ნოდარ ხადურმა აღნიშნა, რომ ეს გათვლები თანხვედრაშია საერთაშორისო სავალუტო ფონდის (სსფ) მიერ გაკეთებულ პროგნოზთან.
“ჩვენ გვინდა კიდევ ერთხელ დავადასტუროთ, რომ 6%-იანი ეკონომიკური ზრდა არის ის მინიმუმი, რომელზეც ვიმუშავებთ და მომავალ წლებში ეკონომიკური ზრდის მაჩვენებელი აუცილებლად გაიზრდება ინვესტიციების ზრდის პარალელურად”, – აღნიშნა ხადურმა.
ეროვნული ბანკის სამიზნე ინფლაცია 2013-2014 წლებში 6%-ია, ხოლო 2015 წლისთვის – 5%. ნოდარ ხადურის განმარტებით, აშშ-ში ვიზიტის ფარგლებში, სსფ-ში ძალიან საინტერესო შეხვედრები გაიამრთა.
_ სსფ -ი საქართველოში დეკემბერში მუშაობდა. მარტში ფონდის მმართველი საბჭო განიხილავს საქართვლოს საკითხს და იმედი გვაქვს, რომ შეფასება საქართველოში მიმდინარე პროეცესებისადმი იქნება დადებითი და მხარდამჭერი, – ამბობს ნოდარ ხადური.
მისივე თქმით, ვიზიტისას შეხვედრები ვაშინგტონში, ნიუ-იორკსა და ბოსტონში გაიმართა. ვაშინგტონში შეხვერები სავალუტო ფონდში, მსოფლიო ბანკში, სახელმწიფო დეპარტამენტსა და “ათასწლეულის გამოწვევის კორპორაციაში” შედგა, ნიუ-იორკსა და ბოსტონში კი, ხადური ქართული ფასიანი ქაღალდების მფლობელ პორტფელურ ინვესტორებს შეხვდა.
ხადურის განმარტებით, ამერიკის შეერთებული შტატების სახელმწიფო დეპარტამენტი მხარს უჭერს საქართველოსთან თავისუფალი ვაჭრობის ხელშეკრულების გაფორმებას, უკვე არის მზაობა მოლაპარაკების აქტიურ ფაზაში გადასვლასთან დაკავშირებით და ეკონომიკის სამინისტრო გააგრძელებს ამ მხრივ აქტიურ მუშაობას.
_ 30-ზე მეტი შეხვედრა გავმართე ერთი კვირის განმავლობაში, 100-მდე ადამიანს შევხვდი ამერიკის შეერთებულ შტატებში, სხვადასხვა დონის საქმიანი წრეების წარმომადგენლებს. ყველა შეხვედრაზე დადასტურდა უპირობო მხარდაჭერა საქართველოსადმი, ახალი მთავრობისადმი და იმ პროცესებისადმი, რომელიც საქართველოში 1 ოქტომბრის არჩევნების შემდეგ მიმდინარეობს.” – აღნიშნა ნოდარ ხადურმა.
