ვის მონებად მიიჩნევს სიხარულიძე საკრებულოს წევრებს

_ იგი ოზურგეთის სასამართლოს გადაწყვეტილებას ასაჩივრებს, რომელმაც, მისი მოთხოვნის შესაბამისად, არ გააუქმა ჩოხატაურის გამგებლის მოვალეობის შემსრულებლის გია გიორგაძის გადაწყვეტილება სიხარულიძის სამსახურიდან გათავისუფლების შესახებ და არ დაავალდებულა ჩოხატაურის საკრებულო, ამ ქმედების კანონიერების შესახებ ემსჯელა.

გაზეთ “გურია ნიუსის” ოფისში გამართულ პრესკონფერენციაზე ზედამხედველობის სამსახურის ყოფილმა უფროსმა თქვა, რომ სასამართლომ პოლიტიკური გადაწყვეტილება მიიღო:

_ ბევრჯერ ვთხოვე გამგებლის მოვალეობის შემსრულებელს, დაესაბუთებინა ჩემი გათავისუფლება, რაზეც მპასუხობდა, რომ ეს ეხებოდა ბახმაროს, თუმცა დაკონკრეტებისგან თავს იკავებდა. ვინაიდან გიორგაძისგან მიზეზები ვერ გავიგე, “ადგილობრივი თვითმმართველობის შესახებ” კანონის 44-ე მუხლის შესაბამისად, გასული წლის 28 სექტემბერს, ადმინისტრაციული საჩივრით მივმართე საკრებულოს, სადაც ავღნიშნავდი, რომ გაუგებარი იყო ჩემი სამსახურიდან დათხოვნის მიზეზი და მას არ ახლდა დასაბუთება ჩემს მიერ შესაძლო გახორციელებული არაკანონიერი ქმედებებისა და დარღვევების შესახებ. ადმინისტრაციული საჩივარი დაეწერა სამანდატო, საპროცედურო და ეთიკის საკითხთა კომისიას მოსამზადებლად. კომისია შეიკრიბა, იმსჯელა და დადო დასკვნა, სადაც ნათქვამი იყო, რომ ჩემი გათავისუფლება მოხდა უკანონოდ. თუმცა, როგორც მოგვიანებით გაირკვა, საკრებულოს ბიუროზე შეცვლილი დასკვნა შევიდა, _ გვითხრა სიხარულიძემ.

“კომისიამ, შეისწავლა რა ვლადიმერ სიხარულიძის ადმინისტრაციული საჩივარში მითითებული დასკვნები, მიიჩნია, რომ ადმინისტრაციულ საჩივარი საფუძვლიანია და უნდა გაუქმდეს მუნიციპალიტეტის გამგებლის მოვალეობის შემსრულებლის 2010 წლის 17 სექტემბრის #452 ბრძანება,” _ ვკითხულობთ დასკვნაში, რომელიც სიხარულიძემ გასულ კვირას გამართულ ბრიფინგზე წარმოადგინა. თუმცა, ამ დასკვნას არანაირი იურიდიული ძალა არ აქვს, რადგან მასზე არც ხელმოწერაა და არც ბეჭედია დასმული.

მეორე დასკვნაში კი, რომელსაც საკრებულოს კანცელარიის ბეჭედი აქვს დასმული, წერია რომ “ვლადიმერ სიხარულიძის დაკავებული თანამდებობიდან გათავისუფლება მოხდა სწორად”.

სიხარულიძე ამბობს რომ კომისიის თავმჯდომარემ, თამაზ ურიდიამ, სხვა წევრებთან ერთად, თავდაპირველი დასკვნა შეცვალა:

_ თამაზ ურიდია, ლია ჩიგოგიძე, ზაზა ბასილია, თემურ კოროშინაძე _ ეს ადამიანები დამნაშავეები და ჩიტაიშვილის მიერ შექმნილი დანაშაულებრივი დაჯგუფების წევრები არიან. როცა “გურია ნიუსმა” საკრებულოს სხდომაზე მოდად დამკვიდრებული ტაშის კვრის შესახებ დაწერა, თავი შეურაცხყოფილად იგრძნეს. საინტერესოა, ახლა არ გრძნობენ თავს შეურაცხყოფილად? ისინი მონები არიან, ჩიტაიშვილის და თავართქილაძის მონები! საკრებულოს დანარჩენი წევრებიც არ არიან გამონაკლისები. რაც ჩოხატაურში ხდება, ამას “ლელა თავართქილაძის სინდრომი” ჰქვია და მინდა ეს სიტყვები ზუსტად ასე დაწეროთ. ყველამ უნდა გაიგოს და დაინახოს, რა ხდება რეალურად, _ აღნიშნა სიხარულიძემ, რომელიც, მისივე თქმით, საკრებულოში აქტიურობის გამო არ სჭირდებოდათ.

_ ბატონო ვლადიმერ, როცა ზედამხედველობის სამსახურის უფროსად დაგნიშნეს, აღნიშნეთ, რომ დანიშვნამდე გუბერნატორთან გაიარეთ ე.წ. კონსულტაციები. რატომ? თქვენც მისი მონა იყავით?

_ მე არასდროს არავის მონა არ ვყოფილვარ და არც ვიქნები. გუბერნატორს როცა შევხვდი, ჩემი პოზიციები გარკვევით ვუთხარი და ავუხსენი, რომ არც ანტონის ჭკუაზე გავივლიდი ოდესმე და არც დოლიძის.

