მესიჯის ავტორს, რა თქმა უნდა, არ დავასახელებ.
მესიჯის მიღებიდან რამდენიმე წუთში ადგილზე ვიყავი. სასტუმრო “მაილოს” ეზოში, რომელიც აჭარის უმაღლესი საბჭოს დეპუტატ ირაკლი (იგივე მაილო) ჯაშს ეკუთვნის ხალხმრავლობა შეიმჩნეოდა. შეხვედრაზე მხოლოდ სპეციალური მოსაწვევებით შედიოდნენ, თუმცა, ყრილობა უკვე დაწყებული იყო და შემსვლელ-გამომსვლელისათვის ყურადღება არავის არ მიუქცევია. დარბაზში იქვე უკანა სკამზე დავჯექი და დიქტოფონი ჩავრთე.
წინ შეხვედრის ორგანიზატორები ისხდნენ _ ბათუმის მაჟორიტარი საქართველოს პარლამენტში მურმან დუმბაძე, ქობულეთის მაჟორიტარი დეპუტატი ფატი ხალვაში, ხელვაჩაურის მაჟორიტარი დეპუტატის როსტომ ხალვაში, აჭარის უმაღლესი საბჭოს თავმჯდომარე ავთანდილ ბერიძე, უმაღლესი საბჭოს დეპუტატი ალექსანდრე ჩიტიშვილი და კოალიციის სხვა სახეები.
“მე მინდა გაგაცნო _ ალბათ, ყველა იცნობთ _ ბატონი იოსებ ბოლქვაძე,” _ ამბობს მომხსენებელი.
ტაში.
“შტაბში ერთად მუშაობის დროს ბევრი საქმე ერთად გავაკეთეთ. არის კარგი მამა, კარგი მეოჯახე და ადამიანი, რომელთან ერთადაც შეიძლება ომში წასვლაც,” _ აგრძელებს მომხსენებელი.
კვლავ ტაში.
“ბოდიში, ბოდიში,” _ სიტყვას აწყვეტინებს ავთანდილ ბერიძე, რომელიც სკამიდან წამოდგა და მიკროფონთან მივიდა: “მახასიათებს და იცით… 89 წელში, როცა “სახალხო ფრონტს” ვქმნიდი, ვაყენებდი პირობას. ბევრმა იცის. მივიღებთ პარტიაში მას, ვისაც მე რომ ღამის 3 საათზე დავურეკავ და ვეტყვი, რომ ხულოში უნდა ავიდეთ, გარეთ თოვს, წელამდე თოვლია, მაგრამ ჩვენ დილამდე ხულოში უნდა ვიყოთ, მანქანა არ მოძრაობს, ფეხით მივდივართ, მეუღლე დაუმალავს ფეხსაცმელს. ფეხშიშველა ვინც გამომყვება, ის უნდა იყოს ჩემს გვერდით,” _ ომახიანად ამბობს ბერიძე.
ტაში.
“ხელვაჩაურის რაიონული ორგანიზაციის ხელმძღვანელად არჩეული იქნას იოსებ ბოლქვაძე. ვინ არის მომხრე?” – კითხულობს მომხსენებელი.
ყველამ აწია მანდატი.
ტაში.
ამის შემდეგ სიტყვა იოსებ ბოლქვაძეს გადაეცა. ბოლქვაძემ “ქართული ოცნების” ცენტრალური ყრილობის დელეგატები დაასახელა: “ვფიქრობ მე, თანამებრძოლებად მივიჩნევ ამ ადამიანებს. ამირან ცეცხლაძე, გურამ დუმბაძე, უნდა იყვნენ რაიონულ ორგანიზაციაში. მათ ძალიან დიდი დამსახურება აქვთ”.
ტაში.
დელეგატებად დასახელდნენ თეიმურაზ ზაქარაძე, გურამ მსხალაძე, ნუგზარ კეკელიძე და ქალბატონი ნაზი (გვარი სამწუხაროდ ვერ გავიგონე).
შემდეგ კენჭი უყარეს.
კვლავ ტაში.
ჯამში, 10 ადამიანი იქნება “ქართული ოცნების” ყრილობაზე წარდგენილი. “ჯერ ფინანსების შესახებ არ ვიცით. არც ოფისის საკითხია გადაწყვეტილი. ჯერ ამ თემაზე არაფერი არ არის,” _ ამბობს ბოლქვაძე.
ბოლოს მომხსენებელმა გამოაცხადა, რომ კონფერენციას 96 დელეგატი ესწრებოდა, თუმცა, რეალურად დარბაზში ყველა დელეგატი არ იყო, რადგან ნაწილი აივანზე, ნაწილი კი დერეფანში სიგარეტის მოსაწევად თუ საჭორაოდ იყო გასული.
ბოლო ტაში და შეხვედრა დასრულდა. “ქართულ ოცნებამ” ხელვაჩაურის რაიონული ორგანიზაციის ხელმძღვანელი, ბიურო და 10 დელეგატი აირჩია.
შეხვედრის დასრულების შემდეგ, მურმან დუმბაძეს კომენტარი ვთხოვეთ:
“აღმასრულებელი ორგანო ავირჩიეთ. ეს არის ბიურო და პარტიის რაიონული ხელმძღვანელი ბატონი იოსებ ბოლქვაძე. პრაქტიკულად უნდა ჩავთვალოთ, რომ სტრუქტურა ამუშავდა მიუხედავად იმისა, რომ ეს არის გამარჯვებული პოლიტიკური სუბიექტი და უკვე მუშაობდა. მაგრამ ახლა არის რეორგანიზაციის საკითხი და ორგანიზაციულად გამართვა ხდება. დღევანდელი კონფერენციის დელეგატებით დადასტურდა ბიუროს შემადგენლობა, რაიონული ორგანიზაციის ხელმძღვანელის თანამდებობის სტატუსი გამოიკვეთა და აირჩიეს დელეგატები, რომლებიც მომავალ ყრილობას დაესწრებიან. ეს არის 10 კაცი,” _ განაცხადა მურმან დუმბაძემ.
დუმბაძემ განაცხადა, რომ სწორედ ასე აირჩევა ბათუმსა და სხვა რაიონებში “ქართული ოცნების” რაიონული ორგანიზაციის ხელმძღვანელები, ბიუროს წევრები და დელეგატები.
