“დღეს ეროვნულ ბიბლიოთეკასთან დაძაბულობა შეიქმნა პრეზიდენტის, თბილისის მერის და რამდენიმე პარლამენტის წევრის შეგნებული პროვოკაციული მოქმედების გამო (ზოგიერთი პირდაპირ იგინებოდა და შეურაცხყოფას აყენებდა ხალხს) … შექმნილ ურთულეს ვითარებაში შინაგან საქმეთა სამინისტრომ და საპატრულო ქვედანაყოფმა გააკეთა შესაძლებლობის მაქსიმუმი: არ დაუშვა ძალადობა, მოქმედებდა პროფესიონალურად და კანონის სრული დაცვით…”
“გურია ნიუსი” დაუკავშირდა “ქართული დასის” ლიდერს ჯონდი ბაღათურიას.
– სახალხო დამცველი ამბობს, რომ შინაგან საქმეთა სამინისტრომ არ მიიღო ზომები და პოლიცია უმოქმედოდ იყო. ამასვე აცხადებენ უმცირესობის წევრებიც. როგორ ფიქრობთ, არ შეასრულა პოლიციამ თავისი მოვალეობა?
– ეს განცხადება სიმართლეს არ შეესაბამება. სინამდვილეში თბილისის მერი და რამდენიმე პარლამენტის წევრი იქცეოდა პროვოკაციულად, რითაც გამოიწვიეს აქციის მონაწილეები… ჩემი აზრით, მათი ასეთი საქციელი იყო შეგნებული პროვოკაცია. პოლიციამ გააკეთა შესაძლებლობის მაქსიმუმი, იქცეოდა პროფესიონალურად და კანონის სრული დაცვით, არ დაუშვა ძალადობა.
– “ის, რაც დღეს მოხდა, არ არის დემოკრატია”, _ ამის შესახებ ამერიკის შეერთებული შტატების ელჩმა რიჩარდ ნორლანდმა პრეზიდენტის რეზიდენციის წინ შეკრებილ მოქალაქეებთან საუბრისას განაცხადა. რა შეფასებები მოყვება დღევანდელ მოვლენებს საზღვარგარეთიდან?
– ის, რაც 8 თებერვალს მოხდა იყო შეგნებული პროვოკაცია. პარლამენტის ზოგიერთი წევრი პირდაპირ გინებით მიმართავდა ხალხს, ამის დამადასტურებელი კადრებიც არსებობს, ამიტომ საჭიროა დიპლომატიური კორპუსის კარგად ინფორმირება. მთელი მსოფლიო ხედავს, რა უღირს სააკაშვილს თავისი სკამი და როგორ ებღაუჭება ამ სკამს ყველაფრის ფასად, რად უნდა ასეთი სკამი?
– საქართველოს საკონსტიტუციო სასამართლომ წარმოებაში არ მიიღო პარლამენტის წინააღმდეგ სარჩელი, რომელიც პრეზიდენტის უფლებამოსილებას ეხებოდა. ახალმა უმრავლესობამ სააკაშვილი პრეზიდენტის პოსტზე დატოვა, თუმცა, მათი თქმით, სააკაშვილი ვადაგასული პრეზიდენტია.
– არ ვეთანხმები უმრავლესობას _ სააკაშვილი ვადაგასული კი არა, დამნაშავეა ხალხის და სახელმწიფოს წინაშე და ამაზე პასუხი უნდა აგოს.
– გავრცელდა ინფორმაცია, რომ 2013 წლის საპრეზიდენტო არჩევნებზე “ნაციონალური მოძრაობის კანდიდატი ვანო მერაბიშვილი იქნება.
– ვანო მერაბიშვილი როგორ ექცეოდა ხალხს, თუ ვინმეს დაავიწყდა, იხილოს ფოტო მასალა და ვიდეო 7 ნოემბრის, 26 მაისის, ციხის კადრები და ა.შ. სააკაშვილი, მერაბიშვილი და მისი ბანდა უკვე წარსულია, რომელიც თავს გახსენებს უბრალოდ.
– თუმცა, საზოგადოების ნაწილი და განსაკუთრებით რაიონებში ასე არ ფიქრობს _ ხალხს ჯერ კიდევ ეშინია კამერების წინ საკუთარი აზრის გამოთქმის, სამ თვეში მართლა რომ დაბრუნდეს ძველი ხელისუფლება, მაშინ რა გვეშველებაო და საკმაოდ სერიოზული შიში აქვთ, აპრილის დასაწყისში მერაბიშვილი რევანშით ბრუნდებაო.
– კომიკურია მერაბიშვილის ასეთი გამონათქვამები. სააკაშვილის და მერაბიშვილის სისასტიკეზე დამყარებული რეჟიმი დასრულდა სამუდამოდ, მისი რეანიმაცია შეუძლებელია. ჩვენ წინ გვაქვს წარმატებული მომავალი, ამიტომ ნუღარავის ნუღარ ეშინია _ შიშის დრო წავიდა, წარსულს ჩაბარდა. ახლა ჩვენ ამ შიშის მთესველი ნაძირალები უნდა გავასამართლოთ, რათა შემდგომში არავის გაუჩნდეს ამის განმეორების სურვილი.
– ბატონო ჯონდი, სანამ ჩვენ ვსაუბრობდით, სოციალურ ქსელებში უკვე გაჩნდა მოთხოვნა, რომ სასწრაფოდ გადადგეს შსს მინისტრი ღარიბაშვილი. გავრცელდა ეს მიმართვა: “ბატონო ირაკლი, უკვე დაუშვით პროვოკაციაც, ხულიგნობაც და დანაშაულიც, უკვე დაუშვით ის, რომ თქვენმა აქტივისტებმა სცემეს ქალბატონი დეპუტატი, თბილისის მერი და ნაციონალური მოძრაობის სხვა წევრები. შესაბამისად, თუ გამბედაობა გეყოფათ – გადადექით!”
– არასერიოზული მოთხოვნაა. დარწმუნებული ვარ ამის ავტორი მიშა, ვანო და კიდევ რამდენიმე სკამის დაკარგვის გამო შეღონებული ადამიანი იქნება. დღეს პოლიციამ გააკეთა შესაძლებლობის მაქსიმუმი და მინისტრი ჩემის აზრით იქცეოდა ღირსეულად.
– და ბოლოს, როგორ გესახებათ ხვალინდელი დღე ქართულ პოლიტიკურ სივრცეში?
– მე ოპტიმისტურად ვარ განწყობილი. ჩვენს ხალხს და სახელმწიფოს აქვს დიდი მომავალი და ჩვენ წინ გვაქვს ბევრი გამარჯვება და წინსვლა.
