ბიუჯეტი 20 მილიონ ლარს აღწევდა; დუშეთი-მჭადიჯვარის გზების რეაბილიტაცია და მიწის სამუშაოები, რომლის ღირებულება 5 600 000 ლარი იყო; ქვეში-ძეძვნარიანი- ტანძიაში გზების რეაბილიტაცია, მიწის სამუშაოები და ინერტული მასალების მიწოდება ღირებულებით 3 200 000 ლარი; წყალმომარაგება, გზები, სხვადასხვა ობიექტების მშენებლობა _ ეს “ნიუ ენერჯის” საქმიანობის არასრული ჩამონათვალია.
ერთი სიტყვით, საქართველოში ყველაზე ძვირადღირებულ მშენებლობებს სწორედ “ნიუ-ენერჯი” ახორციელებდა.
რეგიონული განვითარების და ინფრასტრუქტურის მინისტრმა, დავით ნარმანიამ, “გურია ნიუსისთვის მიცემულ ვრცელ ინტერვიუში დაასახელა კონკრეტული კომპანიები, რომლებიც “შავ სიაში” აღმოჩნდნენ შიდა აუდიტის მიერ მოკვლეული მასალების საფუძველზე: “შემიძლია დავასახელო ერთ-ერთი ყველაზე პრობლემური კომპანია ინფრასტრუქტურული პროექტების გახორციელებასთან დაკავშირებით, ეს გახლავთ “ნიუ ენერჯი.” ჩვენ 800-მდე გვერდი კონკრეტული დოკუმენტაცია გადავაგზავნეთ ამ კომპნიასთან და მის პროექტებთან დაკავშირებით ფინანსთა სამინისტროში. თუ გამოვლინდება მსგავსი ხარვეზები ან ვინმე დაინტერესებული პირის საჩივარი შემოვა ჩვენთან, ვალდებული ვართ, განვახორციელოთ შესაბამისი რეაგირება,” _ განაცხადა მინისტრმა.
ამ ეტაპზე გამოძიების მიერ კომპანიის მხოლოდ ერთი ლობისტი _ ცეზარ ჩოჩელი დასახელდა. თავად ჩოჩელი, “გურია ნიუსთან” საუბრისას, უკანონო საქმიანობაში მონაწილეობას უარყოფს და ამბობს, რომ საჩუქარი არასდროს არავისგან აუღია.
_ ბატონო ცეზარ, რამდენად მყარია გამოძიების მტკიცებულებები თქვენს წინააღმდეგ?
_ მაგას გამოძიება შემდგომში დაადგენს, მაგრამ ფაქტი ერთია _ თავიდან ბოლომდე ანაზღაურებული მაქვს ის თანხა, რა ღირებულების სამუშაოც შაქარაშვილის მიერ არის გაწეული. თავიდან ბოლომდე! შეიძლება უფრო მეტიცაა გადახდილი.
_ ჩოგბურთის და კალათბურთის მოედნის მოწყობა “ნიუ ენერჯს” თქვენ შეუკვეთეთ?
_ არა, თავად გამოთქვა სურვილი, რომ უნდა ეჩუქებინა, მაგრამ როგორც ყოველთვის, ჩემი ხასიათიდან გამომდინარე, არავისგან არასდროს არანაირი საჩუქარი არ მიმიღია
_ თვითონ რატომ უნდა გამოეთქვა ასეთი ძვირადღირებული საჩუქრის გაკეთების სურვილი?
_ ვმეგობრობთ და ნიკამ მითხრა, რომ აი, შენ ეზოში მინდა რაღაც ჩემს სახელზე გავაკეთოო. ასეთი ფაქტები მრავლად ხდებოდა ხოლმე. საქართველოში ვერ მომიძებნის ვერავინ თუნდაც ერთ ადამიანს, ვინც იტყვის, რომ უსასყიდლოდ რაიმე სახის საჩუქარი გადმოუცია ჩემთვის, _ აღნიშნა ჩვენთან საუბრისას ჩოჩელმა.
აღსანიშნავია, რომ იმ პერიოდში, რა დროსაც გამოძიების მტკიცებით ჩოჩელი “ნიუ ენერჯის” საქმიანობაში უკანონოდ ერეოდა, შპს-ს ტექნიკური დირექტორი საქართველოს ენერგეტიკისა და ბუნებრივი რესურსების მინისტრის მოადგილე, ილია ელოშვილი იყო.
ფინანსთა სამინისტროს საგამოძიებო სამსახურის პრესსამსახურის ხელმძღვანელის, ნათია სუხიაშვილის თქმით ელოშვილი გამოძიებას არ დაუკითხავს: _ გამოძიების ამ ეტაპზე, ილია ელოშვილის დაკითხვის საჭიროება არ დამდგარა, _ აღნიშნა ჩვენთან საუბრისას სუხიაშვილმა.
ჩოჩელი ამბობს, რომ კომპანიის საქმიანობას კარგად არ იცნობს და წარმოდგენა არ აქვს ვინ იყო მაშინ ტექნიკური მენეჯერი.
ჩვენ შევეცადეთ ამ საკითხზე ილია ელოშვილის კომენტარიც მოგვეპოვებინა, თუმცა მინისტრის მოადგილე მომსახურების ზონიდან იყოს გასული.
