“მოგახსენებთ, რომ 2011- 2012 წლებში სახელმწიფოს მიერ სოფლის განვითარებისათვის, ოზურგეთის მუნიციპალიტეტისათვის გამოყოფილი იქნა 1 085 044 , რომელიც უნდა დახარჯულიყო სოფლებში, საბავშვო ბაღების რემონტის, გზის რეაბილიტაციისათვის, წყლის სისტემის მოწყობისა და მინი სტადიონების რეაბილიტაციისათვის.
“ოზურგეთის მუნიციპალიტეტის საკრებულოს მონაცემებით, დაახლოებით 180 პროექტი არის შესრულებული, ხოლო ჩვენს ხელთ არსებული ინფორმაციით, სოფელ ნატანებში, სარიტუალო სახლის რეაბილიტაციისათვის გამოყოფილი იყო 77 190 ლარი. სამუშაოები კი დღესაც არ არის დაწყებული“ _ გაზეთი “გურია ნიუსი”.
სოფელ შრომაში, მინი-სტადიონის მოსაწყობად, პროექტით გამოყოფილი იყო 13 505 ლარი. სინსმდვილეში დაიხარჯა 18 350 ლარი, გაფორმებულია მიღება- ჩაბარების აქტი, სტადიონის მშენებლობა დაუმთავრებელია.
სოფელ ნაღობილევში, ბაღის რეაბილიტაციისათვის გამოიყო 20 163 ლარი. ბაღში მოუწესრიგებელია სველი წერტილები ( არ არის წყალი). გაურემონტებელია ჭერი, ფასადი, სათავსო ნაგებობა. შენობის გარემონტებული ნაწილი კი უხარისხოა.
სოფელ ხვარბეთში, სპორტული მოედნის მშენებლობისთვის გამოყოფილი იყო 15 413 ლარი, მხოლოდ სტადიონის შემოღობვაა დასრულებული. სტადიონი ფუნქციონირებისათვის უვარგისია, ნიადაგი არ არის გასწორებული, ყრია ქვები და ღორღი.
სოფელ შემოქმედში, ადმინისტრაციული შენობის სველი წერტილის მოწყობისათვის გამოიყო 13 524 ლარი, რომელიც არ გაკეთებულა.
სოფელ ლაითურში, სასაფლაოს შესაღობად და მასალების შესაძენად გამოყოფილია 11 115 ლარი, შეძენილი მასალები ვერ ვიპოვეთ.
ყოველივე ზემოთ აღნიშნული გვაძლევს საფუძველს ვივარაუდოთ, რომ სოფლის განვითარების პროექტის შესასრულებლად გამოყოფილი თანხის უმეტესი ნაწილი გახარჯულია არამიზნობრივად ან მითვისებულია თანამდებობის პირების მიერ.
გთხოვთ გადაამოწმოთ ჩვენს ხელთ არსებული ინფორმაციები. შეისწავლოთ, სოფლის განვითარებისათვის გამოყოფილი თანხების ხარჯვის მიზნობრიობა. დარღვევის აღმოჩენის შემთხვევაში დააყენოთ პირის ან პირების კანონით გათვალისწინებული პასუხისმგებლობის საკითხი“. -აღნიშნულია განცხადებაში, რომელსაც ხელს მარინე სუნგულია აწერს.
მარინე სუნგულია: პირადად ჩემს მიერ “სოფლის მხარდამჭერი პროგრამის” შესწავლის შემდეგ, აღმოჩნდა, რომ ძალიან ბევრ სოფელში არის აბსურდული ციფრები დასახელებული, მაგრამ რეალურად დახარჯულია ძალიან მიზერული თანხა. მაგალითად, სოფელ შემოქმედში სველი წერტილის მოსაწყობად გამოყოფილი და დახარჯულია 13 524 ლარი. რომ მივედი და ვნახე, რეალურად არც კი არსებობს. მაგალითად, სოფელ ნატანების ფაქტი ავიღოთ, ჩემი აზრით, თანხები არის არამიზნობრივად გახარჯული და ამის გამო მივმართე პროკურატურას, მოხდეს ამ საქმეების გამოძიება, რადგან ის ადამიანები, რომლებსაც ამაში ხელი ურევიათ, კვლავ არ მოხვდნენ ხელისუფლებაში რაღაც თანამდებობებზე, რომლის ეჭვიც არსებობს და მათ უნდა აგონ სათანადოდ პასუხი.
ერთი რამ მინდა აღვნიშნო, რომ პროკურატურამ სისხლის სამართლის საქმეზე მოკვლევა გაზეთში გამოქვეყნებული მასალების საფუძველზეც უნდა დაიწყოს, თუკი არსებობს ამისი რეალური ეჭვი, მაგრამ პროკურატურა დღემდე არ დაინტერესებულა მსგავსი ფაქტებით. რადგან ასე არ მოხდა, “გურია ნიუსი” თითქმის ყველა ნომერში წერდა “სოფლის მხარდამჭერი პროგრამების” ფარგლებში განხორციელებული სამუშაოების შესახებ, სადაც უამრავი ფაქტია მოყვანილი იმისა, როგორ არამიზნობრივად იხარჯებოდა თანხები. ამიტომ, მე მივაწოდე პროკურატურას “გურია ნიუსის” მასალები, ასევე დისკები და ჩემს მიერ მოკვლეული ძალიან ბევრი ფაქტი. ვითხოვ სამართლიან გამოძიებას,” _ აღნიშნავს, ჩვენთან საუბარში სუნგულია.
