ოზურგეთის მუნიციპალიტეტის სოფელ გურიანთის ცენტრში, ორსართულიანი შენობის მეორე სართული სოფლის მემორიალურ მუზეუმს უკავია, რომელსაც ახალი სიცოცხლის შეძენა და სარემონტო სამუშაოების ჩატარება ჩქარ ტემპში ესაჭიროება.
მუზეუმის გამგე მარინა მიმინოშვილი ამბობს, რომ ამ ეტაპზე ყველაზე მეტად მუზეუმს სკოლის მოსწავლები და პედაგოგები სტუმრობენ. წელს კი თბილისიდან ჩამოსული სტუდენტების სტუმრობდნენ, ასევე ურეკის საჯარო სკოლა აპირებს მოსწავლეებისთვის ღია გაკვეთილების ჩატარებას.
“მუზეუმი 1981 წლის 2 დეკემბერს გაიხსნა და დღემდე მუშაობს. ჩვენთან ძირითად არის არქეოლოგიური ნამუშევრები, რომელიც სოფელ გურიანთაში არის აღმოჩენილი. გურიანთა-ციხისფერდის უბანში მდინარე სკურდუმის ბორცვზე 1963 წელს გათხრების შედეგად აღმოჩენილი გვიანი ნეოლითის ხანის კაჟის, რიყისქვის იარაღები, ადრეფეოდალური ხანის ვაშნარის ციხე-ქალაქის მასალები. ასევე არის ეთნოგრაფიული კუთხე, სოფლის გამოჩენილი ადამიანების კუთხე, გურამ შარაძის ნამუშევრები, პირადი ნივთები, ჩანაწერები, წიგნები. მუზეუმში არის შრომის გმირების მედლები, ორდენები, პირადი ნივთები, ასევე არის მეორე მსოფლიო ომში შინ მოუსვლელთა მემორიალური კუთხე, პირადი ნივთები, წერილები, ფოტოები. მრავალშვილიანი დედების ფოტოები გვაქვს. “ – ამბობს მარინა მიმინოშვილი.
მუზეუმში არაერთი პრობლემაა, ერთ-ერთი სტიქიის დროს დაზიანდა შენობის სახურავი. ამ ეტაპზე ელექტრო ენერგია არ მიეწოდება მუზეუმს.
“არც თუ დიდი ხანია, მაგრამ ელექტრო ენერგია შენობაში არ არის, ეს მოსაგვარებელია. თუ სარემონტო სამუშაოები არ დაიწყება მანამდე შუქის პრობლემის მოგვარებას აზრი არ აქვს.
უფრო მეტი ყურადღება არის საჭირო დარწმუნებული ვარ ყველაფერ კარგად იქნება და მოგვარდება ეს პრობლემა. ეს მუზეუმი მხოლოდ ჩვენი სოფლისთვის არ არის მნიშვნელოვანია, აქ არის უდიდესი ნამუშევრები, რომელსაც უფრო მეტი მოფრთხილება და შენახვა უნდა“, – გვითხრა მარინა მიმინოშვილმა.
ოზურგეთის მუნიციპალიტეტის საკრებულოს წევრის, გურიანთის დეპუტატის მაია ზოიძის თქმით, როგორც კი ეს საკითხი გამოვიდა ოზურგეთის მუნიციპალიტეტის ბიუროს სხდომაზე აქტიურად ჩაერთო მის მოგვარებაში.
“საუბარი მქონდა ყველა კომპეტენტურ პირებთან, აქედან გამომდინარე მინდა ვთქვა, რომ არ არსებობს მუზეუმის შენობა შევიდეს საპრივატიზაციო ნუსხაში. იყო ასევე საუბარი სხვა ადგილზე გადასულიყო მუზეუმის შენობა, მაგრამ ეს საკითხიც დახურულია. კერძო აუდიტი იყო, გამიჯნულია პირველი და მეორე სართული ერთმანეთისაგან, შეფასებულია მუზეუმი 15 000 ლარად და პირველი სართული სადღაც 44 000 ლარამდე. ამ დღეებში უფრო მეტი დეტალები იქნება ცნობილი, რადგან ვმუშაობთ ამ საკითხებზე. ჩემი მოსაზრება არის ასეთი, როგორც დეპუტატის და როგორც რიგითი გურიანთელის, მუზეუმი დარჩეს იქ, სადაც არის და მოხდეს მისი სრული რეაბილიტაცია, ამ ეტაპზე როგორც ჩვენთვის არის ცნობილი სახურავი არის გასაკეთებელი“, _ გვითხრა მაია ზოიძემ.
ოზურგეთის მუნიციპალიტეტის მერიის პრესსამსახურში გვითხრეს, რომ გურიანთის მემორიალური მუზეუმის რეაბილიტაციის საკითხი გატანილია საჯარო განხილვაზე. მისი რეაბილიტაცია იგეგმება 2019 წელს. განიხილება ასევე, მუზეუმის ადმინისტრაციულ შენობაში გადატანის საკითხიც.
