მათი ინფორმაციით, ეს ორი დღეა მოსახლეობასთან მიდის კოალიცია “ქართული ოცნების” ყოფილი შტაბის კოორდინატორი კარლო კვანტალიანი და რაღაც სიებს ადგენს “ქართული ოცნების სახელით”.
ჩვენ საქმეში გასარკვევად სამიქაოში ჩავედით და მოსახლეობას შევხვდით.
ჯენეტი დარცმელიძე: “კარლო იყო ჩემთან მოსული. პირადობა მომთხოვა და მითხრა, დგება ახალი სიები, ვინც ამ სიაში არ იქნება ჩაწერილი, ვერ მიიღებს ხვნა-თესვისთვის განკუთვნილ ვაუჩერს. ეს დავალება ბიძინა ივანიშვილთან დაახლოებულმა პირმა მოგვცა და როგორც “ქართული ოცნების” მომხრე, ვალდებული ხარ, ხელი მოაწეროო. თან დააყოლა, ვისაც პარტიის წევრობა გინდათ, ეს სია თქვენი სარეკომენდაციო იქნებაო. მე არც პირადობა მივეცი და არც ხელი მოვუწერე. ვკითხე, შენ ვინ დაგავალა,-მეთქი, მაგრამ პასუხი ვერ გამცა. ხალხი გაურკვევლობაშია, რა ხდება, არ ვიცით. ნეტავ, ვისი გადასაწყვეტია, ივანიშვილი ვის მისცემს ვაუჩერს და ვის არა”.
ოლგა დარცმელიძე: “ჩემთანაც მოვიდა კარლო და მითხრა, თუ ხარ ივანიშვილის პარტიის წევრი, მხოლოდ იმ შემთხვევაში მოგეცემა დახმარებაც და ვაუჩერიც, ამიტომ მომიწერე ხელი, თუ არადა წლის ბოლომდე ელოდეო. იქ სხვებიც იყვნენ, ზოგმა მოაწერა ხელი, მაგრამ მე არ მივეცი არც პირადობა და არც ხელი მოვუწერე, მხოლოდ ის ვკითხე, ვისი დავალებით ადგენდა ამ სიებს”.
დინარი დარცმელიძე: “ერთი ვერ გავიგე _ ჩვენმა ლიდერმა, ბიძინა ივანიშვილმა თქვა, აბაშაში პარტიის თავმჯდომარედ გიორგი გვილავა დაინიშნაო. ასე თქვა საგანელიძემაც და მანანა კობახიძემ. მთელი დღეები ვუსმენდი, რამე არ შემეშალოს და არასწორად არ გავიგო,-მეთქი. ახლა სხვები დადიან, რაღაც სიებს ადგენენ, ხალხს ეუბნებიან, ვინც ამ სიაში არ იქნება, აღარც სოციალური დახმარება ექნება, არც ვაუჩერს და სხვა სარგებელს ნახავენო. თან გვითხრა, ამ სიით მოხდება გაწევრიანება პარტიაშიო. თუ პარტიაში გაწევრიანება გვენდომება, მაშინ ხომ პარტიის თავმჯდომარეს უნდა მივაკითხოთ? დავიბენით, ვერ ვხვდებით, რა სიებია ეს და რაში სჭირდება ივანიშვილს. ის კი არადა, უცებ ძველ დროში მეგონა თავი _ სიები და “ნაციონალები” ხომ განუყოფელი იყო ერთმანეთისგან?!”
ეკა გაბელაია: “კარლო კვანტალიანმა მითხრა, ამ სიაში თუ არ იქნებით, ვაუჩერებს და ყველა დახმარებას წლის ბოლომდე არ ელოდოთო. ეს ადამიანი მაედნის კოორდინატორი და საარჩევნო უბანზე დამკვირვებელი იყო. აქედან გამომდინარე, მას კავშირი აქვს “ოცნებასთან” და გასაკვირია, რატომ ვერ გვცემს პასუხს, ვინ დაავალა ამ სიების შედგენა, ვინ არიან ეს ადამიანები, ბიძინა ივანიშვილის სახელით რომ წყვეტენ, ვინ მიიღოს და ვინ არა დახმარება?!”
“გურია ნიუსი” კარლო კვანტალიანს დაუკავშირდა.
– ბატონო კარლო, რა ხელმოწერებს აგროვებდით სოფელში?
– ამასწინათ ქალაქში ვიყავი და მითხრეს, შტაბში კოორდინატორები არიან შეკრებილები და განცხადების გაკეთებას აპირებენო. მეც გადავედი. სახეზე თითქმის ყველას ვიცნობ _ მე მაედნის საარჩევნო უბანზე დამკვირვებელი ვიყავი. იქ მითხრეს ერთ კაცზე, ბიძინა ივანიშვილთან დაახლოებული პირია ჩამოსულიო და დამანახეს იგი, მაგრამ მისი არც სახელი ვიცი და არც გვარი. დღეს გვითხრეს შეკრებაზე, ამ სიებს ივანიშვილს რომ ვაჩვენებთ, გაუხარდება, ისევ ჩემს გვერდით დგას ხალხიო და თან გამოადგება, თუ ისინი დაბრუნებას დააპირებენო”.
– ვინ ისინი?
– “ნაციონალები”, მაგრამ მაგენი ახლა ისე დაბრუნდებიან, როგორც მამაჩემი დაბრუნდება. თან გვითხრეს, ეს სიები იმისთვის არის საჭირო, რომ ამ სანდო პირებს მიაქვთ ივანიშვილთან და მადლობის ნიშნად, პირველ რიგში, ამ სიებში ჩაწერილ ხალხს მიეცემა დახმარებაო.
– ვინ გითხრათ ეს?
– რომ ვნახო, ხელს დავადებ, სახელი და გვარი არ ვიცი. ისე ლაპარაკობდნენ და მეც მესმოდა. მე კარგის გაკეთება მინდოდა, ვიფიქრე, ამ სიებს შევადგენ და “ოცნების” მომხრე ხალხი პირველ რიგში მიიღებს დახმარებას,-მეთქი.
– ახლა სად არის ის სიები?
– სახლში მაქვს. ახლა მეც გაურკვეველ მდგომარეობაში ვარ. რა ვიცი, ვინ რისთვის გამოიყენებს ამ სიას. მეგონა, მართლა ივანიშვილის დავალება იყო. რატომ უნდა მოვტყუვდე _ ჯობია ის სიები სახლში იყოს. მხოლოდ მინდა გავარკვიო, ვინ იყო ის კაცი, შეკრებაზე რომ მითხრეს, ივანიშვილის ნდობით აღჭურვილი პირიაო.
წერილის მომზადების დროს სხვა სოფლებიდანაც დარეკეს და გვითხრეს, რომ მათთანაც დგება ანალოგიური სიები _ მოსახლეობა საქმეში გარკვევას ითხოვს.
