ფინანსთა მინისტრის, ნოდარ ხადურის განმარტებით, საქართველო სსფ-ს ფინანსურ მხარდაჭერას ამ ეტაპზე არ საჭიროებს, პირიქით, წელს ქვეყანა სავალუტო ფონდისგან უკვე აღებული კრედიტების ნაწილს დაფარავს.
“ჩვენ უნდა გადავიხადოთ სავალუტო ფონდის ვალი და გადავიხდით წლის პირველ ნახევარში. დაახლოებით 360 მლნ ლარი გვაქვს ბიუჯეტში იმისთვის, რათა ორ ვალს მოვემსახუროთ. ეს არის საერთაშორისო სავალუტო ფონდი და ევროობლიგაციები, რომელიც 2008 წელს წინა მთავრობამ გამოუშვა. მათი ნაწილი 2011 წელს გადაიფარა, მაგრამ დარჩა 40 მლნ აშშ დოლარი, რომელსაც ჩვენ მოვემსახურებით და წელს დავაბრუნებთ ამ ვალს. ეს იქნება უპრეცედენტო შემთხვევა, როცა საქართველო დაიწყებს საკუთარი ვალების მომსახურებას,” – განაცხადა ნოდარ ხადურმა.
აღსანიშნავია, რომ 2012 წლის 31 დეკემბრის მდგომარეობით, სსფ-ს მიმართ ფინანსთა სამინისტროს დავალიანება 636,522 მლნ ლარს (384,211 მლნ აშშ დოლარი), ევროვნული ბანკის – 596,069 მლნ ლარს (399,793 მლნ აშშ დოლარი) შეადგენს.
ხადურმა ასევე აღნიშნა, წელს ქვეყანა სსფ-გან მხოლოდ “მორალურ მხარდაჭერას” ელის, რაც ინვესტორებისთვის ძალიან მნიშვნელოვანია.
ხადურმა ასევე განაცხადა, რომ მაისის ბოლოს, საქართველოში გაიმართება საერთაშორის სავალუტო ფონდისა და მსოფლიო ბანკის ნიდერლანდების ჯგუფის ქვეყნების ფინანსთა მინისტრების შეკრება.
“ჩვენ ვუმასპინძლებთ ევროკავშირის ექვსი ქვეყნის ფინანსთა მინისტრს, მსოფლიო ბანკის და საერთაშორისო სავალუტო ფონდის დელეგაციებს და იმედი მაქვს, რომ ამ შევხედრაზე კიდევ ერთხელ დადასტურება ამ საერთაშორისო ორგანიზაციების მხარდაჭერა საქართველოსადმი,” – განაცხადა ნოდარ ხადურმა.
ფინანსთა მინისტრმა აშშ-ში ვიზიტის შეფასებისას, მსოფლიო ბანკში გამართულ შეხვედრაზეც ისაუბრა. ხადური ამბობს, რომ მსოფლიო ბანკის ჯგუფი გააგრძელებს საქართველოს ფინანსურ მხარდაჭერას და ინფრასტრუქტურულ პროექტებს.
ნოდარ ხადური ასევე ამბობს, რომ საერთაშორისო ბაზრებზე განთავსებულ ქართულ ფასიან ქაღალდებზე მოთხოვნის ზრდა შეიმჩნევა.
“იანვარში საქართვლოს ევროობლიგაციების ფასი გაიზარდა, რაც იმას ნიშნავს, რომ ინვესტორები დადებითად აფასებენ საქართველოში მიმდინარე პროცესებს”, – მიიჩნევს ფინანსთა მინისტრი.