_ საკრებულოს სხდომაზე, როცა თქვენი სამსახური შეიქმნა, ითქვა, რომ თქვენს მიერ გაწეული მუშაობის ანგარიშს კანონმდებელი ორგანო 6 თვეში ერთხელ მოისმენდა, თუმცა ეს არ მოხდა. უფრო მეტიც _ როდესაც თქვენი სამსახურის მუშაობით დავინტერესდით, აღმოჩნდა, რომ ოქმები მხოლოდ ჩვენი ოფიციალური წერილის მიღების შემდეგ, ერთი კვირის განმავლობაში იწერებოდა.

_ ჩემი სამსახური ანგარიშვალდებული იყო გამგებლის და საკრებულოს წინაშე, რომლებიც საკუთარი უფლებამოსილების გახორციელებისთვის ბიუჯეტიდან ნახევარ მილიონზე მეტს ღებულობს. ისინი ვალდებულები იყვნენ კონტროლი გაეწიათ ჩემი სამსახურისთვის. ვერ დამისახელებენ ვერც ერთ ფაქტს, რომ ჩემი სამსახურის ანგარიშს მოუსმინეს კომისიის, ფრაქციის ან ბიუროს სხდომაზე ან ამის მცდელობა იყო. მათ ძალიან კარგად იცოდნენ, რაც ხდებოდა და ამიტომაც არ სურდათ ჩემთვის მოესმინათ. 2009 წლის აგვისტოში შეიქმნა ზედამხედველობის სამსახური, იმავე წლის სექტემბრის ბოლოს რაიონის ხელმძღვანელობამ იცოდა ბახმაროში მიმდინარე მოვლენების შესახებ.

_ გინდა თქვათ, რომ დოლიძე და ხუნდაძე ბახმაროში მიმდინარე მოვლენების შესახებ დიდი ხნის წინ ფლობდნენ ინფორმაციას?

_ ჯერ კიდევ 2009 წელს, მათ უშუალოდ ჩემგან იცოდნენ, რომ ბახმაროში უკანონო ჭრები მიმდინარეობდა. ჩემი საკრებულოდან გაყვანა სწორედ ამ მიზნით მოხდა. როცა ზედამხედველობის სამსახურს ჩავუდექი სათავეში, ვიცოდი, რა უნდა მეკეთებინა, თუმცა, მათ მუშაობის საშუალება არ მომცეს.

_ თუკი გავიწროებდნენ და არ გამუშავებდნენ, ამის შესახებ ხმამაღლა რატომ არ განაცხადეთ?

_ მე რაც საჭირო იყო, გავაკეთე. ბახმარო დიდი თემაა და მის შესახებ მოგვიანებით ვისაუბრებ. მოგაწვდით იმ მასალებს და დოკუმენტაციას, რომელიც ზედამხედველობის სამსახურში მუშაობისას შევაგროვე და დასკვნებიც მერე გავაკეთოთ, _ გვითხრა სიხარულიძემ და დასძინა, რომ საკუთარ სიმართლეს აუცილებლად დაამტკიცებს.

სამანდატო, საპროცედურო და ეთიკის საკითხთა კომისიის თავმჯდომარე თამაზ ურიდია ჩვენთან საუბრისას ამბობს, რომ სიხარულიძეს შეუძლია სამართალდამცავებს მიმართოს:

_ დოკუმენტების გაყალბება დანაშაულია და ეს ძალიან კარგად იცის ბატონმა ვლადიმერმა. თუკი აქვს იმის მტკიცებულება, რომ მე დასკვნა გავაყალბე, მიმართოს შესაბამის ორგანოებს. ეს ის თემაა, რომელზეც კომენტარის გაკეთება, ვფიქრობ, არც კი ღირს.

ამავე კომისიის წევრი და საკრებულოს მმართველი ფრაქციის თავმჯდომარე ზაზა ბასილია ამბობს, რომ ორი განსხვავებული დასკვნის შესახებ არაფერი იცის და გაყალბებაში მონაწილეობა არ მიუღია. მისივე თქმით, კომისიამ სიხარულიძის საჩივარი შეისწავლა და მიიჩნია, რომ გიორგაძემ მისი გათავისუფლების ბრძანებას კანონის ფარგლებში მოაწერა ხელი.

ამავე კომისიის კიდევ ერთი წევრის თემურ კოროშინაძის თქმით, მას დასკვნის შინაარსი არ ახსოვს:

_ არ მახსოვს, რა დასკვნა დავწერეთ, შესაბამისად, ვერ გეტყვით მისი გათავისუფლება კანონიერად მივიჩნიეთ თუ უკანონოდ. ისე, მგონი, უფრო კანონიერად. გავიხსენებ და დაგირეკავთ, _ გვითხრა კოროშინაძემ, თუმცა, აღარ შეგვხმიანებია.

ვახტანგ გაჩეჩილაძე, რომელიც ჩოხატაურის საკრებულოში “ახალ მემარჯვენეებს” წარმოადგენს, ამავე კომისიის წევრია. იგი სიხარულიძის სიტყვებს ადასტურებს და ამბობს, რომ დასკვნა გაყალბდა. მისივე თქმით, კომისიის სხდომაზე მიღებული გადაწყვეტილების თანახმად, გიორგაძის ბრძანება უკანონოდ მიიჩნიეს. გაჩეჩილაძე ამბობს, რომ ამ საკითხს უახლოეს საკრებულოზე დააყენებს.

საკრებულოს თავმჯდომარე, ანტონ ხუნდაძე ვლადიმერ სიხარულიძეს საკუთარი სიმართლის დამტკიცებას სასამართლოში ურჩევს; გურიის გუბერნატორი, ვალერი ჩიტაიშვილი კი ამბობს, რომ მსგავს არასერიოზულ განცხადებებზე კომენტარს არ გააკეთებს; კომენტარის გაკეთება არც გუბერნატორის მოადგილეს ლელა თავართქილაძეს მიაჩნია მიზანშეწონილად.